Rubavu: Vanessa Musemakweri yegukanye irushanwa rya Miss Scandinavia 2018

Yanditswe na Mukwaya Olivier
Kuya 11 Nzeri 2018 saa 01:57
Yasuwe :
0 0

Vanessa Musemakweri, ukomoka mu Rwanda yahize abandi yegukanye irushanwa ry’ubwiza, Miss Scandinavia, ryari rimaze ukwezi ribera mu Karere ka Rubavu.

Muzima Coline Philomène, ukomoka mu Burundi, akaba yiga muri Kaminuza ya UTB, yabaye igisonga cya mbere naho Ntivuguruzwa Devothe wo mu Rwanda, aba igisonga cya kabiri.

Aya marushanwa yari agamije gutinyura abakobwa no kubafasha kwigirira icyizere, ategurwa na Scandinavia Group, ikora ibikorwa by’ubucuruzi mu Karere ka Rubavu n’ibindi bikorwa bitandukanye byo gushyigikira abakobwa.

Mu cyiciro kibanziriza icya nyuma, iri rushanwa ryitabiriwe n’abakobwa barimo abanyarwandakazi, abo muri Congo n’u Burundi.

Mu bakobwa umunani barushanwaga hatoranyijwemo batanu bavuyemo Nyampinga ubahiga. Ni mu birori byabaye ku cyumweru.

Muya Lauriane wateguye aya marushanwa akaba n’umuyobozi w’ibikorwa bya Scandinvia mu Rwanda, avuga ko ibihembo batanze bizafasha aba bakobwa kuko hari n’abazahabwa akazi.

Ati “Nyampinga yahawe igihembo cy’amafaranga ibihumbi 100, itike y’indege ijya Dubai yishyurirwe na hoteli icyumweru cyose. Azitabwaho n’inzu yongera ubwiza mu mwaka wose, azaba afite ikarita yo kwitwaza mu nzu y’imyidagaduro n’ibindi bikorwa byacu”.

Abamwungirije na bo bagiye guhabwa akazi mu serivisi zitandukanye Scandinavia Group igira muri Rubavu.

Nyuma yo kwegukana ikamba, Musemakweri urangije amashuri yisumbuye, yavuze ko yishimiye ikamba yambitswe kandi byamufashije kwigirira icyizere.

Ati “Ni ibintu byiza cyane bigiye kumfasha, namaze kwigirira icyizere mbifashijwemo n’ikigo nahagarariye. Ngiye gutangira imishinga igamije gutinyura urubyiruko, ndashimira abagiye banshyigikira.”

Thierry Paluku Kasongo umuyobozi mukuru wa Scandinavia ku Isi, avuga ko iki gikorwa cyagenze neza nkuko yabyifuzaga kandi kije gisanga n’ibindi bakora bagamije gushyigikira Perezida Paul Kagame mu guteza imbere abanyarwanda by’umwihariko abagore.

Ati “Turashimira Nyakubahwa Perezida Paul Kagame, tumufata nk’icyitegerezo. Nishimiye gukorera inaha ubucuruzi kuko dufite ubuyobozi bwiza, umutekano n’ibindi bituma dukora neza tukanatekereza bigakunda”.

Ubuyobozi bwa Scandinavia butangaza ko iki gikorwa ari ngarukamwaka kandi iby’ubutaha bizarushaho gutegurwa mu buryo bwagutse ndetse akarushaho kuba mpuzamahanga, ari nako abatorwa bagira amahirwe yo kugera henshi ku Isi.

Paluku Thierry umuyobozi mukuru wa Scandinavia Business ltd ashyikiriza icyangombwa Nyampinga wa yo 2018 Vanessa Musemakweri
Nyampinga wa Scandinavia n'ibisonga bye
Muya Lauriane yambika ikamba Nyampinga Musemakweli Vanessa
Paluku Thierry ari kumwe n'abegukanye ibihembo muri Miss Scandinavia
Paluku avuga ko yiyemeje gufasha Perezida Kagame guteza imbere abagore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza