00:00:00 IGIHE NETWORK KN KINYARWANDA EN ENGLISH FR FRANCAIS

Nzisabira yifashishije indirimbo Nirere Shanel avuga ku ihohotera rikorerwa mu ngo

Yanditswe na Uwiduhaye Theos
Kuya 28 Kanama 2021 saa 08:23
Yasuwe :
0 0

Umukobwa witwa Joselyne Nzisabira ukoresha amazina ya TheMedPoetess yakoresheje indirimbo yitwa ‘Atura’ ya Nirere Shanel mu gisigo cye kigaruka ku ihohoterwa rikorerwa abagore mu ngo.

Uyu mukobwa ubusanzwe afite bindi bisigo birimo “Niwe Nabaye”,“Nzisabira”, “Kuki Njye”, “That child” n’ibindi byinshi birimo igishya yise “Umwali Utuje”.

Yabwiye IGIHE ko yagize igitekerezo cy’iki gisigo ubwo yari ari gutekereza ku ihohoterwa rikorwa mu ngo mu Rwanda.

Ati “Ni umuvugo ugaruka ku ihohoterwa rikorerwa mu ngo cyane cyane hagati y’abashakanye. Nashakaga kugaruka ku ihohoterwa rikorwa mu ngo akenshi hakabaho guceceka uwarikorewe ntabivuge kubera gutinya icyo rubanda bari bubivugeho.”

Yavuze ko bahisemo gukoresha indirimbo ya Nirere yunganira uyu muvugo kuko ihuye cyane n’igisigo cye. Avuga ko na yo igaruka ku ihohoterwa rikorerwa mu ngo ariko igashishikariza abantu kwatura bakavuga ko bahohotewe.

Joselyne Nzisabira yifashishije Benitha Bernadette Uwera ari we usubiramo indirimbo ya Nirere muri iki gisigo cye. Avuga ko kubera ukuntu ihohoterwa rikorerwa mu ngo rigira ingaruka zitandukanye ku muryango bashakaga gutanga umusanzu ngo barebe ko ryagabanuka.

Kimwe mu byo yemera ni uko ihohoterwa ribera mu ngo rishobora kuba ku muntu uwari we wese, yaba umugabo cyangwa umugore, bityo rero buri wese byabaho yabivuga.

Joselyne Nzisabira asanzwe ari umunyeshuri mu cyiciro cya mbere cya kaminuza mu ishami ry’ubuvuzi muri University of Global Health Equity(UGHE). Yavukiye mu karere ka Gasabo mu Mujyi wa Kigali.

Yakuze akunda kwandika ndetse biri mu byamukururiye mu busizi. Mu 2020 yatwaye igihembo biturutse ku nyandiko ye ivuga ku buringanire n’ubwuzuzanye nyuma yo gutsinda amarushanwa yo kwandika ku nsangayamatsiko y’uburinganire n’ubwuzuzanye mu urugamba rwo kurwanya icyorezo cya COVID-19.

Iki gihembo yagihawe na kaminuza yigamo. Ni umwe mu bagize ihuriro ry’abanditsi ryitwa Writers Space Africa mu Rwanda (WSA-Rwanda). Agamije gukoresha impano ye mu komora ibikomere abakomerekejwe n’ibindi bitandukanye.

Benitha Bernadette Uwera wamufashije muri iki gisigo cye gishya na we ni umunyeshuri muri University of Global Health Equity (UGHE). Asanzwe ari umuririmbyi ndetse we yemeza ko kuririmba ari kimwe mu bifasha umuntu kugaragaza ikimurimo.

Joselyne Nzisabira[ibumoso] na mugenzi we Benitha Bernadette Uwera wamufashije muri uyu muvugo
Joselyne Nzisabira asanzwe ari umwanditsi w'ibisigo bitandukanye n'imivugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .