The Ben yahumurije abarokotse Jenoside yakorewe Abatutsi

Yanditswe na Munyengabe Murungi Sabin
Kuya 11 Mata 2018 saa 11:15
Yasuwe :
0 0

Mu gihe u Rwanda rwibuka ku nshuro ya 24 Jenoside yakorewe Abatutsi, umuhanzi The Ben uri muri Uganda yashimiye byimazeyo ingabo zahagaritse ubu bwicanyi anahumuriza abarokotse.

The Ben ashimangira ko ibyo Ingabo za RPF zakoze ari ubutwari ukomeye kuko zabashije guhagarika Jenoside yahitanye ubuzima bw’Abatutsi basaga miliyoni bishwe bazira uko baremwe.

Yakanguriye Abanyarwanda bose gufatana mu mugongo mu gihe hibukwa inzirakarengane z’Abatutsi ndetse bakarushaho kunga ubumwe no kugira ubufatanye mu kubaka igihugu.

Kwibuka abazize Jenoside, The Ben avuga ko ari igikorwa cy’ingenzi kandi gikwiye kuzahora kugira ngo ubuzima bw’abapfuye, ibyiza bakoze bakiri ku Isi n’uburyo bishwe bizahore mu mitima y’Abanyarwanda.

Yagize ati “Kwibuka bivuze guha agaciro abacu batuvuyemo bazira uko basa, baryozwa uko bavutse. Kwibuka mbona bidufasha kugira icyizere no guhumuriza abasigaye ndetse tukababwira ko ejo ari heza, ari ah’umucyo; ni kimwe mu bintu biza mu bwonko bwanjye. Abatuvuyemo tuba twibuka ibyiza bakoze, uburyo bishwe bazira ubusa noneho tukanakomeza abarokotse.”

The Ben asanga muri iki gihe cyo kwibuka, abahanzi bakwiye gufata iya mbere mu kuba intangarugero no kwigisha urukundo biciye mu bihangano byabo mu kurushaho guhindura umuryango nyarwanda.

Yagize ati “Iyo umuhanzi yitwaye neza bigira ingaruka nziza ku muryango, ni byinshi bakwiye gukora ariko ikiruto byose bakwiye kwigisha urukundo ndetse bagatanga icyizere mu bihangano byabo cyane cyane muri ibi bihe turimo byo kwibuka.”

The Ben yahumurije abarokotse Jenoside yakorewe Abatutsi

Yongeyeho ati “Ubutumwa ntanga ni bugufi, ni urukundo. Ni ijambo ryagarutsweho no mu mategeko icumi y’Imana, urukundo nirwiyongera ku bindi bintu by’indashyikirwa igihugu cyacu kivugwaho tuzaba turi ku rundi rwego.”

The Ben amaze icyumweru muri Uganda, arateganya kuza mu Rwanda kuri uyu wa Kane tariki ya 12 Mata 2018; azahamara igihe gito ubundi yerekeze i Nairobi.

The Ben arateganya kuza mu Rwanda kuri uyu wa Kane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza