Platini yahishuye uko kuririmba wenyine byamuteye ubwoba kugeza ubwo yanga kwiyitirira indirimbo

Yanditswe na Nsengiyumva Emmy
Kuya 28 Mutarama 2021 saa 01:08
Yasuwe :
0 0

Umwaka urirenze Nemeye Platini atangiye urugendo rushya rwo gukora umuziki wenyine nyuma yo gutandukana na TMC bahoranye mu itsinda rya Dream Boys.

Uyu musore utangiye kwigarurira abafana ku giti cye, yavuze ko agitangira yagize ubwoba, yumva ko atazabishobora.

Ibi yabikomojeho mu kiganiro cyihariye yahaye IGIHE, ubwo yari abajijwe niba mu gutangira urugendo rwe rushya atarigeze abona abantu bamuca intege.

Platini yavuze ko atari benshi yahuye nabo ngo bamuce intege ahubwo we ku giti cye yagize ubwoba ashaka no kubireka.

Yatanze urugero rw’indirimbo ‘Yamotema’ yakoranye na Nel Ngabo. Yatangiye ari iye wenyine ariko agira ubwoba bwo kwikorana umuziki ahitamo gushyiramo uyu musore wari mushya muri KINA Music.

Indirimbo imaze gukorwa, Platini yanze ko bayimwitirira kuko atari azi neza uko iri bwakirwe. Nguko uko yasohotse yitiriwe Nel Ngabo.

Ati “Umunsi umwe narindi muri studio, njye na Ishimwe Clement dukorana indirimbo ‘Ya motema’, yari iyanjye gusa. Nakomeje kwibaza uko abantu bazayakira, nanga kuyisohora, byaje kuba ngombwa ko kugira ngo isohoke tuyishyiramo Nel Ngabo turanayimwitirira.”

Uyu muhanzi avuga ko yatunguwe bikomeye n’uburyo iyi ndirimbo yakiriwe neza ikimara kugera hanze.

Nyuma y’iyi ndirimbo, Platini afatanyije na Ishimwe Clement bakoze indi ndirimbo bise ‘Fata amano’. Kutigirira icyizere byatumye uyu muhanzi ajya kumvisha uyu mushinga inshuti ye Safi Madiba.

Safi Madiba waryohewe n’iyi ndirimbo yahise amusaba ko bayikorana. Platini nanone wari ubonye aho ahisha izina rye yabyakiranye yombi birangira bayikoranye.

Iyi nayo ntabwo yahise imutinyura, nyuma yo kumva indirimbo ’Belle’ Davydenko yakoreye Dj Miller, Urban Boys na Peace Jolis, Platini yahisemo kugana uyu mu-producer ngo bakorane.

Kwa Davydenko, Platini avuga ko yahakoreye indirimbo zirenga eshanu ariko amahitamo akamugora kubera ko yari atariyakira.

Muri izi ndirimbo yakuyemo iyitwa ‘Veronika’ ayumvisha Ishimwe Clement ngo amwumvire uko bimeze.

Ishimwe Clement yamubwiye ko niba atiteguye no kuyirangiza, we yakora ibishoboka byose ikarangira ndetse igasohoka kuko ari indirimbo idasanzwe.

Platini utari unyuzwe neza, yayumvishije itsinda ry’ababyinnyi be na bamwe mu bafana be b’imena bose barayikunda.

Bose bamaze kumushimira iyi ndirimbo, ngo yafashe icyemezo cyo gusohora indirimbo ya mbere ari wenyine, nubwo nabwo ubwoba bwari bwose.

Imaze gukundwa byaramutinyuye atangira gukora izindi ndirimbo zirimo na ‘Ntabirenze’ yakoranye na Butera Knowless.

Uyu munanzi yahise yanzika, akora izindi ndirimbo zinyuranye zirimo ‘Atansiyo’ na ‘Helena’ yafatiye amashusho i Dubai ari nazo aherutse gusohora.

Uyu muhanzi avuga ko kugira ngo yemeze indirimbo asohora abanza kugisha inama abantu batandukanye, barimo ikipe ya KINA Music, Ababyinnyi be ndetse na murumuna we utazi cyane ibya muzika.

Ikiganiro cyihariye na Nemeye Platini

Mu ndirimbo, dusubize amaso inyuma ku muziki wa Platini mu mwaka amaze yikorana

Ishimwe Clement ni umwe mu babaye hafi Platini ubwo yatangiraga kwikorana umuziki
Nemeye Platini ahamya ko mu rugendo rwe rwa muzika nta muntu wigeze amuca intege, we ubwe ntacyo yari yifitiye
Nemeye Platini aherutse gusohora indirimbo 'Helena' yafatiye amashusho yayo i Dubai

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .