P Fla yahishuye ko yujuje studio izamufasha mu bikorwa bya ‘Label’ ye nshya

Yanditswe na Nsengiyumva Emmy
Kuya 5 Gashyantare 2021 saa 10:03
Yasuwe :
0 0

Umuraperi P Fla yahishuye ko yujuje studio ye nshya yise ‘Quiet Money Records’, izamufasha mu bikorwa bya muzika muri ‘Label’ ye nshya yise ‘Quiet Money’.

Ibi uyu muraperi yabihishuye mu kiganiro cyihariye yagiranye na IGIHE, yanatangarijemo ko yamaze gusinyisha umuhanzikazi Popo Ali bazakorana.

P Fla yavuze ko gukora Label ya Quiet Money, ari umwe mu mishinga yari amaranye igihe, agenda awushyira mu bikorwa gahoro gahoro kugeza ubwo amaze kubaka studio anasinyisha umuhanzi wa mbere.

Yagize ati “Quiet Money Records ni Label yanjye, ni njye muyobozi wayo ni nanjye wayishinze. Ni igitekerezo nari maranye imyaka myinshi gusa ngenda ngikoraho kugeza aho bigeze ubu. Ntabwo turafungura ku mugaragaro ariko nizera ko mu minsi iri imbere tuzaba tugirana ibindi biganiro bivuga kuri iyi Label yanjye. Ndashimira Popo Ali ni we muhanzikazi wa mbere twemeranyije imikoranire.”

Uyu muraperi avuga ko Quiet Money ari umushinga yari amaranye igihe nubwo yirinze kuwusakuza cyane kuko yifuzaga kubivugaho yamaze kuwuha umurongo.

Yagize ati “Ni ko biba bimeze nyine, hari ibintu twakoze cyera, ugasanga abantu baravuga imishinga, tugahora tuvuga ngo nzakora nzakora, abantu bakagera aho bakanaturambirwa. Njye rero naravuze ngo reka nkore byibuza abantu bazabone ibikorwa.”

Kugeza ubu, nubwo Popo Ali ariwe muhanzikazi wa mbere winjiye muri Quiet Money, P Fla avuga ko bifuza gukorana n’abahanzi bafite impano batandukanye atari ukwita gusa ku njyana runaka.

Quiet Money Records, ni studio yubatse i Nyamirambo ndetse nyuma y’uko byinshi mu bikorwa byo kubaka byamaze kurangira mu minsi iri imbere ngo hateganyijwe igikorwa cyo kuyitaha ku mugaragaro.

Ikiganiro na P Fla

P Fla yavuze ko gushinga 'Quiet Money' ari inzozi yari amaranye imyaka myinshi
P Fla na Popo Ali nibo bahanzi ba mbere bagiye gutangirana na Quiet Money Records

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .