Umukobwa uvuka i Huye yambitswe ikamba rya Miss Mashujaa muri Kenya

Yanditswe na Munyengabe Murungi Sabin
Kuya 21 Ukwakira 2016 saa 10:33
Yasuwe : XX
0

Umukobwa witwa Ogake Sharon ukomoka mu Karere ka Huye mu Ntara y’Amajyepfo yambitswe ikamba rya Nyampinga witiriwe umunsi w’intwari [Mashujaa Day] mu birori byabaye mu ijoro ryo kuri uyu wa 20 Ukwakira 2016.

Ogake Sharon asanzwe yiga muri Baraton University muri Kenya, yambitswe iri kamba atsinze abakobwa icyenda bo muri Kaminuza zitandukanye. Aba uko ari icumi batoranyijwe mu bandi bagera kuri 25 bahatanye mu cyiciro cya mbere.

Ogake Sharon w’imyaka 19 asanzwe ari Nyampinga wa Baraton University umwaka wa 2016. Yabwiye IGIHE ko ikamba rya Miss Mashujaa mu Ntara ya Nandi rizamufasha gukomeza guhesha ishema u Rwanda kuko “Miss Mashujaa w’Intara ya Nandi azajya guhatana ku rwego rw’igihugu, njye ndi mu bakobwa bahagarariye uturere dutandukanye.”

Ati “Icyizere no kwishyiramo ko ibintu byose bishoboka ni byo byatumye ntsinda. Ni amahirwe akomeye kuri njyewe kuko nzahagararira iyi ntara ku rwego rw’igihugu muri Kenya, harimo abakobwa b’abahanga ku buryo numva bizamfasha ndetse ngahesha ishema igihugu cyacu.”

Yavuze ko “Ntawe byabangamiye kuba ndi muri Kenya nkaba ndi Umunyarwandakazi ntabwo bivuze ko ntakwitabira amarushanwa yabo nubwo mvuka mu Rwanda. Ni ibintu bisanzwe.”

Miss Ogake Sharon wiga mu ishami rya Fashion and Design yongeyeho ati “Ni umwanya mwiza ngomba gukoresha mu kwerekana umuco wacu, nzerekana imyambarire isanzwe iranga Abanyarwanda…”

Yagaragiwe n’abakobwa babiri uwitwa Bernice Njoroge wabaye igisonga cya Mbere ndetse na Calorine Chepkoech wabaye igisonga cya Kabiri. Hanatowe Rudasumbwa aho umuhungu witwa Abdul Ishmael yabaye uwa mbere, mu bamugaragiye harimo umusore ufite umubyeyi ukomoka mu Rwanda.

Miss Mashujaa ni ibirori byateguwe mu rwego rwo gufasha urubyiruko muri Kenya kurushaho kwiyumva mu munsi w’intwari [Mashujaa Day] wizihizwa kuri uyu wa 20 Ukwakira 2016.

Miss Ogale Sharon yahembwe amashilingi ya Kenya ibihumbi 20 [160,000frw] n’ibindi bihembo bitandukanye birimo kujya ahabwa amavuta agezweho, gutunganyirizwa imisatsi n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza