Safi wo muri Urban Boyz agiye kwiyamamariza kuba umudepite

Yanditswe na Munyengabe Murungi Sabin
Kuya 14 Kanama 2017 saa 04:45
Yasuwe :
0 0

Niyibikora Safi uririmba mu itsinda rya Urban Boyz yamaze kunoza umugambi ntakuka ko agomba kuziyamamaza mu bakandida bazahatanira kwinjira mu Nteko Ishinga Amategeko y’u Rwanda.

Safi Madiba amaze imyaka umunani akora umuziki ugezweho, mbere y’aho yabanje kuririmba muri korali zitandukanye mu Itorero ry’Abadiventisiti. Mu ntego yihaye nk’umunyamuziki w’umwuga, arashaka inzira zizamugeza mu Nteko Ishinga Amategeko y’u Rwanda akaba intumwa ya rubanda.

Mu kiganiro na IGIHE, Safi Madiba yavuze ko mu myaka itanu iri imbere yifuza ‘kuzaba ari umwe mu ntumwa za rubanda’. Kuva akibyiruka ngo yakuze yiyumvamo kuzaba umuntu uvugira abandi gusa amaze kuba umuhanzi ukomeye agenda arushaho kwiyumvamo ubushobozi.

Ati “Nifuza ko mu myaka itanu nzaba ndi umuntu ushobora kubwira abantu ikintu bakacyumva, ibyo rero numva binganisha muri politike. Mfite ibitekerezo bizima nifuza gusangiza Abanyarwanda biciye muri njyewe nk’umuyobozi. Numva mfite itekerezo byiza nshaka gutanga ariko mbivuze ndi umuhanzi abantu bakumva ko ari bya bindi by’abahanzi, niyo mpamvu nafashe umwanzuro wo kuba umudepite.”

Safi yongeyeho ati “Ibyo kuba umudepite njyewe namaze kubipanga, namaze kubyiyemeza kandi nzabikora. Mfite umudepite w’inshuti yanjye, narabimuganirije numva arabyumva neza ndetse angira inama y’uko nazabigenza.”

Mu kugisha inama umwe mu banyapolitiki bakomeye mu Rwanda, Safi ngo yabwiwe ko niba ashaka kuza umudepite akwiye kubitangira mbere y’uko abyinjiramo ndetse agatangira kwerekana ubushobozi afite mbere y’uko yiyamamaza.

Ati “Yambwiye ko niba nifuza kuzaba umudepite nahita mbitekereza ubu ndetse ngatangira kubyitoza. Nibinkundira nzaba umudepite mu myaka nk’itanu iri imbere cyangwa nibinashoboka nzinjire mu Nteko Ishinga Amategeko mbere y’uko tugera mu cyerekezo 2020.”

Safi Madiba wize iby’icungamutungo muri Kaminuza, yavuze ko afite ubushobozi n’ubumenyi buhagije muri politike ku buryo yumva aramutse ahawe umwanya akinjira mu Nteko Ishinga Amategeko nta kabuza yazagirira rubanda akamaro.

Ati “Nujuje ibyangombwa byose, umuntu watekereza ko ibi ntabishobora namubwira ko yibeshya cyane, mfite imyaka ibinyemerera, amashuri ndayafiye kandi niba hanakenerwa ayisumbuyeho cyane najya kongera ubumenyi usibye ko atari amashuri ayobora, ibitekerezo nibyo bya mbere kandi ndabifite.”

Uyu muhanzi ni ubwa mbere agiye kwinjira mu bya politike ndetse ni we muhanzi uri mu bakunzwe muri iki gihe mu Rwanda utangaje ko yifuza kwinjira mu Nteko Ishinga Amategeko.

Safi aramutse akomeje umugambi we yaziyamamaza mu matora y’Abadepite azaba mu mwaka utaha wa 2018.

Safi Madiba arifuza kwinjira muri politiki mu buryo bweruye nyuma y’uko hari abandi bahanzi bo muri Kenya, Uganda na Tanzania bahataniye imyanya mu butegetsi ndetse bakayibona.

Safi Madiba yatangaje ko yifuza kuzinjira mu Nteko Ishinga Amategeko

Umuhanzi Jaguar aherutse gutorerwa kuba umudepite muri Kenya, mbere ye mu mwaka wa 2015 umuraperi Professor Jay yatorewe kuba Depite w’agace ka Mikumi ko mu Ntara ya Morogoro, ari na ko yavukiyemo, yinjiranye mu Nteko Ishinga Amategeko n’umuraperi mugenzi we Joseph Mbilinyi [Sugu], umwe mu batangije Hip Hop muri Tanzania.

Mu minsi mike ishize umuririmbyi Bobi Wine yatsindiye kwinjira mu Nteko Ishinga Amategeko ya Uganda, ahagarariye agace ka Kyadondo East.

Jaguar aherutse gutsinda amatora yinjira mu Nteko Ishinga Amategeko ya Kenya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza