Phocas Fashaho yavuze icyatumye amara imyaka irenga 20 adakora umuziki

Yanditswe na Munyengabe Murungi Sabin
Kuya 15 Gicurasi 2017 saa 01:11
Yasuwe :
0 0

Umuririmbyi wubatse amateka akomeye mu myaka yo hambere, Phocas Fashaho yongeye gusubukura ibikorwa by’umuziki ndetse ubu yashyize hanze indirimbo nshya nyuma y’uko hari hashize imyaka irenga 20 asa n’uwabishyize ku ruhande.

Phocas Fashaho wakoreye igihe kinini Radio VOA, yamamaye cyane mu myaka 30 ishize binyuze mu ndirimbo yahimbye n’ibitaramo yakoraga afatanyije n’itsinda baririmbanaga. Izina rye ryinjiye mu mitima ya benshi mu 1990 biciye mu ndirimbo ‘Ishiraniro’ yakundwakajwe kubera ubutumwa bwihariye n’injyana icuranzemo.

Uyu muhanzi uri mu kigero cy’imyaka 50 asanzwe afite indirimbo yitwa ‘Ishiraniro’ iherutse gusubirwamo na Daddy Cassanova ikongera igakundwa. Yavuze ko agiye kongera guhanga ndetse agakora umuziki awushyizeho umutima akamara ipfa abakunze inganzo ye mu myaka yo hambere.

Ubu Phocas Fashaho yashyize hanze indirimbo nshya yise ‘Ndiho Ntariho’, yayihanze nyuma y’uko yaherukaga muri studio mu mbere gato y’umwaka wa 1994. Iyi yayikoreye muri Amerika muri Leta ya Maryland mu gace kitwa Germantown ari naho atuye.

Mu kiganiro na IGIHE, Phocas Fashaho yasobanuye ko iyi ndirimbo yatunganyijwe na Producer w’umuhanga cyane witwa Jaja Bashengezi ukorera muri studio ye bwite ya RFK Productions.

Yasobanuye ko yari amaze imyaka irenga 20 adakora umuziki nyuma y’uko yaciwe intege na Jenoside yakorewe Abatutsi mu 1994, icyo gihe ngo nibwo yari yabonye ubushobozi yinjiye muri studio gutunganya album ye ya mbere.

Yagize ati “Nari naracitse intege kubera ko Jenoside yakorewe Abatutsi mu 1994 yatangiye ari bwo nkibona amafaranga yo kujya gukora album yanjye ya mbere muri studio, byose bihita bipfa narimaze gutangira imishinga y’indirimbo ebyiri cyangwa eshatu gusa.”

Fashaho yongeye gukora indirimbo nyuma ya 'Ishiraniro' yakunzwe mu myaka ya 1990

Yongeraho ati “ Nageze aho nza ino[muri Amerika] aha kwiga, mpita mbona ikiraka kuri Radio VOA, nyuma kivamo akazi gahoraho, umwanya ubura utyo. Ibyo byose rero byarangiye numva nkuze, iyo jugujugu ntakiriyirimo. Ariko narabitekerezaga, nkabura gusa ikintera akanyabugabo.”

Fashaho yavuze ko afite indi mishinga myinshi y’indirimbo azakomeza gukora nyuma y’iyi nshyashya yashyize hanze.

Phocas Fashaho agiye gushyira hanze izindi ndirimbo amaze iminsi yandika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza