Padiri wahimbye ‘Ni wowe rutare rwanjye’ yasobanuye impamvu amaze imyaka 30 nta album

Yanditswe na Munyengabe Murungi Sabin
Kuya 15 Nyakanga 2017 saa 12:34
Yasuwe :
0 0

Padiri Dr Fabien Hagenimana amaze guhanga indirimbo zibarirwa muri magan mu myaka irenga mirongo itatu amaze akora ubuhanzi, mu zo yaririmbye iyamamaye cyane yitwa ‘Ni wowe rutare rwanjye’ izwi cyane muri Kiliziya Gatolika.

Ni we waririmbye iyakunzwe cyane mu bakirisitu gatolika yitwa ‘Dore inyange yera de’ n’izindi zitabarika zifashishwa mu gutura igitambo cya misa mu Rwanda. Padiri Dr Fabien Hagenimana ni Umuyobozi wa Kaminuza ya INES Ruhengeri akagira n’indi mirimo ikomeye muri Diyoseze ya Ruhengeri.

Uyu mupadiri abarirwa mu ba mbere bakoze ibihangano byinshi byifashishwa muri liturujiya ndetse indirimbo ze zifasha benshi mu kwiyegereza Imana.

Mu myaka igera kuri 37 Padiri Dr Fabien Hagenimana amaze akora ubuhanga yakoze indirimbo zitagira ingano ariko yanze kuzibumbira kuri album ku mpamvu y’uko ngo ‘adashaka kuzizirikaho kuko ari ari umusaruro Imana yamuhereye ubuntu’.

Padiri Fabien Hagenimana afite ubuhanga buhanitse mu muziki ndetse aho yize hose uhereye mu ishuri ribanza rya Musanze kugeza arangije isominari agahabwa ubupadiri ngo yari afite umwihariko mu kuririmba nk’uko yabitangarije ikiganiro Amahumbezi gica kuri Radio Rwanda.

Mu ishuri ribanza rya Musanze ari naho yatangiriye gufata amasomo y’ibanze ku muziki, yageze mu iseminari Nto ya Rwesero asanga arusha ubumenyi abo biganaga icyo gihe.

Yavuze ko yatangiye kwihugura mu by’umuziki mu 1980 gusa byabaye akarusho ageze mu iseminari Ntoya ya Rwesero aho yagizwe umuyobozi w’umuziki ari nabwo yatangiye guhimba indirimbo zirimo izakunzwe muri iki gihe.

Yagize ati “Icyo gihe hari mu 1981, nibwo nagiye mu Isominari Ntoya ya Rwesero naho umuziki wo nari nawurumishijweho mu 1980 nigishwaga n’umwarimu witwa Yohani Ndagijimana. Nakomeje kugenda imbere y’abandi banyeshuri, ngeze mu wa kabiri banshinga kuyobora abandi mu bya muzika no mu wa kane bangira umuyobozi w’indirimbo mu kigo, ubwo ntangira no guhimba uturirimo twanjye.”

Yatangiye kwiga guhimba indirimbo ze bwite ari mu mwaka wa kabiri ku Rwesero gusa iyasohotse igahita inamenyekana ni iyo yakoze ageze mu mwaka wa Gatanu

Ati “Mu by’ukuri iyo ntabwo yamenyekanye, iyo yitwa ngo ‘Reka nshimire Nyagasani Imana yandemye’, yamenyekanye hake ahandi ntiyamenyekana. Nyuma mu 1986 nibwo nakoze akandi karirimbo kitwa ‘Alleluya’, iyo n’ubu turacyayiririmba na n’ubu.”

Padiri Dr Fabien Hagenimana yongeraho ati “Nyuma nabaye Padiri ndetse nkomeza guhanga ndetse n’aho nagiye hose mu bindi bihugu nagiye mpimba indirimbo zo mu ndimi zitandukanye. Iyo nkoresheje indirimbo mfasha abantu gusenga kuko burya iyo umuntu aririmba aba asenga kabiri.”

Mu myaka amaze aririmba yakoze izakunzwe nubwo benshi batazi ko ari ize harimo iyitwa ‘Muze dusingize uwo mubikira’, Isi yose irakurata’ n’izindi nyinshi. Ubwo yarimo kwiga umwandiko uzwi cyane w’Indyoheshabirayi ngo nibwo yahimbye ‘Muze dushimire Imana’ ndetse ngo imwibutsa byinshi.

Ati “Ubwo twigaga ‘Indyoheshabirayi’ nibwo nahimbye iyitwa ‘Muze dushimire Imana’, nyuma natangiye kwinjira mu njyana zitari zimenyerewe nk’igihe nahimbye ‘Dore Inyange yera de’, nayikoze twiga mu mwaka wa mbere i Rutongo.”

Mu buhanzi bwe Padiri Dr Fabien Hagenimana ngo yagiye yifashisha kenshi igitabo cy’umuhanga Gamariyeri Mbonimana mu gushakisha injyana nshya z’indirimbo ze. Ni nabwo buryo yakozemo iyitwa ‘Ni wowe rutare rwanjye’ ashyira mu z’ibihe byose yahimbye.

Ati “Iriya nyihimba nari nicaye ahantu hari urutare, iyo ndirimbo yakanyujijeho cyane muri za 1990, iyo nyirimbye numva irimo ubutumwa bwanjye.”

Padiri Dr Fabien Hagenimana avuga ko atazi neza umubare w’indirimbo yahimbye ndetse ngo ntateganya kuzazibumbira kuri album kuko ikimushishikaje cyane ari uko zagera ku bakirisitu zigakomeza kubafasha kugororokera Imana.

Padiri Dr Fabien Hagenimana amaze imyaka irenga 30 aririmba ariko nta album yigeze akora

Ati “Ikinyoma cyaba ari ukukubwira umubare, ni nyinshi ntabwo nazimenya […] Mu by’ukuri ibyo narabyirinze, nasanze ibi bintu byo kugira inganzo y’indirimbo z’Imana atari ibintu nirukanseho, mbona narabihawe ku buntu nkabitanga ku buntu ntabiziritseho akagozi ngo abantu bamenye ko ari ibyanjye. Gukora album yanjye ntabwo byanshishikaje, numva nishimiye kwinjira mu rugaga rw’abandi benshi batanze umusanzu.”

Ubumenyi afite mu muziki abusangiza abakibyinjiramo binyuze mu masomo atanga ndetse kugeza n’ubu aracyahimba bitewe n’ibyo inganzo imuyoboramo anashingiye ku biba bikenewe muri liturujiya.

Padiri Dr Fabien Hagenimana ni Umuyobozi wa Kaminuza ya INES Ruhengeri

Imwe mu ndirimbo za Padiri Hagenimana


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza