Oumou Sangaré na Nirere Shanel bashimishije abitabiriye ’Hamwe Festival’ (Video)

Yanditswe na Nsengiyumva Emmy
Kuya 11 Ugushyingo 2019 saa 10:35
Yasuwe :
0 0

Umuhanzikazi Oumou Sangaré ufite izina rikomeye mu muziki wa Afurika n’Isi yataramiye abitabiriye Iserukiramuco ryiswe “Hamwe Festival” afatanyije na Nirere Shanel bashimisha bikomeye abakitabiriye.

Sangaré w’imyaka 51 yageze mu Rwanda ku wa Gatanu, tariki 8 Ugushyingo 2019.

Mu ijoro ryo ku wa 10 Ugushyingo 2019 nibwo yataramiye i Kigali aho yahuriye na Nirere Shanel mu gitaramo cyanyuze abakitabiriye.

Muri iki gitaramo yaba Nirere Shanel cyangwa Sangaré buri wese yahawe igihe kirenga isaha ataramira abakunzi b’umuziki we abamara ipfa.

Sangaré na Nirere Shanel buri umwe yaririmbye indirimbo ze hafi ya zose atekereza ko zishimisha abakunzi b’umuziki we, abafana bari bitabiriye iki gitaramo ku bwinshi nabo ntibabatengushye babyinanaga indirimbo ku yindi.

Nirere Shanel ku rubyiniro yafashwaga n’itsinda ry’abaririmbyi n’abacuranzi yasanze mu Rwanda mu gihe Sangaré we yari yazanye abacuranzi be n’abamufasha mu majwi bavanye muri Mali.

Iki gitaramo kitabiriwe n’abarimo Minisitiri w’Ubuzima Dr. Diane Gashumba, Igikomangoma cyo mu bwami bwa Jordan Dina Mired,Dr Agnes Binagwaho Umuyobozi wa Kaminuza ya UGHE (University of Global Health Equity) n’abandi banyacyubahiro batandukanye.

Iri serukiramuco rifite intego yo gusangiza abazaryitabira akamaro k’ubuhanzi bw’uburyo bwose n’uko bwagira uruhare mu bijyanye no kurengera ubuzima.

Muri iri serurikiramuco abahanzi, abacuruzi, inzobere mu buzima ku rwego rw’Isi, n’abandi batandukanye bagomba kwerekana uburyo imbaraga z’ubuhanzi zafasha mu buzima.

Hamwe Festival ibereye ku nshuro ya mbere mu Rwanda, yatangiye ku wa 8 Ugushyingo, izarangira ku wa 13 Ugushyingo 2019, biteganyijwe ko ibera ahantu hatandukanye mu mujyi wa Kigali.

Reba uko Nirere Shanel yitwaye muri iki gitaramo

Reba uko Oumou Sangaré yitwaye muri iki gitaramo

Nirere Shanel yongeye kugaragaza ko ari umwe mu bahanzikazi beza u Rwanda rufite
Nirere Shanel yashimishije abakunzi b'umuziki we kuva kuwo hambere kugeza kuwo akora muri iyi myaka ya vuba
Nubwo mu myaka atari muto, Oumou Sangaré ku rubyiniro akoresha imbaraga nyinshi cyane
Mu gihe kirenga isaha yose Oumou Sangaré yashimishije bikomeye abakunzi b'umuziki we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza