Kwamamaza

Sauti Sol ifata Kagame nka Perezida Afurika ikwiye kwigiraho

Yanditswe kuya 17-09-2016 saa 10:25' na Munyengabe Murungi Sabin


Abagize itsinda rya Sauti Sol bafata Perezida Paul Kagame nk’umuyobozi w’indashyikirwa kurusha abandi muri iki gihe, ibikorwa bye n’umuvuduko w’iterambere igihugu cye kiriho basanga bikwiye kwigisha abandi mu guhindura Afurika nziza.

Sauti Sol yageze i Kigali kuri uyu wa 16 Nzeri 2016 aho bagomba gukorera igitaramo gikomeye cyo kumurika album ya gatatu bise ‘Live and Die In Afrika’. Aba bahanzi bakunzwe bikomeye mu ndirimbo zirimo, “Isabella”, “Unconditionally Bae”, “Nishike”, “Shake Yo Bam Bam” .

Aba ni bo baririmbye iyitwa “Nerea” bafatanyije n’abahanzi Amos na Josh. Uteze neza amatwi iyi ndirimbo iri mu njyana yoroheje ituje, Sauti Sol batangamo ubutumwa bwo gusaba abakobwa kudakuramo inda.

Kuki baririmbye Perezida Kagame?

Muri ‘Nerea’ kandi, Sauti Sol ikomoza ku bigwi n’ubutwari bwa Perezida Paul Kagame wayoboye urugamba rwo kubohora u Rwanda akanahagarika Jenoside yakorewe Abatusti mu 1994.

Muri iyi ndirimbo kandi aba bahanzi bagaruka ku bandi bagabo b’intwari n’abubatse amateka akomeye ku Isi nak Obama, Mandela n’abandi.

Mu nyikirizo ya Nerea isaba abakobwa kudakuramo inda, Sauti Sol iririmba igira iti "Ndagusabye Nerea ntunkuriremo inda, wenda uwo mwana utwite ni Malaika Imana itwoherereje”.

Mu kiganiro bagiranye n’itangazamakuru kuri uyu wa Gatanu, babajijwe impamvu nyamukuru yatumye bavuga izina Kagame mu ndirimbo yabo, uwitwa Bien-Aimé Baraza ahita asubiza ko ‘ari Perezida w’indashyikirwa muri iki gihe’.

Perezida Kagame, indashyikirwa!

Bien-Aimé Baraza ati “Mu bihe byacu ni we Perezida w’indashyikirwa, iyo ndi mu Rwanda, mba numva ndi mu Burayi bwo muri Afurika. Oya, ni ukuri! Iki ni cyo gihugu cyonyine usangamo internet ya Wi-Fi ahantu hose, nta bibazo bya internet biba hano. Mwe mukeka ko bisanzwe wenda? Oya, ntabwo ari ibintu bisanzwe!”

Yongeyeho ati “Imihanda irasa neza, abantu baho ntawamenya ko ari abavuye muri ya mateka. Ibyo Perezida Kagame yakoze abandi banyafurika bakwiye kubyigana.”

Yavuze uburyo Perezida Kagame yorohejemo ishoramari bikwiye kwigisha abandi bayobozi muri Afurika, kuri Bien-Aimé Baraza ni ibintu bidasanzwe kuba ‘umushoramari agera mu Rwanda nyuma y’umunsi umwe akemererwa gutangira ubucuruzi’.

Ati “Ni umunsi umwe gusa gutangiza ishoramari hano, yorohereje abashoramari bo mu bindi bihugu bya Afurika gukorera mu Rwanda, ari gushora imari mu baturage b’igihugu, ari guha imbaraga abaturage…”

Willis Chimano yahise amuca mu ijambo akora mu mufuka azamura indangamuntu ati “Ibi ni ingirakamaro cyane kuba tubasha kuza mu Rwanda dukoresheje indangamuntu gusa…”

Aba bahanzi bavuze ko ibyiza Perezida Kagame yatangiye bigaragara ko akibikomeje ndetse hari byinshi azakorera igihugu ari nayo mpamvu bamuririmbye nk’umuyobozi udasanzwe.

Sauti Sol bafite igitaramo gikomeye kuri uyu wa Gatandatu kuri Expo Ground, kwinjira ni ukwishyura amafaranga ibihumbi icumi [10,000] ndetse amatike ari gucururizwa kuri Nakumatt UTC na KCT, Sawa Citi Supermarket, Ndoli Supermarket no kuri Jumia Market.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved