Kwamamaza

Sonia Rolland yasubije abashinja u Rwanda guteza akaduruvayo mu Burundi

Yanditswe kuya 8-09-2016 saa 16:54' na Munyengabe Murungi Sabin


Miss Uwitonze Sonia Rolland yeruye ko u Rwanda ari igihugu kiyobowe neza kandi gitekanye, yasabye abayoboye u Burundi na Repubulika Iharanira Demokarasi ya Congo gukemura ibibazo by’ubwicanyi n’umutekano muke bihari.

Sonia Rolland yabaye Nyampinga w’u Bufaransa wa 70 mu mwaka wa 2000, ni umunyamideli unakina filime nk’umunyamwuga. Aheruka gusohora filime mbarankuru yise « Rwanda: du chaos au miracle » igaragaza ishusho nyayo y’u Rwanda kuva mu gihe cya Jenoside kugeza mu bihe Abanyarwanda batangiye kwiyubakamo icyizere.

Yagiranye ikiganiro na Jeune Afrique bamuzaba ku muryango yashinze witwa ‘Maïsha Africa’ yashinze [kuwa 19 Nzeri 2016 uzizihiza imyaka 15 ishize ushinzwe]. Yavuze ko mu myaka umaze waremyemo icyizere benshi mu bana barokotse Jenoside.

Mu bikorwa bikomeye yakoze binyuze muri Maïsha Africa harimo kubakira imfubyi, uyu muryango yawuguriye urusyo rwa kizungu rufasha kwinjiza amafaranga, yaguze moto zitwara abagenzi[atavuze umubare] ndetse ngo hari inzu 36 z’abana b’imfubyi batishoboye yasannye anazishyiramo sima ku buryo muri iki gihe yishimira ko bagenda barushaho kugira ubuzima bwiza.

Sonia Rolland yanabajijwe icyo avuga ku bibazo by’umutekano muke n’uvugwa i Burundi no muri Congo no kuba u Rwanda rushyirwa mu majwi ko ruteza akaduruvayo muri ibi bihugu, yavuze ko adakurikirana cyane ibya politiki ndetse ko nta bitekerezo bihamye yabitangaho.

“U Burundi buhagarike kurasa abantu”

Mu mvugo yumvikanisha gutaka u Rwanda anasubirizamo umunyamakuru wa Jeune Afrique, Sonia Rolland yagize ati “Ntabwo nkurikirana ibya politiki nta n’ubwo mfite ibitekerezo bisobanura ibyo bintu.”

Yongeraho ati “Nifuza ko mu Burundi bahagarika kurasa ku rubyiruko no kwica abaturage babo bashaka kuguma ku butegetsi. No muri Repubulika Iharanira Demokarasi ya Congo, ni ngombwa kurinda abaturage, kurandura ihohoterwa no kutareka abaturage mu menyo y’imitwe iharwanira.”

Sonia Rolland yashimangiye ko abaturage b’u Rwanda bifuza gukomeza kuyoborwa na Perezida Kagame kandi ko bamushyigikiye mu cyerekezo afite. Yavuze ko nubwo bimeze bitya ngo muri Afurika abantu bafite ibitekerezo byiza bararwanywa nk’uko byagenze kuri Patrice Lumumba.

Yagize ati “Bavuga ko u Rwanda ari igihugu gitegekesha igitugu kandi gikaza umutekano cyane ariko muri iki gihe abantu bakiyumvamo. Abanyarwanda barashaka kugumana Perezida kuko nta yandi mahitamo bafite kandi bari mu cyerekezo cya Paul Kagame. Ni ngombwa guha agaciro ubwo bushake.”

Yongeraho ati “Muri Afurika iyo umuntu azanye igikorwa cyiza [nk’ibya Patrice Lumumba] bashakisha uburyo bwo kumuvanaho.”

Kuki aza i Kigali ntarare muri Hoteli?

Sonia Rolland yavuze ko afata u Rwanda nk’igihugu cye kandi agisura kenshi kugira ngo yongere ahure n’abavandimwe bo kwa nyirakuru. Yahishuye ko iyo yaje i Kigali adashobora na rimwe kurara muri hoteli ahubwo ahitamo kujya mu muryango we.

Yagize ati “Byibuze njyayo inshuro ebyiri mu mwaka . Hariya ntabwo njya ndara muri hoteli ahubwo njya mu muryango. Mba nshaka kujya kureba ba marume na ba mama wacu kuko mba nkeneye gusubira ku ivuko.”

Yongeraho ati “Mu buryo bwose iyo ufite mama wawe w’Umunyafurika biragoye ko wata umuco. Nubwo nabaye igihe kinini muri Bourgogne, igihe cyose mama anganiriza mu Kinyarwanda. Nzi neza ko igihe kimwe bizaba ngombwa ko ntaha ngakorera igihugu cyanjye.”

Sonia Rolland ntajya kodesha hoteli iyo yaje mu Rwanda

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved