One Voice Rwanda, itsinda ry’abanyempano ryiyemeje guhindura sosiyete ryifashishije ubuhanzi

Yanditswe na Muvunyi Arsène
Kuya 6 Kanama 2019 saa 08:57
Yasuwe :
0 0

Urubyiruko rufite impano yo kuririmba, kubyina, gushushanya no guhanga imivugo rwahurijwe mu itsinda ryiswe “One Voice Rwanda” rigamije ku gutanga ubutumwa bw’amahoro binyuze mu bihangano byabo.

Iri tsinda ryatangijwe na Udahemuka Louis usanzwe ari umuhanzi akanatunganya filime zirimo Seburikoko, Papa Sava n’izindi.

Yabwiye IGIHE ko yagize igitekerezo cyo gutangiza One Voice Rwanda mu rwego rwo gutanga umusanzu mu kubaka sosiyete ariko akoresheje impano ze ariko asanga byaba byiza afatanyije n’abandi.

Yagize ati “Natekereje ikintu nakora ngo ntange umusanzu wanjye nkoresheje ubuhanzi, cyane cyane mu ndirimbo no muri filime. Ndavuga nti ‘mbikoze njyenyine ijwi ryanjye ntabwo ryagera kure reka mpuze abahanzi kuko ari benshi biragera kure.”

Intego y’iri tsinda ni ukunyuza mu mpano zabo ubutumwa bugamije guhindura sosiyete nyarwanda.

Yahurije hamwe abaririmbyi barimo abize umuziki mu Ishuri rya Muzika rya Nyundo, abafite impano yo gushushanya, ababyinnyi n’abahanga imivugo.

Udahemuka asobanura ko iri tsinda rifata insanganyamatsiko imwe, ubundi rikayikoraho ibihangano bitandukanye bikozwe n’aba banyempano.

Baherutse gushyira hanze indirimbo yabo ya mbere bise “Wowe” bakoranye na Hope wahoze mu itsinda rya Three Hills. Iyi ndirimbo irimo ubutumwa bukangurira abantu kugira ubumuntu, urukundo no kubana mu mahoro muri rusange.

Iyi nsanganyamatsiko bakozeho indirimbo banayikoreye umuvugo, ibishushanyo na filime mbarankuru.

Udahemuka ati “Ni mu rwego rwo kugira ngo udakunze indirimbo, akunde ikinamico, umuvugo, imbyino cyangwa arebe iyo filime mbarankuru.”

Muri buri ndirimbo One Voice bazajya bashyira hanze, hazajya haba harimo umwe mu bahanzi bakomeye mu Rwanda mu rwego kubafasha kugeza kure ubutumwa bwabo.

-  Reba indirimbo “Wowe” One Voice Rwanda yafatanyije na Hope Irakoze

One Voice Rwanda ifite intego yo kwamamaza amahoro n'urukundo mu bantu
Bamwe mu baririmbyi bagize Itsinda rya One Voice Rwanda
Hope Irakoze yafatanyije n'itsinda rya One Voice mu ndirimbo yaryo ya mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza