Kwamamaza

Sherrie Silver, umukobwa w’i Huye ubyinira abahanzi bakomeye ku Isi

Yanditswe kuya 5-09-2016 saa 09:45' na Munyengabe Murungi Sabin


Sherrie Silver yavukiye mu Karere ka Huye ubu atuye i Londres mu Bwongereza, amaze kuba icyamamare nk’umubyinnyi w’umunyamwuga ubikora nk’akazi kamutunze, yabyiniye abahanzi bakomeye aba mbere muri Afurika n’abahagaze neza i Burayi.

Mu kiganiro cyihariye na IGIHE, Sherrie Silver yahamije ko ari Umunyarwandakazi wavukiye ahahoze hitwa i Butare mu 1994. Se yapfuye habura ukwezi kumwe ngo avuke, mu mvugo ye yumvikanisha ko mu buto bwe yakuriye mu buzima bugoye abana na nyina gusa kugeza mu 1999 ubwo bimukiye mu Bwongereza.

Ubuzima bwe bwubakiye ku ngingi isumba izindi “Isengesho”. Ati “Navukiye mu muryango udakize, nakuze nderwa na mama, twabonaga ibintu byose bigoranye, narasenze, mama yantozaga gusenga, hamwe na Yesu nta kidashoboka.”

Sherrie yaje mu Rwanda mu mpera z’icyumweru gishize, yahaherukaga mu myaka ine ishize. Yabwiye IGIHE ko yahanyuze ari mu rugendo rw’akazi yigisha kubyina mu bihugu bya Afurika y’Uburasirazuba.

Ati “Nanze kunyura iwacu ntahasuye, nifuje ko nsiga mpakoze igikorwa gifasha umuryango nkomokamo.”

Yavuze ko muri iki gihe ari kuzenguruka Afurika yigisha abantu kubyina, yifuje kunyura mu Rwanda kugira ngo yongere arebe ubwiza n’iterambere igihugu kigezeho. Yahamaze iminsi itatu ahita ajya muri Uganda kubonana na Ghetto Kids, abana babyinira Eddy Kenzo.

Abivanga no gukina filime

Ni umubyinnyi ubikora by’umwuga ndetse yakinnye muri Africa United, iyi yasohotse muri 2010 ivuga ku rugendo rw’abana batatu b’Abanyarwanda mu rugendo bakoze rurerure bajya kureba imikino y’igikombe cy’Isi muri Afurika y’Epfo.

Yakinanyemo n’abandi bakomoka mu Rwanda, Eriya Ndayambaje na Roger Nsengiyumva. Icyiciro arimo muri Afrimma kirakomeye cyane kuko ari kumwe n’ababyinnyi bakomeye muri Afurika.

Yaherukaga mu Rwanda ryari?

“Naherukaga mu Rwanda ndakeka hashize imyaka irenga ine, icyo gihe nari naje mu gikorwa cyo kwerekana filime yanjye ‘Africa United’, na Perezida Kagame yitabiriye icyo gikorwa, nari naje ku mpamvu ikomeye.”

Ni iyihe gahunda yakuzanye?

Sherrie yavuze ko ari mu rugendo rwo kwigisha urubyiruko kubyina mu bihugu bya Afurika ariko muri iki gihe ari mu gice cya Afurika y’Uburasirazuba. Ni we mutoza mukuru w’itsinda rya Ghetto Kids risanzwe ribyina mu ndirimbo za Eddy Kenzo.

Mu byamuzanye mu Rwanda harimo gusura igihugu, gufasha abatishoboye no kwigisha kubyina. Ati “Ndi mu kazi ko kwigisha kubyina muri Afurika, mu Rwanda nabwo nari naje kwigisha abantu kubyina no kwita ku bakeneye ubufasha.”

Yongeyeho ati “Numvaga ari ngombwa ko ngaruka mu rugo, naje muri East Africa aho mvuka kugira ngo nigishe abo dufitanye isano. Ubusanzwe nigishaga mu bihugu byo mu Burengerazuba.”

I Kigali yatanze mituelle de santé ku miryango 200

Sherrie yavuye mu Rwanda atanze ubwisungane mu kwivuza ku miryango 200 ndetse n’inzitiramubu mu gikorwa yakoreye i Nyamirambo.

Ati “Icyo nashakaga ni ukugaruka mu rugo ngasiga nkoze igikorwa gifite inyungu ku muryango, nk’i Nyamirambo nahavuye mpaye inzitiramubu abantu benshi, hari n’imiryango igera kuri magana abiri [200] nahaye ubwisungane mu kwivuza.”
Ashimira cyane nyina…

Sherrie uherutse kuzuza imyaka 22 avuga ko yagize agahinda gakomeye ko kutamenya se wapfuye habura ukwezi kumwe ngo avuke. Yavuze ko nyina yakoze akazi gakomeye amurera wenyine kuva bagituye i Huye no mu gihe babaye i Kigali kugeza bimukiye mu Bwongereza.

Ati “Mama yakoze akazi kadasanzwe, mu byeru bibiri bishize nujuje imyaka 22, mu mwaka ushize narangije kaminuza mu ishami rya Business Marketing […] Narakuze, mbayeho neza, mama na we tubana mu Bwongereza i London, nabuze data habura ukwezi kumwe ngo mvuke, ni ikintu gikomeye.”

Ni gute yabaye icyamamare mu kubyina?

Yatangiye kubyina by’umwuga mu mwaka wa 2010 nyuma yo gukina filime ‘Africa United’, ni impano yavukanye ariko atahaga umwanya.

Ati “Ntabwo nari mbyiteguye, nyuma yo gukina filime nahise njya muri kaminuza, icyo gihe natekereje akazi nakora kazantunga nsanga nabyina kuko ni impano niyumvagamo kuva navuka ariko simbishyire mu bikorwa.”

Iturufu yakoresheje…

“Aho ngeze nshima Imana cyane, iyi mpano yamfunguriye imiryango nkeka ko iyo ntaza kuba umubyinnyi ntari kumenyekana ku rwego mpuzamahanga. Ni ukubera impano yanjye.”

Yongeyeho ati “Ubutumwa bukomeye ntanga aho njya hose, iyo uri kumwe n’Imana nta kidashoboka. Nkanjye navukiye ahantu hakennye ariko mu kwizera Imana no gusenga maze gutera imbere.”

Icyerekezo cye mu kubyina

Yiyumvamo inzozi zo kuzabyinira abahanzi bazwi n’Isi yose izina rye n’amafaranga yinjiza agakomeza kuba menshi. Sherrie avuga ko amafaranga abona ayakoresha mu gufasha abatishoboye, nabona ubushobozi bwisumbuye ngo bizamufasha gukomeza gukemura ibibazo by’abakeneye ubufasha.

Ati “Ndashaka gukomeza kubyina amafaranga avamo nkayakoresha mfasha abantu bihebye gukomeza kugira icyizere, ndashaka gukomeza kuzenguruka Afurika, Aziya, u Burayi.”

Yongeraho ati “Ubutumwa bukomeye ntanga aho njya hose, iyo uri kumwe n’Imana nta kidashoboka. Nkanjye navukiye ahantu hakennye ariko mu kwizera Imana no gusenga maze gutera imbere.”

“Ndi Umunyarwanda”

Mu kiganiro na Sherrie Silver akunda kugaruka cyane ku ‘bunyarwanda bwe’. Ahamya ko kuba amaze imyaka igera kuri 18 mu Bwongereza bitamwibagije igihugu avukamo.

Hari hashize imyaka ine atagera mu Rwanda

Mu gushimira abantu bamufashije kugaragaza impano ye agira ati “Nkunda u Rwanda kandi nishimiye kuba Umunyarwanda, ndashimira cyane Perezida Kagame yakoze akazi gakomeye, ndashimira Minisitiri Gatete, bamfashije kufungura imiryango niteza imbere.”

Sherrie Silver, ni umuhanzi w’umubyinnyi umaze kwamamara henshi muri Afurika no mu bihugu by’u Burayi. Yabyiniye abahanzi bakomeye ndetse yigisha kubyina mu bihugu bitandukanye.

Ati “Hafi buri kwezi bantumira kwigisha kubyina mu gihugu runaka, ntabwo ari uko nzi kubyina kurusha abandi, ni amahirwe no gukunda akazi…”

Yabyiniye abahanzi bakomeye

“Nakoranye n’abahanzi bakomeye barimo benshi bakomeye muri Afurika bose nka Wizkid, Diamond Platnumz wo muri Tanzania [ndanamufana cyane], mfitanye ibikorwa na Fuse ODG ndi muri videos ze nka Dangerous love na Antenna; Sean Paul, ba Tiwa Savage, Run Town, Ice Prince, ni benshi bakomeye dukorana.”

Sherrie Silver ari mu bahataniye ibihembo bikomeye bya African Music Magazine Music Awards (AFRIMMA) mu cyiciro cya Best African Dancer. Ibi bihembo izatangwa kuwa 15 Ukwakira 2016 i Dallas, Texas muri Leta Zunze Ubumwe za Amerika. Ibirori bizayoborwa n’umunyarwenya ukomeye muri Nigeria Basket Mouth n’umunyamideli American Cynthia Bailey.

Sherrie Silver yamaze mu Rwanda iminsi itatu
N'i Kigali yahatangiye isomo ryo kubyina
Wizkid na Sherrie basanzwe bafitanye imishinga

Yabyiniye Diamond...

Yabyiniye Wizkid muri Cyprus

Ari kuzenguruka Afurika yigisha kubyina


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved