Emmy yasubiye muri Amerika nyuma yo gutera ivi

Yanditswe na Nsengiyumva Emmy
Kuya 26 Mutarama 2021 saa 01:50
Yasuwe :
0 0

Umuhanzi Emmy yasubiye muri Leta Zunze Ubumwe za Amerika nyuma y’iminsi mike yari amaze i Kigali aho yambikiye impeta umukunzi we Umuhoza Joyce bemeranyije kurushinga.

Ku mugoroba wo ku Cyumweru tariki 24 Mutarama 2021, Emmy yahagurutse i Kigali yerekeza muri Leta Zunze Ubumwe za Amerika aho asanzwe atuye.

Mu butumwa Umuhoza yageneye umukunzi we amusezeraho yagize ati “Warakoze ku bihe byiza twagiranye, urugendo rwiza.”

Uyu muhanzi wanamaze kugera muri Leta Zunze Ubumwe za Amerika, yasize asohoye indirimbo ye nshya yise ‘Dokima’ yakoreye i Kigali.

Emmy yari yavuye muri Leta Zunze Ubumwe za Amerika, mu matariki ya mbere ya Mutarama 2021, nk’uko yabibwiye IGIHE, impamvu y’urugendo rwe yari igikorwa yakoze ku wa 12 Mutarama 2021, ubwo yambikaga impeta umukunzi we.

Emmy na Umuhoza Joyce batangiye kuvugwa mu itangazamakuru kuva mu 2018. Icyakora nubwo mu ntangiriro urukundo rwabo rwavuzwe mu itangazamakuru, bagerageje kugira ibanga umubano wabo.

Emmy ni umwe mu bahanzi bamaze igihe mu muziki w’u Rwanda. Mu 2012 ubwo yavaga mu Rwanda yerekeza muri Leta Zunze Ubumwe za Amerika, yari umwe mu bagezweho cyane ko yari no ku rutonde rw’abahatanira irushanwa rya Primus Guma Guma Super Star ryabaga ku nshuro ya kabiri.

Emmy yavuye mu Rwanda agezweho mu ndirimbo nka Nsubiza, Uranyuze, Kuki, Ibyo bavuga, Ese urinde n’izindi.

Ageze muri Leta Zunze Ubumwe za Amerika ntabwo yicaye ubusa kuko yakomeje gukora mu nganzo asohora izindi zirimo Ntunsige, Wabaga he yakoranye na Princess Priscillah, Ntari umuntu n’izindi zirimo Care aheruka gusohora mu minsi ishize.

Ikiganiro twagiranye na Emmy ubwo yari akiri i Kigali

Emmy avuye mu Rwanda yambitse impeta umukunzi we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .