Paccy yifashishije ifoto igaragaza ikibuno n’amagambo ateye kwibaza byinshi ku ndirimbo agiye gusohora

Yanditswe na Uwiduhaye Theos
Kuya 23 Ukwakira 2018 saa 06:27
Yasuwe :
0 0

Ni amagambo abiri yatuma wibaza byinshi. IBYA-TSI. Ni bwo buryo Odda Paccy yashatse kugaragaza indirimbo ye ayiherekesha ifoto y’ikibuno cy’umukobwa.

Ni umukobwa udatangwa n’udushya. Ubushize yari yadukanye ikoma yakinze ku myanya ndangagitsina nabwo nk’uburyo bwo kwamamaza indirimbo ye.

Icyo gihe inkuru yabaye kimomo igera hose, ahinduka ikirangirire kubera icyo. Ku mbuga nkoranyambaga hahise haduka icyiswe #IkomaChallenge.

Magingo aya, indirimbo Paccy ateganya gushyira ahagaragara, nayo yavugishije benshi itarasohoka.

Yayise ‘Ibyatsi’. Ifoto iyamamaza yabanje kwandika ‘IBYA ubundi ‘TSI’ ayishyira munsi, ibintu byateye benshi kwibaza impamvu.

Uretse uburyo amagambo yanditse, hariho n’ifoto y’umukobwa imugaragaza ikibuno.

Mu kiganiro Paccy yahaye IGIHE, yavuze ko ibiri kuri iyi foto yamamaza indirimbo byose ari ubugeni no kuyiryoshya bidafite aho bihuriye n’ibyo umuntu ashobora gutekereza.

Ati “Ibyanditse hariya nabyo ni ‘Ibyatsi’ ntaho bihuriye n’ibyo umuntu ashobora gutekereza. Ni uburyo bwo guhindura imyandikire ndetse ni ubugeni bw’uwakoze iriya foto agerageza kuyiryoshya.”

Paccy avuga ko yabikoze ashaka gutera amatsiko umuntu uzabona iriya foto, ku buryo anyoterwa kumva uko indirimbo izaba imeze. Yemeza ko abantu bazatungurwa.

Iyi ndirimbo izaba ikoze mu njyana ya Hip Hop, izajya hanze ku wa Gatanu. Amajwi yayo yakozwe na Junior Multisystem n’aho amashusho ateganya ko azajya hanze mu byumweru bibiri biri imbere.

Paccy asobanura ko ‘ibyatsi’ ifite ubutumwa bujyanye n’ubuzima busanzwe umuntu abamo ndetse n’agace gato k’urukundo.

Ati “Narebye mu buzima busanzwe, hari ukuntu abantu tuba duteye, ibintu tuba dukunda rimwe na rimwe harimo n’abantu bakunda ibyatsi.”

Ifoto y’ikibuno igaragara ngo si iye ndetse si n’iy’umunyarwandakazi uwo ari we wese.

Ku bwe gukora amafoto yamamaza indirimbo avugisha abantu ni byiza kuko bituma uyibonye afata umwanya akumva cyangwa se akareba ikintu umuhanzi yakoze.

Uburyo Paccy yanditse izina ry'indirimbo ye nshya bikomeje kuvugwaho byinshi
Oda Paccy aheruka kuvugisha benshi ubwo yasohoraga ifoto yikinze ikoma ku myanya y'ibanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza