Tuma Basa ukora muri Youtube yasabye anakwa umukunzi we mu muhango wa Kinyarwanda

Yanditswe na Muvunyi Arsène
Kuya 22 Nyakanga 2019 saa 10:14
Yasuwe :
0 0

Umunyarwanda Tumaine Basaninyenzi [Tuma Basa] umwe banyarwanda bakoze mu bigo bikomeye bicuruza umuziki birimo Youtube, yasabye anakwa umukunzi we Abaynesh Jembere ukomoka muri Ethiopia, mu mihango ya Kinyarwanda.

Uyu muhango wabereye kuri Intare Conference Arena i Rusororo mu mujyi wa Kigali.

Witabiriwe n’abantu benshi b’inshuti z’imiryango yombi barimo umuhanzikazi Sey Shey wo muri Nigeria n’abandi bashoramari mu bya muzika.

Ni umuhango wayobowe mu misango ya Kinyarwanda, umuryango wa Tuma wari uhagarariwe n’umusaza witwa Kazungu, mu gihe uwa Abaynesh wari uhagaririwe n’uwitwa Canisius.

Abo mu muryango w’umukobwa batabasha kumva Ikinyarwanda bari bambaye utwuma mu matwi tubafasha kumva neza ibiri kuvugwa, ndetse hanifashishwaga umusemuzi mu gihe babwiraga Abaynesh.

Tuma Basa yari yambaye imishanana y’umweru yakozwe na Moshions ndetse na Abaynesh byari uko.

Mu gusohora Abaynesh agiye gushyikirizwa umukunzi we Tuma Basa, yari aherekejwe na Jules Sentore waririmbaga “Sine ya Mwiza.” Ibi birori kandi byasusurukijwe na Clarisse Karasira ndetse n’Itorero Inganzo mu Ngaji.

Tuma Basa na Abaynesh bari bamaze igihe kinini bakundana. Mu Ukuboza umwaka ushize nibwo yamwambitse impeta bemeranywa kuzabana akaramata.

Tuma Basa ni umwe mu bantu bafite uburaribonye mu gucuruza umuziki muri Leta Zunze Ubumwe z’Amerika. Ubu ayobora ishami rya Urban Music ku rubuga rwa YouTube. Mbere yabanje gukorera televiziyo ya BET, MTV, REVOLT ya P.Diddy.

Umugore we ni umucuruzi ukomeye afite uruganda rukora indorerwamo rwamwitiriwe.

Imishanana ya Moshions niyo Tuma Basa n'abamuherekeje bari bambaye
Tuma Basa n'umukunzi we bari bambaye bya Kinyarwanda
Tuma Basa yahaye umukunzi we impano iri mu gaseke
Ababyeyi ba Abayneshi bishimiye kumushyingira mu muco nyarwanda
Ababyeyi ba Tuma Basa bishimiye kwakira umukazana wabo
Abaynesh yari yarimbishijwe bya kinyarwanda
Abaynesh yateze amaboko arashayaya
Ibyishimo byari byose ku mukunzi wa Tuma Basa

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza