Stromae yahishuye ko yari kwiyahura iyo hataba murumuna we

Yanditswe na Munyengabe Murungi Sabin
Kuya 11 Ugushyingo 2017 saa 11:03
Yasuwe :
0 0

Imyaka ibiri irashize umuririmbyi w’igihangange ku Isi Stromae akoreye igitaramo mu Rwanda, urugendo rwe rwajemo kidobya kubera uburwayi yagize ubwo yari i Kinshasa bituma asubizwa mu Bubiligi igitaraganya.

Stromae yavuze ko yaciye mu bizazane ubwo yiteguraga urugendo rw’amateka yagiriye mu Rwanda kuwa 16 Ukwakira 2015.

Mu bibazo yagize harimo uburwayi bwa malaria bwamufashe ubwo yari muri Congo yitegura guhita aza mu Rwanda bigatuma ahita asubizwa mu Bubiligi kuvurirwayo adasoje ibitaramo yari yateguye.

Stromae yumvikana muri filime mbarankuru «Malaria Business» asobanura ingaruka zikomeye yatewe n’umuti witwa Lariam abaganga bamuhaye kubera malaria yamufatiye muri Afurika. Yavuze ko yagize ibibazo bikomeye byanatumye asubira mu bitaro mu minsi ishize.

Purepeople yatangaje ko filime «Malaria Business» yakozwe na Bernard Crutzen, igomba kuzatambuka kuri France Ô saa yine n’iminota 55 [20h55] mu ijoro ryo kuwa 29 Ugushyingo 2017.

Mu gace gato k’iyi filime katambutse ku rubuga rwa Purepeople, Stromae yagize ati “Nagize ingaruka zikomeye nakomoye kuri Lariam”. Yongeyeho ko byanamusigiye ingaruka mbi z’imitekerereze.

Yagize ati “Ibi byaje muri Kamena 2015. Ni mu gihe nari mu rugendo rw’ibitaramo nakoreye muri Afurika. Nari naniwe, nari nacitse intege. Imbaraga bampaye ni Lariam. Mu bitaramo ntabwo numvaga uwo munaniro, sinasinziraga, byari bikomeye…”

Stromae ari mu batanga ubuhamya ku bubi bw'ibinini byitwa Lariam

Stromae yashimangiye ko mu bibazo byose yahuye nabyo muri iyi myaka ibiri ishize iyo atagira umuvandimwe we Luc Junior Tam ngo byari kumukomerera cyane. Ati “Ibyo mvuga ndabishimangira. Iyo murumuna wanjye atahaba, ndatekereza ko uyu munsi nshobora kuba ntari kubavugisha.”

Yongeyeho ati “Yari azi neza ko hari ikintu kitagendaga neza. Ndahamya ko iyo atahaba nari kuba narayahuye muri ririya joro. Icyo ndagishimangira.”

Stromae yatangiye gusubirana ingufu! Mu mpera z’icyumweru gishize, Coralie Barbier yashyize kuri Instagram ifoto ari kumwe n’umugabo we Stromae nyuma y’iminsi myinshi yari ishize uyu muhanzi akomerewe n’uburwayi ndetse atagaragara mu bikorwa byo gufasha abahanzi gukora indirimbo nk’uko byari bimeze mbere.

Stromae na Coralie bari bamaze igihe baraheranwe n'uburwayi none bongeye kwiyereka abafana
Stromae na Coralie ubwo baheruka kugaragara mu birori by'imideli muri Nzeri 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza