Saidi Brazza wamamaye i Burundi yafatiwe mu mukwabu w’urumogi i Kigali

Yanditswe na Munyengabe Murungi Sabin
Kuya 16 Werurwe 2017 saa 12:22
Yasuwe :
0 0

Umuhanzi Saidi Brazza wamamaye i Burundi mu njyana ya Reggae ari mu gatsiko k’abantu 18 bafatanwe ibiro 300 by’urumogi rufite agaciro k’amafaranga y’u Rwanda miliyoni esheshatu.

Saidi Brazza umaze imyaka irenga 25 aririmba, yakunzwe cyane mu ndirimbo ‘Yameze amenyo’, yari amaze igihe gito avuye kugororerwa mu kigo ngororamuco cya Iwawa mu Kiyaga cya Kivu. Yajyanwe i Iwawa nabwo kubera ibiyobyabwenge.

Uyu muhanzi ari mu bo Polisi y’u Rwanda yerekanye kuri uyu wa 15 Werurwe 2017 batawe muri yombi mu mukwabo w’iminsi irindwi wakorewe mu mirenge ya Gitega, Nyarugenge, Kigarama na Rwezamenyo ari naho yafatiwe.

Yafashwe anywa urumogi ndetse yabyemereye itangazamakuru, ngo ‘kuva yava i Iwawa yaretse ibiyobyabwenge ariko ku bwo gukomeza kubana n’abantu babimunywera iruhande bimurusha imbaraga yongera kubyijandikamo’. Brazza ngo ’amaze imyaka hafi 15 anywa urumogi’.

Mu bafashwe harimo umugore umwe wafatanywe ikiyobyabwenge cyitwa mugo n’umugabo wahishaga urumogi mu kidomoro. Muri aba harimo uwafashwe agerageza kurwinjiza muri gereza abanje ku rushyira mu kabido karimo amata, ku buryo uwamubonaga yashoboraga gukeka ko ariyo atwayemo.

Hari kandi uwafashwe yarafashe ikidomoro kinini kijyamo litilo 210 z’amazi, agitaba munsi y’uburiri, hejuru agerekaho umupfundikizo ku buryo uwahagera yagira ngo nta kintu kirimo.

Saidi Brazza naramuka ahamwe n’iki cyaha azahanishwa ingingo za 593 n’iya 594 zo mu gitabo cy’amategeko ahana, ashobora kuzahanishwa igifungo kuva ku mwaka 1 kugeza ku myaka 5 n’ihazabu iri hagati y’amafaranga 50 000Frw kugeza kuri 500,000 by’amafaranga y’u Rwanda.

Saidi Brazza yavukiye mu Rwanda i Huye , gusa umuryango we waje kwerekeza i Burundi mu mwaka wa 1959 ari naho se na nyina bapfiriye . Azwi cyane mu ndirimbo zamenyekanye mu karere nka Yameze amenyo, Twiganirira, Kugazaka n’izindi akaba amaze mu muziki imyaka 25.

Saidi Brazza yatahutse kuwa 11 Werurwe 2014, icyo gihe yabwiye IGIHE ko agiye gukomereza ibikorwa by’umuziki mu Rwanda. Yabanje kugorwa no kubona icumbi, i Nyamirambo mu gace ka Matimba aho yari acumbitse mu nshuti ze kubona ibyo kurya byari ingume.

Icyo gihe yadutangarije ko yashakishaga umugiraneza wamugoboka akemera kumucumbikira mu gihe cy’amezi make akaba ashakisha udufaranga two kwishyura ubukode bwe bwite.

Yari yiyemeje ko agiye gukorera umuziki mu Rwanda gusa nyuma y’igihe gito bahise bamujyana mu kigo ngororamuco cya Iwawa, nyuma yo kurangiza amasomo yahise yiha intego yo gufatanya na leta guca ibiyobyabwenge mu rubyiruko akoresheje umuziki ariko budacyeye kabiri afatwa mu babikoresha.

Urumogi Polisi yafatiye mu mukwabu
Saidi Brazza wamamaye i Burundi ari mu bafatiwe mu mukwabu w'ibiyobyabwenge
Saidi Brazza(ibumoso) ari mu bafashwe mu mukwabu Polisi yari imaze iminsi irindwi ikora
Saidi Brazza yari amaze igihe gito avuye kugororerwa i Iwawa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza