Parfine yasobanuye inkomoko y’umujinya wabyaye ibitutsi kuri Safi

Yanditswe na Munyengabe Murungi Sabin
Kuya 4 Ukwakira 2017 saa 10:25
Yasuwe :
0 1

Ibya Safi na Parfine byatangiye biryoshye, ubu byabaye umuravumba! Umuririmbyi Kitoko Bibarwa muri Rurashonga we yateruye agira ati ‘urukundo burya ni nka bombo isaza ishonga, urukundo burya ni nk’isabune isaza ishonga’, yahanze afite ishingiro ushingiye ku nkuru ya Safi.

Niyibikora Safi Madiba aherutse kurushingana na Niyonizera Judith, byavuzwe ko bari bamaze amezi ane bakundana gusa nyuma y’ubukwe bakoze kuwa 1 Ukwakira 2017 byahishuwe ko urukundo rwabo rwari rumaze umwaka n’imisago.

Safi Madiba yarushinze nyuma y’ukwezi kumwe gusa atandukanye na Umutesi Parfine [bari bamaranye imyaka ibiri n’imisago]. Kuri ubu Parfine yashaririwe ndetse kuri uyu wa Kabiri hasakaye ijwi rye avugana umujinya ndetse atuka Safi na bagenzi be abita ‘abasambanyi bakunda amafaranga y’abagore ba Diaspora’.

Mu kiganiro IGIHE yagiranye na Parfine, yahamije ko ijwi rye ryasohowe n’umugore w’inshuti ye nyuma y’ikiganiro bagiranye kuri WhatsApp basangira agahinda bombi barimo. Uyu mugore [bivugwa ko aba i Dubai] yaririraga Parfine amubwira ko umukunzi we yamutaye akajya kwambika indi nkumi impeta hanyuma Parfine na we agarura ibye na Safi, uko umujinya wagiye uzamuka byaje kumunanira avuga ibitutsi n’andi magambo akomeye.

Yagize ati “Uwo mwumva muri iryo jwi ni njyewe, ntabwo iryo jwi ryari rigamije kujya hanze. Naganiraga n’umugore w’inshuti yanjye, twaganiriye asanga hari amakuru namenye atari meza nawe anzanira andi atari meza noneho bihurirana n’uko na we ibyambayeho byari bimubayeho. Yari afite umusore azi ko bakundana hanyuma yambika impeta undi mukobwa. Ibyo ni ibiganiro twagiranye, nasubizaga, nari mu kiganiro. Ntabwo nari ngamije kubishyira hanze ahubwo ni kwa kundi uganira n’inshuti ukirekura yarangiza akagushyira hanze, yampaye ibisobanuro ariko we mu mutima azi impamvu yatumye abishyira hanze.”

Parfine yavuze ko icyamushaririye kigatuma atuka Safi ngo ni uko yari amaze kubwirwa amakuru mashya ko ‘yari amaranye na Judith umwaka n’igice’ kandi ngo muri icyo gihe cyose bafatanyaga muri byose bitegura ahazaza h’urugo bifuzaga gushinga.

Yagize ati “Mu rukundo habamo ibintu byinshi, abari guhererekanya izi audios muranzi, muzi ko nakundanye na Safi kandi abenshi muri mwe ni ababirwanyije. Nakundanye na Safi imyaka itatu, twabanye neza, twagize ibihe byiza ariko twagize n’ibibi ari nabyo byatumye dutandukana. Twakomeje kuba inshuti, nta mahane ndetse nari natangiye gushaka uko mbashakira akazi hano bakaza kuririmba, murumva ko twari dutangiye gushaka uko twakomeza kubana neza.”

Yongeraho ati “Icyasembuye byose bigatuma ndakara nkavuga nabi ni amakuru nari namenye by’uko Safi n’uriya mugore bari bamaranye umwaka n’igice. Muri uwo mwaka n’igice narebye imbaraga nataye, ibyanjye nashyizeho, haba kuri roho cyangwa ku mubiri numva birandakaje ariko atari mu rwego rwo gufuha kuko ntacyo nafuhira murabibona.”

“…Wumve ko na nyuma twahise tujyana i Dubai kuko twarimo dupanga imishinga ikomeye irimo n’ubukwe; nibutse ukuntu izo nshuti za Safi zabimpishaga kandi zizi ko ambeshya, nkibuka n’ukuntu Safi yadukinishaga twembi njye n’uwo mukobwa numva ndarakaye.”

Parfine Umutesi yasabye imbabazi abumvise iri jwi rye. Ati “Ni umujinya wazamutse kandi narimo mbwira inshuti yanjye agahinda kanjye, inshuti yamvuyemo isohora ikiganiro twagiranye hagati yacu. Ndasaba imbabazi uwo byababaje wese, ntabwo ndi umushizi w’isoni, nararezwe. Buri wese iyo arakaye avuga ukwe, nagize umujinya mvuga amagambo atari meza ariko ndasaba imbabazi ababyumvise, abafite umutima barampa imbabazi.”

Uyu mukobwa uba mu Busuwisi yahoze ari mu munyenga w’urukundo na Safi ndetse inshuro nyinshi bagaragaye bahuje urugwiro mu butembere i Dubai n’ahandi babaga bari kumwe agatoki ku kandi barandatana ubudatana; gusa kera kabaye ubanza harazimye uwaka bagatana nabi.

Safi yacyuriye Parfine ahereye i Dubai…

Mu biganiro Safi Madiba yagiranye na Parfine [mu ijoro ryo kuri uyu wa Kabiri] IGIHE ifite bigaragaramo aho uyu muhanzi asobanurira uwo bahoze bakundana ati “Ucunge neza niba atari wowe ufite Satani kuko uwo ndongoye azi gusenga, akunda Imana n’abantu, wowe uriyizi, ibyawe ni ukunywa champagne n’akabari.”

Safi kandi yandikiye Parfine amwibutsa ko ubwo bari basohokeye i Dubai yari agiye kumwambika impeta undi mutima uramubuza kuko ngo ‘byari kuba ari uguta igihe kwambika impeta umugore kandi yambaye izindi.’

Yagize ati “Numvise uvuga i Dubai, turiyo natumye umugabo impeta ngo nkwambike bucyeye ambwira ko yibagiwe, mu mutima ndavuga nti ese ubundi ndakwambika impeta wambaye izindi, nti buriya ni Imana ibikoze.”

Safi yakomeje asobanurira Parfine ko muri kamere ye ‘adakunda amafaranga nk’uko abimushinja. Ati “Iyo mba nyakunda sinari kukureka kuko urayafite, nashatse Judithe kuko duhuza, twumvikana, afite imyaka 28, nta mugabo ataye kandi ni mwiza azubaka”.

I Dubai ngo Safi yari agiye kwambika Parfine impeta yisubiraho

Muri Mata 2015 nibwo Safi yavuzwe mu rukundo rweruye na Parfine Umutesi wafashe rutema ikirere akava mu Busuwisi kugira ngo amusure mu Rwanda. Muri icyo gihe uyu muririmbyi wo muri Urban Boyz yahamije byeruye ko nyuma ya Knowless asigaye akundana n’uwitwa Parfine ufite uburanga n’imico bikwiye kuranga uwo bazarushingana.

Safi yakundanye n’abakobwa batandukanye barimo Knowless banabanye mu nzu igihe kirenga amezi atandatu, nyuma yakundanye n’undi mukobwa witwa Fabiola [banagiranye ibibazo bapfa imodoka], ikibazo cye na Fabiola gikemutse yahise akundana na Parfine none na we barashwanye ubu ibyabo ni amahari.

Parfine na Safi bari bamaranye imyaka itatu bakundana gusa ngo hari hashize umwaka n'igice Judithe yarabyivanzemo
Muri Nzeri 2014 ubwo Urban Boyz yari yagiye mu Busuwisi ari nabwo urukundo rwa Safi na Parfine rwatangiye
Safi yabwiye Parfine ati "Judithe turahuza , turumvikana, afite imyaka 28, nta mugabo ataye kandi ni mwiza azubaka."

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza