Royal Fm yabyukije irushanwa ry’abanyempano ryari rimaze igihe nta kanunu, ishoramo miliyoni 23 Frw

Yanditswe na Uwiduhaye Theos
Kuya 8 Kanama 2019 saa 08:13
Yasuwe :
0 0

Radio iri mu zifite abakunzi benshi mu Rwanda ya Royal Fm, yongeye kubyutsa irushanwa ry’abanyempano rya ‘Talent Zone’ ryari rimaze umwaka rihagaze.

Iri rushanwa rigamije gufasha urubyiruko rufite impano zitandukanye rizanatangirwamo ubutumwa burufasha kwigobotora ibibazo bya buri munsi ukibyiruka ashobora guhura nabyo birimo gutwita atabiteguye, kunywa ibiyobyabwenge, ihohoterwa n’ibindi.

Rizanyura mu ntara enye z’igihugu risorezwe mu Mujyi wa Kigali. Rizatangira ku wa 10 Kanama risozwe ku wa 12 Ukwakira 2019. Buri ntara izatoranywamo abanyempano batatu mu gihe mu Mujyi wa Kigali bazaba ari 15 bazaza bongera umubare bose hamwe babe 27 bazarushanwa ku wa 05 Ukwakira 2019.

Muri 27 hazavamo 6 bazagera mu cyiciro cya cyuma. Mu cyiciro cyo kubyina, muri buri Ntara hazavamo umwe, Umujyi wa Kigali uzahagararirwa n’amatsinda ane. Bivuze ko kuri ’final’ hazigaragaza amatsinda 8. Mu cyiciro cyo kubyina bagomba kuba bari hagati y’abantu 5 na 10.

Mu nshuro zabanje hagiye harushanwa abaririmbyi n’ababyinnyi kuri iyi nshuro hazarushanwa abanyempano mu itangazamakuru no kubyina.

Jackie Lumbasi uyobora Royal FM yatangaje ko impamvu iri rushanwa ryari rimaze igihe ritaba ari uko bashatse kubanza kuryagura no kongeramo ibihembo kugira ngo benshi bagaragaze impano zabo bibagirire akamaro.

Iri rushanwa ku wa 10 Kanama 2019 rizatangirira i Kayonza kuri Silent Hill Hotel, ku wa 17 Kanama 2019 rikomereze i Musanze kuri Maison des Jeunes, ku wa 18 Kanama 2019 ribere i Rubavu kuri Vision, ku wa 24 Kanama 2019 i Huye kuri Maison des Jeunes.

Rizakomeza mu Mujyi wa Kigali ku wa 07 Nzeri 2019 i Nyarugenge kuri Maison des Jeunes (Kimisagara), ku wa 14 Nzeri 2019 ku Kicukiro mu Gatenga kwa Gisimba no ku wa 21 Nzeri 2019 kuri Club Rafiki i Nyamirambo. Kwiyandikisha mu irushanwa uhamagara izi nimero 078 0 65 93 51.

Amajonjora y’ibanze azaba ku wa 05 Ukwakira 2019 i Nyamirambo kuri Club Rafiki. Ku wa 05 kugeza ku wa 10 Ukwakira abanyempano bazajya bagaragaza icyo bashoboye hifashishijwe iyi radiyo.

Ku wa 12 Ukwakira 2019, niwo munsi wo guhemba abazaba bahize abandi. Uzagaragaza impano n’ubuhanga mu itangazamakuru azahabwa amasezerano y’akazi kuri Royal FM ivugira kuri 94.3.

Uwa mbere mu bazarushanwa mu by’itangazamakuru azahembwa 300, 000 Frw naho uwa kabiri ahabwe 200, 000 Frw. Itsinda rya mbere mu kubyina rizahembwa 1,000,000 Frw. Naho uwa mbere mu kubyina ahabwe 500,000 Frw naho uwa kabiri ahembwe 300,000 Frw.

Iri rushanwa rigitangira ryafashije benshi mu kugaragaza impano zabo ku buryo n’ubu hari abo ryabereye urutindo rwabagejeje ku rundi rwego mu muziki. Umwe muri bo ni uwitwa Mozzy wahoze mu itsinda rya Yemba Voice.

Jackie Lumbasi uyobora Royal FM yavuze ko impamvu irushanwa rya Talent Zone ryari ryarahagaze ari uko hari ibyo bashakaga kongeramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza