The Next Pop Star: Uko gukura atazi se byatumye Cyiza amenya byimbitse imvune z’abapfakazi

Yanditswe na Uwiduhaye Theos
Kuya 4 Werurwe 2021 saa 05:57
Yasuwe :
0 0

N’ubwo benshi badatobora ngo bavuge akababaro kabo, akenshi kuba umubyeyi yarera abana ari umwe ni ibintu bigoye kandi bitera igikomere kuri bamwe bitewe n’ubuzima baba babayeho.

Umwana warezwe n’umubyeyi umwe, usanga akenshi ahorana intimba bigahumira ku mirari iyo atagize amahirwe yo kumenya uwo yavutse yaritabye Imana cyangwa se yarapfuye akiri muto.

Cyiza Jackson uri mu bahatanira igihembo cya Miliyoni 50 Frw mu irushanwa ry’abanyempano rya The Next Pop Star na we ari mu bana bagizweho ingaruka no kuba yaravutse agasanga se nta we uriho, ndetse iyo abikomojeho amarira amuzenga mu maso akavuga ko gusa byatumye akunda abapfakazi ndetse agakurana umuhigo kuzajya abiyegereza akabaganiriza yaba afite ubushobozi akabasha.

N’ubwo ari umuhanzi uri kuzamuka, yemeza ko aramutse yegukanye izi miliyoni muri iri rushanwa yahita ashora amafaranga ye mu muziki ariko akagirira agatima n’ababyeyi b’abapfakazi kuko kubera ukuntu yakuranye na nyina abona ubuzima babayemo, yifuza gufasha abatamerewe neza ngo nibura abakizeho gato umusonga n’inkota y’ubukene.

Mu kiganiro cyihariye na IGIHE, yavuze ko kuba ataragize amahirwe yo kubona se imbona nkubone ari ikintu cyatumye akura afite ku mutima abapfakazi.

Ati “Ntabwo nigeze ngira amahirwe yo kumenya papa, nakuze mbona mama gusa, urumva rero ikintu kiba kindiho ni abapfakazi. Mba numva nazabafasha mu bushobozi nzaba mfite nindamuka negukanye iri rushanwa. Mba numva bindi ku mutima kuzafasha abapfakazi. Mbabazwa no kuba ntazi papa, iyo mbitekereje numva bimbangamiye.”

Uyu musore avuga ko se yapfuye afite amezi atatu gusa ku buryo uretse amafoto yerekwa ye, atigeze agira amahirwe yo kumubona amaso ku yandi, ndetse bikaba byaratumye akorwa ku mutima n’imibereho y’abagore bapfushije abagabo.

Ati “Urugo rudafite umugabo hari imbaraga ziba zibura. Ntabwo nzabura abapfakazi, sinavuga ngo nazabafasha iki cyangwa ariko nzakoresha ubushobozi bwanjye nzaba mafite.”

Anavuga ko mu gihe yaba ategukanye iri rushanwa, igihe kimwe azakora igikorwa nk’iki, kuko agihorana cyane.

Cyiza Jackson ni bucura mu bana bane bavukana, ndetse akurikira impanga ari nayo mpamvu umubyeyi yamwise ‘Cyiza’.

Yavukiye muri Kabeza i Kanombe, mu 1997. Yasoreje amashuri yisumbuye kuri Glory Secondary School.

Yakuze yiyumvamo impano aririmba indirimbo z’abahanzi batandukanye barimo Meddy, The Ben, R Kelly n’abandi.

Yagize igitekerezo cyo kwitabira The Next Pop Star ashaka kugerageza amahirwe, ngo arebe ko yaba umuhanzi w’icyamamare mu Rwanda no hanze.

Uyu musore ufite nimero 03 muri iri rushanwa mu majwi yo kuri IGIHE afite 24.708, mu gihe kuri SMS afite 9.662 yose hamwe akaba 34.370.

Amatora yo kuri kuri IGIHE, SMS n’izindi mbuga nkoranyambaga muri iri rushanwa afite 30% naho 70% asigaye yo azatangwa n’akanama nkemurampaka karimo Abanyarwanda n’abanyamahanga.

Biteganyijwe ko ku wa 14 Werurwe aribwo hazaba umuhango wo gutanga igihembo nyamukuru no gutangaza abahanzi babiri bahize abandi muri batandatu bari guhatana. Ni umuhango uzanyuzwa kuri Televiziyo ya KC2.

Aba batandatu bageze mu cyiciro cya nyuma hari ishimwe bose bazagenerwa. Iri rushanwa rigamije kuzamura abahanzi nyarwanda bakagera ku rwego mpuzamahanga.

Abantu bashobora gutora binyuze mu buryo bw’ubutumwa bugufi (SMS) aho utora yandika ijambo TNP agasiga akanya agakurikizaho nimero y’uwo ashaka gutora akohereza ku 1510.

Biteganyijwe ko umuhanzi wa mbere azegukana ibihembo bifite agaciro ka Miliyoni 50 z’amafaranga y’u Rwanda, uwa kabiri we azafashwa na sosiyete ya SM1 MUSIC GROUP/ SONY MUSIC GROUP kumenyekanisha ibihangano bye ku rwego mpuzamahanga.

Aba bahanzi bombi bazakorera urugendo muri Leta Zunze Ubumwe za Amerika aho bazishyurirwa ibyangombwa byose, birimo amafaranga y’urugendo, aho kuba n’ibizabatunga mu gihe cyose bazahamara.

Ushaka kugira uwo uha amahirwe kuri IGIHE wanyura hano: https://igihe.com/serivisi/special-pages/the-next-popstar-2020/

Reba ikiganiro Cyiza yagiranye na IGIHE

Reba igice kirimo amashusho agaragaza uko abahanzi bari guhatana muri iri rushanwa bari kwitwara mu cyiciro kibanziriza icya nyuma

Cyiza Jackson niwe uyoboye abandi mu majwi
Cyiza avuga ko aramutse yegukanye The Next Pop Star yafata amafaranga make agafasha abapfakazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .