Stromae n’umugore we bavuze imvano y’icyatumye afata ikiruhuko mu muziki

Yanditswe na Dusabimana Aimable
Kuya 21 Mata 2017 saa 10:02
Yasuwe :
0 0

Umuhanzi Paul Van Haver [Stromae] n’umugore we bakomoje ku mpamvu nyamukuru yatumye afata icyemezo cyo guhagarika kuririmba ku giti cye kugeza igihe kitazwi akerekeza mu bijyanye no guhanga imideli.

Stromae ni Umubiligi ukomoka mu Rwanda kuri Rutare Pierre na Miranda Marie Van Haver. Yatangiye umuziki mu 2001 akora Hip-Hop nyuma aza gukomereza mu njyana ya Electronic, yamamara cyane muri 2009 biturutse ku ndirimbo ’Alors on Dance’ yakoze igakundwa mu Burayi hose. Afite izindi ndirimbo zakunzwe hirya no hino ku Isi zirimo ’Papaoutai’, ’Formidable’, ’Tous les mêmes’ n’izindi.

Nyuma y’uko mu mpera z’umwaka ushize wa 2016 uyu muhanzi atangaje ko ahagaritse ibikorwa bijyanye no kuririmba kugeza igihe kitazwi, we n’umugore we bashimangiye ko guhagarika iby’umuziki kuri Stromae bagashyira imbaraga mu guhanga imideli binyuze mu nzu bashinze yitwa Mosaert byongereye ibyishimo kuri bombi.

Mu kiganiro bagiranye n’ikinyamakuru Paris Match cyo mu Bufaransa ubwo bamurikaga ku mugaragaro icyiciro gishya cy’imyambaro bahanze, aba bombi bavuze ko ikiruhuko Stromae yihaye mu kuririmba cyatumye uyu yongera kwishima kuko umunaniro yakuye mu kwamamara mu muziki wari umaze kumunegekaza.

Asubiza ku bijyanye no kuba yiyumvamo ibijyanye n’imideli kurusha umuziki, Stromae yagize ati "Umuziki ni ibyanjye bwite", umugore we yungamo ati "Azahora awukora, mu gihe iby’imideli ashobora byo kubaho atabifite." Bongeyeho ko mu byo bagerageza gukora bibanda mu kubinoza no kurushaho kubiryoshya kuko ’ibijyanye birushaho kunogera ubireba.’

Stromae mu bisobanuro yatanze avuga ku buryo afata umuziki n’imideli muri rusange yasobanuye ko muri iki gihe mu byo akora byose atagishishikazwa no kwita ku bivugwa ahubwo kimwe mu byo yize nyuma yo kwamamara ari ugukora ibimunogeye yumva ko bikwiye.

Ati "Hari ikintu kimwe nigiye mu kumenyekana; aricyo gukora nikorera. Ibyo abandi batekereza, ibyo bavuga, ni ibikuzonga."

"Ntabwo nari nkigira ibyishimo"

Stromae yakomeje ati "Ntabwo mfite imishinga mishya y’indirimbo mu muziki gusa ubu ndi kubonera umusaruro bucece mu yasohotse nakoranye na Vitaa (Peine et pitié) cyangwa mu gukora amashusho ya Major Lazer na Nick Minaj (Run Up). Inkuru zivuga ko nzahagarika kuririmba burundu zirarengera. Ni njye wiha uburenganzira bwo kutamenya niba nzakora indirimbo n’igihe cyabyo. Ntabwo ntegetswe gukora ikintu na kimwe. Ndashaka kubitekerezaho."

Coralie Barbier yunzemo agira ati "Niba ari ibidatuma yishima, ntacyo byaba bivuze. Hari n’igihe cyageze ibyishimo kuri Stromae birabura, byasabaga ko twongera kubaho mu buzima busanzwe."

Stromae yavuze ko yatakaje imbaraga zidasanzwe akiririmba ndetse ko yagize umunaniro ku buryo ngo yumvaga igihe kigeze ko yiha ikiruhuko. Ati "Ibyo ndimo ubu nabyo ni akazi nyako, ntabwo ari ukwirarira mu bidahari, turabyishimiye kandi byose biragenda neza."

Umugore we yakomeje avuga ko uyu muhanzi agaragiwe n’abantu ’bakwiye’ bityo byose mu buzima bizagenda neza gusa avuga ko nawe umunaniro yawumubonagaho aho asanga kuzenguruka ibihugu bya Afurika na Amerika mu bitaramo byari ibintu bitoroshye bityo akaba yari akwiye gufata akaruhuko akora n’ibindi.

Stromae na Colarie Barbier bari baherutse gusohora icyiciro cya kane cy’imideli yakozwe n’inzu yabo Mosaert ku bufatanye n’uruganda rw’inkweto z’ababyinnyi rukomeye mu Bufaransa rwitwa Repetto. Ngo biteze kuzerekana icyiciro
gikurikira mu imurika ry’imideli rikomeye ku Isi rizwi nka ‘New York
Fashion Week’ rizaba muri 2018.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza