Theo Bosebabireba agiye gusubira mu ishuri kwiga umuziki

Yanditswe na Munyengabe Murungi Sabin
Kuya 24 Ugushyingo 2016 saa 09:12
Yasuwe : XX
0

Umuririmbyi Uwiringiyimana Théogène [Theo Bosebabireba] agiye gutangira amasomo ajyanye n’umuziki no kwihugura mu bicurangisho by’ibanze bya muzika, yihaye umwaka wa 2017 ko ugomba kurangira ageze ku rundi rwego.

Theo Bosebabireba umaze imyaka igera ku icumi aririmba, mu gihe cyose yakoze umuziki nta gikoresho na kimwe cy’umuziki yigeze yiga gukoresha gusa yihaye intego ko mu ntangiriro z’umwaka wa 2017 azagana ishuri ry’umuziki ryigisha inanga ya kizungu[piano] na gitari kugira ngo ahinduke umucuranzi wabigize umwuga.

Yagize ati “Umwaka utaha ngira ngo uyu murabona ko warangiye ndashaka gutangira kwiga ibicurangisho bikomeye bya muzika ku buryo nzaba umuhanzi w’umunyamwuga nkajya ntumirwa mu bitaramo nkaririmba nicurangira.”

Uwiringiyimana Theo yavuze ko mu byamuzitiye ntabashe gufata amahugurwa mu muziki ku isonga haza ibibazo yahuye na byo mu buzima bikamubuza amahirwe yo kwiga bityo no gukora umuziki akaba yarabyinjiyemo ashakisha ubuzima.

Ati “Ntabwo natangiye umuziki ntekereza ko nzaba umuhanzi ukomeye, byari ugusenga no gufasha abantu twasenganaga kuko ni bo banteraga imbaraga […] Nakoze umuziki ntazi neza ko nzamenyekana, nagezemo mbona ubuzima nkomeza gushakisha imibereho gusa, aho bigeze ubu ndashaka kuzamura urwego ngezeho…”

Ati “Ndashaka kwiga cyane gucuranga piano na gitari, ni ibicurangisho navuga ko ari iby’ibanze ku munyamuziki. Nta masomo ndabifataho kuko icyo nkora mu myaka yose maze ndirimba ni uguhanga gusa ariko nari ntaratekereza ku byo kwiga gucuranga […] Nzashaka abantu babyigisha babifitemo ubumenyi buhagije bampugure mbimenye neza.”

Theo Bosebabireba agiye kujya mu ishuri kwiga umuziki

Theo Bosebabireba mu myaka amaze akora umuziki amaze kuririmba indirimbo zirenga ijana ze bwite, yanakoze album zigera ku icumi zanacurujwe bikomeye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza