Passy wahoze muri TNP yasubukuye umuziki akorana na Knowless (Video)

Yanditswe na Dusabimana Aimable
Kuya 18 Gicurasi 2018 saa 03:34
Yasuwe :
0 0

“Passy” Kizito, umwe mu bari bagize itsinda TNP yasubukuye ibikorwa by’umuziki nk’umuhanzi wigenga ahera ku mikoranire mishya mu ndirimbo yahuriyemo na Knowless ubarizwa muri Kina Music.

TNP yashinzwe n’abasore batatu ari bo Traccy, Nicholas na Passy, bayita gutyo bagendeye ku nyuguti zitangiza amazina yabo. Iri tsinda ryamenyekanye cyane mu ndirimbo nka ‘Kamere,’ ‘Imisozi n’Ibibaya,’ ‘Kamucerenge,’ ‘Ndamburiraho Ibiganza’ bakoranye na Knowless n’izindi ryasenyutse mu 2017.

Passy uri mu bari barigize yubuye ibikorwa by’umuziki mu ishusho nshya awutangira nk’umuhanzi wigenga. Yabwiye IGIHE ko yari amaze igihe ahugiye mu gusoza ishuri gusa kuri ubu akaba yaramaze kurangiza amasomo ya kaminuza ari nabyo byatumye ahitamo kwiyegurira umuziki byuzuye.

Yagize ati “Umuziki nawugarutse, ntabwo nari naranawuvuyemo ni uko nari mpugiye mu ishuri […] Ndakeka ubu mfite umwanya, akazi nkora ntabwo kambuza gukora umuziki.”

Passy yasoje amasomo mu ishami ry’Itumanaho n’Itangazamakuru muri Kaminuza ya Mount Kenya, Ishami rya Kigali. Uyu musore umaze igihe akora ikiganiro cyitwa “90 degrees” kuri Televiziyo y’u Rwanda, yavuze ko agiye kujya afatanya akazi k’itangazamakuru akora n’umuziki buri kimwe akagiharira umwanya wacyo ukwiye.

Uyu musore avuga ko kugeza ubu ahanze amaso “iyi ndirimbo no ku yindi mishinga iri imbere” kuko atazi icyo imbere hahishe ku bijyanye no kuba itsinda rya TNP ryazuburwa rigakomeza imikorere cyangwa ntiryongere kubaho.

Ati “Ntabwo navuga ko nzi ibiri imbere gusa kugeza ubu ni Passy nshaka guteza imbere, mu byo nkora izina ryanjye niryo nshyize imbere. TNP iramutse igarutse nabyo twabibamenyesha, ariko kugeza ubu ndi kwibanda ku mishinga yanjye ndi gukora.”

Passy avuga ko ubu ahanze amaso imbere hazaza nk'umuhanzi wigenga

Yavuze ko indirimbo nshya yakoranye na Knowless yitwa ‘Mbaye Wowe’ ikubiyemo ubutumwa bwo guhumuriza umukunzi ufite icyizere kidahagije mu rukundo ukamubwira ko umukunda kurushaho cyane ko muri iki gihe “kwizerana byuzuye biboneka hake.”

Passy avuga ko nubwo ari Kina Music yamufashije kuri uwo mushinga bataragirana amasezerano y’imikoranire yakwemeza ko ayirimo. Yongeyeho ko kuva kera aba afite ibihangano byinshi ku buryo mu bihe biri imbere nyuma y’uko abantu bamenye ko yagarutse azahita yanzika n’ibindi bikorwa byinshi.

Passy yakoze indirimbo ya mbere nk'umuhanzi wigenga ari kumwe na Knowless wo muri Kina Music

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza