Social Mula yavuze ku ndirimbo ye ‘Ma Vie’ ashinjwa ko yiganye umunya-Nigeria

Yanditswe na Uwiduhaye Theos
Kuya 1 Ukwakira 2018 saa 06:50
Yasuwe :
0 0

Social Mula uherutse gushyira hanze indirimbo yise ‘Ma vie’ igasamirwa hejuru, benshi bavuga ko yiganye amagambo yo mu ndirimbo ya Simi wo muri Nigeria, yavuze adafite ubushobozi bwo guhimba amagambo mashya.

Iyi ndirimbo ya Social Mula yagiye hanze kuwa 13 Nzeri 2018, ihita itangira kwinubirwa na bamwe bavugaga yateruye amagambo yo mu Cyongereza cyo mu ndirimbo ya Simi yitwa ‘Smile for me’ akayakoresha mu ndirimbo ye.

Aya magambo Social Mula yateruye ni ayo mu gitero cya mbere cy’indirimbo ye aho aba avuga ngo “Mbeshya niba ukuri kwawe kwancungura umutima, disi ndirimbira nubwo ijwi ryawe ryaba ari iyanga, gumana nanjye niyo waba ufite aho kujya.”

Aya magambo asa neza nari mu ndirimbo ya Simi cyane mu gitero cya kabiri cyayo.

Mu kiganiro Social Mula yahaye Radio Rwanda mu kiganiro Samedi Détente, yavuze ko adafite ubushobozi bwo guhimba amagambo mashya, ku buryo ashobora gushyira hanze indirimbo abantu bakamunenga nk’aho yakoze icyaha gikomeye.

Ati “Siko byagenze, ntago nashishuye. Mpamya ko uwabikuririje nawe atishimiye wenda ntago yishimiye ko indirimbo yanjye ikundwa. Ikintu bagendeyeho sinzi ukuntu ushobora kuba wafata ijambo riri mu cyongereza kandi ubusobanuro mu Kinyarwanda ngo rigire ubusobanuro bubiri ntibishoboka”.

“Ushobora kumva umuntu umwe yaririmbye ngo ‘ndagukunda’, undi akaza akabishyira mu cyongereza avuga ngo ‘I love you’.”

Ntabwo nashishuye kuko ntafite ubuhanga bwo guhimba amagambo mashya, nkoresha amagambo nasanze. Njye ku giti cyanjye sinjya nshishura.”

Social Mula avuga ko iriya ndirimbo ya Simi yayimenye bwa mbere ubwo abantu bamwe batangiraga kuvuga ku mbuga nkoranyambaga ko yayishishuye.

Ati” Sinzi, iriya ndirimbo sinari nyizi. Nayimenye umunsi batangiye kubisakaza bavuga ko nashishuye ariko mpamya ko n’abandi bose babibonye batanshinja gushishura. Nkunda gutanga ingero niba Safi yararirimbye ‘Good morning’ hari n’undi wayiririmbye mu cyongereza, n’ibintu bihura ariko abahanzi batabipanze.”

Ubundi se umuntu bivugwa ko yashishuye ryari?

Ubundi bivugwa ko umuntu yashishuye iyo yateruye amagambo y’undi muhanzi uko yakabaye akayakoresha ntakintu ahinduyeho ndetse ugasanga yanayakurikiranyije uko yari asanzwe ameze.

Cyangwa se, iyo umuhanzi yateruye umudiho cyangwa imirirmbire [melody] by’abandi uko byakabaye akabikoresha mu ndirimbo ataherewe uburenganzira ari nabyo bikunze kubaho ku bahanzi b’abanyarwanda.

Ikibazo cyo gushishura kimaze gufata indi ntera, cyakajije umurego mu minsi ishize ubwo itsinda rya Dream Boyz ryafataga indirimbo y’Umunya-Tanzania witwa Beka Flavour, rigakoresha umudiho na melody byayo nta burenganzira ribifitiye.

Indirimbo ya Social Mula bivugwa ko yateruye amagambo y’abandi

Indirimbo ya Simi

Social Mula ntiyemeranya n'abavuga ko yashishuye amagambo y'indirimbo ya Simi
Mula aherutse gusohora indirimbo Ma vie ntiyavugwaho rumwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza