Rukundo Arnold wamamaye nka Shaffy yahagaritse gukina filime

Yanditswe na Muvunyi Arsène
Kuya 20 Kamena 2019 saa 08:51
Yasuwe :
0 0

Umukinnyi wa filime, Rukundo Arnold, wamamaye nka Shaffy yatangaje ko yasezeye muri uyu mwuga yari amazemo imyaka 11.

Shaffy ni umwe mu basore bamamaye cyane mu mwuga wa sinema mu Rwanda, haba mu kwandika no gukina.

Yatangiye kwamamara ubwo yandikaga akanakina mu yitwa “Ntaheze h’Isi” aho yakinnye yitwa Shaffy bikarangira iri zina abantu bakomeje kurimwita. Muri iyi minsi ari kugaragara mu yitwa “Umwanzuro” ica kuri Televiziyo y’u Rwanda.

Yatwaye ibihembo bitandukanye muri Rwanda Movie Awards nk’aho mu 2014 yatwaye igihembo cya Supporting Actor, ndetse yanayoboye ihuriro ry’abashoramari muri sinema.

Mu mugoroba wo muri kuri uyu wa Gatatu, nibwo yoherereje ubutumwa inshuti ze avuga ko asezeye mu mwuga wa sinema yari amazemo imyaka 11 ku mpamvu atasobanuye.

Yagize ati “Mfashe uyu mwanya ngo nshimire abafana banjye, abakunzi ndetse n’inshuti zanjye zambaye hafi mu rugendo rwo gukina filime kuva muri 2008 kugeza ubu 2019. Ndabashimira ku nama zanyu mwampaye, ibitekerezo byiza byubaka, rero kuva uyu munsi mpagaritse gukina filime ku mpamvu zitanturutseho.”

Uyu musore yatangaje ko iki cyemezo cye kizatangira gushyirwa mu bikorwa nyuma yo kurangiza gukina filime yitwa Umwanzuro inyura kuri televiziyo y’u Rwanda.

IGIHE yagerageje kumuvugisha ngo adusobanurire icyatumye asezera umwuga wa sinema ariko ntibyadukundira kuko telefone ye yari ifunze.

Shaffy asezeye umwuga wa sinema mu gihe hari hashize iminsi mike ashinjwa ubutekamutwe n’umwe mu bakobwa yari yemereye gukinisha muri filime ariko nyuma akaza kubaka amafaranga byavugwaga ko ari ay’amahugurwa.

Reba agace ka filime "Umwanzuro"


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza