Ruremire yabwiye abagifite ipfunwe kwemera bagasaba imbabazi abarokotse Jenoside

Yanditswe na Munyengabe Murungi Sabin
Kuya 12 Mata 2018 saa 09:00
Yasuwe :
0 0

Focus Ruremire, umuhanzi umenyerewe ku ndirimbo z’umuco gakondo nyarwanda, yashishikarije abagifite ipfunwe ry’ibyo bakoze ko bakwiye kubohoka bagasaba imbabazi abarokotse Jenoside yakorewe Abatutsi.

Ruremire agiye kumara umwaka urenga yimukiye mu gihugu cya Finland mu Mujyi wa Vaasa. Yavuze ko muri iki gihe u Rwanda rwibuka ku nshuro ya 24 Jenoside yakorewe Abatutsi bikwiye kuba umwanya wo gusubiza amaso inyuma Abanyarwanda bakareba aho bavuye habi bityo bakabivomamo imbaraga zo gukora ibiteza imbere igihugu.

Yavuze ko aho u Rwanda rugeze “bikomeza guha uburyo imfubyi, abapfakazi n’incike kudaheranwa n’agahinda”. Yasabye abarokotse kudaheranwa n’agahinda ahubwo “bakagira ubutwari bwo guhindura ubuzima kugirango ababifurizaga kurimbuka buheriheri nkaho Isi ar’iyabo bakorwe n’isoni z’ ibibi byabo.”

Ruremire kandi yibukije abakoze jenoside bagifite kwinangira ko baca bugufi bagasaba imbabazi; by’umwihariko yashimangiye ko igihe kigeze ngo abagifite ipfunwe ry’ibyo bakoze muri Jenoside ko “batsinda ikimwaro bagasaba imbabazi”.

Yagize ati “Ndasaba abagize ipfunwe ry’ibyo bakoze ko batsinda ikimwaro bakagira ubutwari bwo gusanga abarokotse bakabahumuriza muri ibi bihe byo kwibuka na nyuma y’aho.”

Yongeyeho ati “ Ntekereza ko nta mpamvu n’imwe yatuma baheranwa n’ipfunwe kuko naryo ribuza umuntu amahwemo iyo ataryiyambuye. Twese turamutse dukomeje guhuriza hamwe mu kubaka ubumwe bwacu bwasenyutse biturutse ku nyigisho mbi, ejo h’abana bacu hazaba hazira ivangura iryo ari ryo ryose.”

Ruremire yasabye abanyarwanda guhagurukira icyarimwe bagahangana n’abakomeje gusakaza ibitekerezo bipfobya Jenoside yakorewe Abatutsi by’umwihariko bakibanda ku babikora baciye ku mbuga nkoranyambaga.

Yagize ati “Ihakana rya Genocide yakoreye Abatutsi rikorwa n’ abayigizemo uruhare, abo batoza n’ababiterwa n’inyungu zabo bwite ku mbuga nkoranyambaga nka Facebook n’izindi, basa n’abahawe ubuzima gatozi n’izo mbuga. Bityo abarokotse n’abatsinze ipfunwe n’urubyuruko muri rusange bafite ubushobozi bwo kurwana urwo rugamba batsindisha ukuri kw’ibyaye binyuze kuri izo mbuga na bo.”

Yashimye ubutwari bw’Inkotanyi ku bw’urugamba rukomeye zarwanye mu mugambi wo guhagarika Jenoside yakajije umurego guhera muri Mata 1994.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza