Pasiteri Mpyisi yashimiye umupfumu Rutangarwamaboko warongoje umwishywa

Yanditswe na Munyengabe Murungi Sabin
Kuya 3 Kanama 2017 saa 10:23
Yasuwe :
0 0

Pasiteri Ezra Mpyisi umwe mu bakomeye mu Itorero ry’Abadiventisiti, aherutse gutaha ubukwe bwavugishije benshi bw’umupfumu Rutangarwamaboko Modeste Nzayisenga warongoye ku itariki ya 30 Nyakanga 2017.

Rutangarwamaboko Modeste Nzayisenga yarongoye Umuziranenge Sana Cynthia, bakoze ubukwe bwihariye bwaranze n’ibirori byuje udushya tutamenyerewe mu bukwe bw’iki gihe.

Ubukwe bwabo bwabereye mu Ntara y’Amajyepfo mu Bibungo bya Mukinga i Nyamurasa ho mu Karere ka Kamonyi ari naho uyu mupfumu avuka. Ibyo bakoze bihabanye cyane n’imigendekere y’ubukwe bwo mu Rwanda rw’ubu kuko bwari bwiganjemo imigenzo n’imihango ya Kinyarwanda mu ishusho y’uko byagendaga hambere.

Ubukwe bwa Rutangarwamaboko[usanzwe ari umupfumu uzwi akaba n’umuganga gakondo ukoresha imbaraga z’abakurambere n’ibyatsi bya cyimeza] bwaranzwe n’udushya tudasanzwe uhereye ku myambarire y’abageni, uko ibirori byagenze no ku mafunguro ndetse n’ibyo kunywa biyakirije.

Mu bazwi batashye ubu bukwe harimo Pasiteri Ezra Mpyisi wigishijemo ijambo ry’Imana nubwo bwateguwe n’umupfumu ndetse agakora imigenzo ihabanye n’ibisanzwe biranga ubukwe bwa gikirisitu.

Mu kiganiro n’Ibyishimo, Pasiteri Mpyisi yashimye ubukwe bwa Rutangarwamaboko kuko ngo bwari bwujuje ibyangobwa bikwiye kuranga ubukwe bw’Umunyarwanda wubaha akanakurikiza umuco gakondo.

Yavuze ko nta cyaha abibonamo kuba Rutangarwamaboko yarahisemo kwambika umugeni we icyatsi cyitwa ‘umwishywa’ mu cyimbo cy’impeta ikoreshwa guhera nyuma y’umwaduko w’abazungu.
Kuri Pasiteri Mpyisi kwambikana impeta cyangwa umwishywa byose ngo ni ibyo abantu bihimbiye bitewe n’umuco wa buri gihugu ndetse ngo byose ntaho bihurira n’Imana.

Impeta n’umwishywa byose si iby’Imana

Pasiteri Mpyisi asanga uko ubukwe bwakorwa kose hakurikijwe umuco w’ahantu runaka ntacyo bivuze kuko ibyo Imana itabirebaho ahubwo isaba abashakanye gukundana bisabwa umugabo n’umugore kuko ngo kwambikana impeta cyangwa umwishywa byose atari umuco w’Imana.

Ati “Kera ntitwarongoraga? Udasambanye ukarongora umugore wawe […] Buriya ni umuco w’i Rwanda, none se gushyingira kwa gikirisitu bashyingira bate? Hari ikintu cyitwa umuco hari n’icyaha, abakirisitu barongoza impeta, impeta ni ubukirisitu? Abandi na bo bahanye igihango bakoresha umwishywa; ubwo mutandukaniye he se?”

Yakomeje agira ati “Igihe Imana yashyingiraga Adamu na Eva yari ifite impeta? Yari ifite umwishywa? Yari ifite twa twenda bambara? Hari urusengero bagiyemo? Bivuze ngo umwishywa, impeta byose ni ubusa. Icyo Imana yavuze ni ukuvuga ngo uyu ni umugore wawe, uyu ni umugabo wawe kandi ibi ni byo nahavugiye.”

“Nabwirije ubutumwa ngaragaza ko impeta n’umwishywa no kujya mu rusengero atari byo Imana yavuze, byose ni ibihimbano abantu bihimbiye, gushyingira kw’Imana ni uko umenya ko uyu ari umugore wawe uyu akaba umugabo wawe mukabana amahoro ntimuryane nk’uko ab’isi baryana”.

Pasiteri mu bukwe bw’umupfumu?

Pasiteri Mpyisi avuga ko icyari kimujyane ari ukuhavugira ubutumwa bwiza akabwira abari bahari ko Yesu ari umucunguzi w’abamwera bose. Avuga ko yishimiye ko bakoresheje umuco nyarwanda ariko byanamubereye umwanya wo kubereka umuco w’Imana uwo ari wo.

Ati “Ujye muri bo ubereke ko ibyo byabo! Ni umuco w’i Rwanda, uw’Imana ni uyu nguyu, abajya mu kiliziya ni umuco w’Abayuda, iby’Imana ni ibi. Narahagiye nkora icyanjyanye.”

Mpyisi watashye ubu bukwe, mu mwaka ushize wa 2016 yanze gusezeranye Producer Clement na Knowless kuko ’uyu muhanzi yari atwite’.

Ubukwe bwa Rutangarwamaboko bwari umwihariko

Umugeni bamushyize ku bitugu bamuheka mu ngobyi bamujyana kwa Rutangarwamaboko nk’uko byagendaga hambere umuco nyarwanda ugifite umwimerere utavanzwemo iby’ikizungu nk’uko bigenda mu bukwe bw’iki gihe.

Imyambarire yabo nayo yari ishamaje kuko Umuziranenge Sana Cynthia yari yatunganyije imisatsi ye mu buryo bushushe nk’uko bogoshaga amasunzu umukobwa ugiye kurongorwa.

Ibyo bafunguye mu birori byo kwakira abashyitsi byari umwihariko, bariye amateke, ibihaza, imyumbati n’ibishyimbo byaruriwe ku nkoko[soma inkooko]. Ibyo kunywa nabyo byari byiganjemo ibyenzwe mu buryo bwa gakondo nk’ikigage, urwagwa n’umusururu udasembuye ku batanywa ibisindisha.

Abageni bakoze agashya babega umutsima wa rukacarara[umutsima w’amasaka] ukurungiye ku nkoko mu gihe abategura ubukwe mu buryo bw’igisirimu muri iyi minsi ya vision bo bifashisha umutsima wa kizungu[gateau] barangiza bakawutaka mu mabara anyuranye mu buryo bwo kuryoshya ibirori.

Mu kwiyakira bariye rukacarara n'andi mafunguro gakondo arimo ibihaza n'imyumbati
Umugeni wa Rutangarwamaboko bamuhetse mu ngobyi nk'uko byagendaga hambere
Umuziranenge Sana Cynthia yambitswe umwishywa nk'uko byagendaga hambere
Bagiye i Nyanza mu Rukari bahafatira amafoto

Rutangarwamaboko ubwo yasezeranaga imbere y’amategeko


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza