PGGSS: Uncle Austin yagiye kuririmba i Musanze avuye mu bitaro

Yanditswe na IGIHE
Kuya 2 Kamena 2018 saa 09:54
Yasuwe :
0 0

Uncle Austin, umuhanzi mushya mu bahatanira irushanwa rya Primus Guma Guma Super Star, yagiye kuririmba mu gitaramo cyabereye mu Mujyi wa Musanze avuye mu bitaro ibintu avuga ko byamuhungabanyije cyane.

Igitaramo cya kabiri cya Primus Guma Guma Super Star 8 cyabereye mu Mujyi wa Musanze kuri uyu wa Gatandatu tariki ya 2 Kamena 2018, cyitabiriwe n’abahanzi icumi barimo na Uncle Austin waje afite arwaye.

Mu kiganiro na IGIHE, Uncle Austin yavuze ko ubu burwayi yari abumaranye ibyumweru bigera kuri bibiri; byatangiye agira umuriro mwinshi ubundi akaribwa mu muhogo ndetse n’ijwi ntirisohoke neza. Yagiye kuririmbira i Gicumbi afite ikibazo cyo gusarara gusa ntibyamubujije kwitwara neza.

Mu gitaramo cyabereye mu Mujyi wa Musanze, Uncle Austin yagiyemo amaze amasaha make avuye kwa muganga ndetse ubu bamwandikiye ibyumweru bibiri by’ikiruhuko n’imiti.

Yagize ati “Nari maze iminsi ndwaye, no mu cyumweru gishize nari ndwaye ariko ubu noneho malaria yazanye ubukana bwinshi. Ubu ntangiye gukira, mbere yo kuza kuririmba hano nabwo nagiye mu bitaro.”

Uncle Austin ufite indirimbo ikunzwe cyane mu bice by’icyaro yitwa ‘Everything’ yakoranye na Meddy, yemeje ko icyamwongereye kunanirwa k’umubiri ahanini ari uburyo yakoresheje imbaraga nyinshi mu kwitegura igitaramo cyabereye i Gicumbi.

Yavuze ko yatangiye gufata imiti neza abaganga bamwandikiye ndetse ko nyuma y’igitaramo cya Musanze agiye guhita afata ikiruhuko kugira ngo azitabire ibindi bitaramo ameze neza.

Ati “Abaganga bampaye imiti, ubu mfite ibyumweru bibiri byo kuruhuka, nzamara icyo gihe nta bindi mfite nkora. Nkeneye kujya mu rugo nkaryama nkaruhuka, ndumva nzaba meze neza mu minsi nk’itatu cyangwa itanu.”

Uncle Austin, ni umwe bahanzi bahataniye Primus Guma Guma uyu mwaka, ahatanye na Christopher, Bruce Melody, Mico The Best, Khalfan, Jay C, Queen Cha, Young Grace, Just Family ndetse na Active.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza