Senderi yasohoye amashusho y’indirimbo yatuye Perezida Kagame (Video)

Yanditswe na Munyengabe Murungi Sabin
Kuya 16 Gicurasi 2017 saa 12:06
Yasuwe :
1 0

Senderi International Hit yahimbye indirimbo igaruka ku bikorwa by’indashyikirwa n’imbaraza Perezida Paul Kagame yakoresheje mu myaka 23 ishize u Rwanda ruri mu rugendo rwo kwiyubaka.

Uyu muhanzi wamenyekanye cyane mu ndirimbo ‘Twaribohoye’, ‘Nta Cash’ n’izindi, amaze imyaka myinshi aririmba kuko yatangiye mbere ya Jenoside, yanabaye umusirikare mu Nkotanyi zarwanye intambara yo kubohora igihugu, avuga ko ‘nubwo hari ibyashegeshe ubuzima bwe yigiye byinshi mu gisirikare’.

Yatangiye kuririmba mbere gato ya 1994, umuziki we wiganjemo indirimbo zivuga kuri politiki y’iterambere ry’igihugu, isuku, kwirinda ibyorezo nka Sida na Malariya, ubukungu, urukundo, umutekano n’ibindi.

Senderi avuga ko yahisemo kwibanda ku buhanzi buha agaciro ibireba ubuzima bw’igihugu kugira ngo atange umusanzu mu iterambere ndetse ngo yatangiye urugendo rwo kuvuga ubu butumwa mu ndimi z’amahanga.

Ubu yashyize hanze amashusho y’indirimbo yise ‘Komeza utuyobore’, aririmba ashima byimazeyo imbaraga Perezida Kagame yakoresheje mu gushaka icyatuma umuturage w’u Rwanda atera imbere ndetse akabaho mu mudendezo n’igihugu kikesa imihigo ku Isi.

Ati “Nayikoze nshingiye ku byagezweho, hari igihe umuntu avuga ibintu bamwe bagasaba ibimenyetso by’ibyavuzwe. Ibyo naririmbye ni ibyakozwe n’Abanyarwanda ubwabo ariko byagezweho tuyobowe na Perezida Kagame mfataho icyitegererezo, nkumva nasaba abaturage ngo twongere tumujye inyuma kuko yeretse Isi ko u Rwanda ari igihugu cyishoboye.”

Yavuze ko iyi ari indirimbo ya mbere ahimbye agamije kuyitura Perezida Kagame, ngo yafashe uyu mwanzuro nyuma yo kureba ibyo yakoze haba mu guteza imbere imiyoborere myiza, ikoranabuhanga, ubwiyunge, gushyira imbere inyungu z’umuturage n’ibindi.

Ati “Nayituye Perezida Kagame, ni we nayigeneye kandi nzi neza ko akurikirana itangazamakuru, iyi azayumva kandi izamunyura. Narebye mu bushobozi mfite ngo muhe impano yamushimisha nsanga indirimbo ariyo yamunyura n’abandi bakumva neza uwo nshimira uwo ari we.”

“Ibyo yakoze ni indashyikirwa, ibihembo yahawe mu guteza ikoranabuhanga muri Afurika birahari biranditse, nibuka ko nko muri 2014 yahawe igihembo na kaminuza yo muri Amerika kubera guteza imbere imiyoborere myiza, Loni nayo ndumva iherutse kumuha ikindi gikomeye kubera guteza imbere ibidukikije […] Ntabwo ari buri wese uhabwa ibi bihembo, kandi burya umuntu ahembwa iyo yakoze, ntabwo bapfa kumuba ibyo bihembo byose, mpamya ko biterwa n’umwihariko yerekana nk’umwe mu bayobozi ba Afurika.”

Senderi ngo yatangiye gukangurira abafana be gutiza imbaraga Perezida Kagame agakomeza kuyobora

Senderi yavuze yeruye ko yatangiye ubukangurambaga bwo kumvisha abantu bose ko ibikorwa bya Perezida Kagame bikwiye gushyigikirwa bityo bakamutiza amaboko agakomeza akayobora u Rwanda.

Reba indirimbo ’Komeza Utobore’


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza