The Ben na Angel mu bahanzi 10 ba Afurika bahatanira Prix Découvertes

Yanditswe na Munyengabe Murungi Sabin
Kuya 19 Nzeri 2016 saa 12:07
Yasuwe :
0 0

Mugisha Benjamin [The Ben] na Angel Mutoni babonetse ku rutonde rw’abahanzi icumi bo muri Afurika batoranyijwe guhatanira igihembo cya Prix Découvertes gitangwa na Radio Mpuzamahanga y’Abafaransa.

Iri rushanwa ngarukamwaka rihuza abahanzi b’abanyempano muri Afurika uwa mbere agahabwa igihembo gikomeye cy’amayero ibihumbi icumi [10,000 euros], gukora ibitaramo bizenguruka Afurika na kimwe gikomeye umuhanzi ategurirwa mu Mujyi wa Paris.

RFI yashyize hanze urutonde rw’abahanzi icumi bemerewe guhatanira Prix Découvertes uyu mwaka ndetse itangaza ko amatora kuri internet yatangiye. Guinée, Madagascar n’u Rwanda bifitemo abahanzi babiri.

The Ben ukorera umuziki muri Amerika na Angel Mutoni umuraperi ubarizwa mu itsinda rya BMCG ni bo baserukiye u Rwanda uyu mwaka, bari mu bahanzi icumi bo ku Mugabane wa Afurika bemerewe guhatanira iki gihembo uyu mwaka.

Mutoni yabwiye IGIHE ko afite icyizere ko azatsinda ndetse ko ari ishema kubona umuhanzi w’u Rwanda ahaganganye n’abo mu bindi bihugu bisanzwe bifite umuziki uzwi ku Isi.

Yongeyeho ati “Ni ibintu byanshimishije cyane, bizamfungurira izindi nzira, umuziki wanjye uzagera ahandi hantu. Iri rushanwa nagiye ndibonamo abahanzi bakomeye cyane ku buryo ntatekerezaga ko nshobora kuzamo, nanjye bizamfasha nzamuke ngere ahandi.”

The Ben yemeje ko byongereye imbaraga umuziki we ndetse ko izina rye rizarushaho kumenyekana mu bindi bihugu. Yavuze ko afite icyizere cyo kuzahagararira igihugu neza Imana yabiha umugisha akaba uwa mbere.

The Ben yabonetse mu bahanzi 10 ba Afurika bahataniye igihembo cya RFI

Iri rushanwa rimaze gutsindirwa n’abahanzi bakomeye muri Afurika mu myaka rimaze kuba, ryatwawe na Tiken Jah Fakoly (Côte d’Ivoire),Rokia Traoré (Mali), Didier Awadi (Sénégal), Amadou na Mariam (Mali) na Maurice Kirya (Uganda).

Mu mwaka wa 2013 Mani Martin wo mu Rwanda yararyitabiriye ariko ntiyabasha gutsinda.

Prix Découvertes RFI itegurwa ku bufatanye na Sacem, Institut Français, Umuryango Mpuzamahanga w’Abavuga Igifaransa na Unesco.

Itora ry’abafana rizasozwa kuwa 19 Ukwakira 2016, akanama nkemurampaka kayobowe na Kery James kazaterana ku itariki ya 4 Ugushyingo 2016 kazatanga amanota ku bahatana hongerweho n’ayavuye kuri internet mu bafana.

Abahanzi 10 bahatanye uyu mwaka ni:

- As Gang (Côte d’Ivoire)
- Pamela Badjogo (Gabon/Mali)
- Atis Constant (Haïti)
- Daba (Sénégal)
- Kandia Kora (Guinée)
- Minah (Madagascar)
- Angel Mutoni (Rwanda)
- Soul Bang’s (Guinée)
- Stella Afro (Madagascar)
- The Ben (Rwanda)

Angel Mutoni wo muri BMCG ahataniye igihembo cya RFI
Yizeye kuzahagararira u Rwanda neza

Kanda hano utore The Ben na Angel Mutoni muri Prix Découvertes RFI


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza