Riderman yashinje Asinah gushaka kumusenyera urugo

Yanditswe na Nsengiyumva Emmy
Kuya 11 Nzeri 2019 saa 02:53
Yasuwe :
0 0

Gatsinzi Emery wamenyekanye nka Riderman yashinje Asinah bahoze bakundana gushaka kumusenyera urugo, yifashishije bimwe mu bitangazamakuru n’imbuga nkoranyambaga bimuha umwanya agatangaza ibihuha bibangamiye urugo rwe.

Riderman na Agasaro Nadia bakoze ubukwe mu 2015 ndetse bamaze kwibaruka umuhungu wabo w’imfura. Uyu muraperi yakoze ubukwe bitungura benshi bari bazi ko umukunzi we ari Asinah bari bamaze imyaka umunani bakundana. Ibi byabaye inkuru n’ubu zigikomeje gukururana, hagatindwa ku bihe bagiranye hanibazwa icyabatandukanyije.

Mu gihe imbuga nkoranyambaga nka YouTube zimaze gufata indi ntera, Asinah akunze kugarukwaho mu biganiro binyuranye atanga cyangwa se mu binyamakuru bimwe na bimwe, ibintu bidashimisha Riderman na mba.

Mu kiganiro Amahumbezi cyatambutse kuri Radio Rwanda, Riderman yatangaje ko akenshi iyo abonye ibintu yanditsweho ahita abisobanurira umugore we, mu gucubya ubukari bishobora kumutera.

Ati “Sinjya ndindira ko arakara cyangwa se abimenya, iyo mbibonye ndi mu rugo cyangwa se ntahari, ndataha nagera mu rugo nkamwegera nkamubwira nti ’nabonye banditse gutya na gutya, ndatekereza ko nawe byakugezeho ariko mu by’ukuri ukuri ni ukunguku.”

Yavuze ko hari umunyamakuru w’inshuti ye yigeze kuganiriza amubaza impamvu akunda kuzamura ibibazo bye na Asinah, ngo amubwira ko abantu bakunda byacitse ku buryo bituma ikiganiro cye kirebwa cyane.

Ati “Rimwe na rimwe rero aho kugira ngo ubigire intambara ujye guhangana n’umuntu, mpitamo kwicecekera nkabireka kuko nizera ko nta nkuru iza gutya ngo irenze icyumweru ikivugwa cyane gutyo, ahubwo iraza igahita.”
Riderman yabajijwe niba adasanga aba bamukoraho ibiganiro bagamije kumucuruza, we avuga ko asanga birenze ibyo.

Ati “Biba bimeze nko gushaka gusenya urugo rw’umuntu. Ariko nizerera mu kintu kivuga gutya: Uyu munsi ushobora gushaka kuntamika urusenda, njyewe nkabyakira nkageraho nkarumenyera. Ariko se umunsi wowe ruzakugeraho witeguye kururya? Sinjye uzarumutamika, Abanyarwanda baravuga ngo gira neza wigendere. Uyu munsi ushobora kumva ko wagize nabi nta kibazo, ariko ntuba uzi ikiri imbere.”

Riderman yavuze ko abakomeza kuzamura izo nkuru bagamije ubuhemu, kuko hari ibindi bintu byinshi baganiraho kurusha kuzamura inkuru ze na Asinah.

Ati “Itangazamakuru ni umwuga wubashywe ku Isi ndetse no mu Rwanda. Hari abahanzi baba batahawe ijambo, kuki hahora hagaruka umuntu umwe buri munsi kandi avuga ibintu bimwe n’ubundi?”

Yakomeje abwira umunyamakuru ati “Uri inshuti yanjye! Hari umunsi nari nagusaba kumpa ikiganiro nta ndirimbo cyangwa igikorwa mfite? Kandi ntekereza ko nta muntu wagahawe uwo mwanya nta gikorwa agiye kuvugaho. Byanze bikunze nawe nk’umunyabwenge ushobora kuvuga uti ’kuki uyu muntu?’”

Abajijwe niba akeka ko Asinah ajya ajya kwisabira ibiganiro ngo bamuvugeho, Riderman yasubije ko atazi uko bigenda, ariko ngo ibitangazwa byose nta n’ukuri kuba kurimo.

Yakomeje ati “Gusa nshima Imana ko urugo rwanjye rukomeye, Imana iraturinze, Imana iri kumwe natwe kandi nta n’ikintu kizarusenya uko mbitekereza.”

Yavuze ko buri wese afite uburenganzira bwo kuvuga ibyo ashatse, ariko akomoza ku mvugo y’uko "Isi ntabwo igirwa nabi n’abakora ibibi gusa ahubwo igirwa nabi n’ababona ibibi biba bakicecekera," ashimangira ko abantu badakwiye kubona ibinyoma bivugwa ngo babireke bigende gutyo.

Riderman arashinja abanyamakuru guha umwanya umuntu uvuga amagambo agamije kumusenyera urugo
Riderman ahamya ko ashimira Imana ikimurindiye urugo kandi akizera ko rutazigera rusenyuka
Riderman yeruye ahamya ko ibiganiro Asinah atanga mu bitangazamakuru biba bigamije kumusenyera urugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza