Nyampinga w’u Rwanda yafashije abantu 40 barwaye ishaza kuvurwa ku buntu

Yanditswe na Mukwaya olivier
Kuya 16 Gicurasi 2017 saa 09:04
Yasuwe :
0 0

Nyampinga w’u Rwanda, Iradukunda Elsa yatangiye ubukangurambaga bwo gufatanya n’inzobere z’abaganga kuvura ku buntu abafite uburwayi bw’ishaza bukunda kwibasira abakuze, ku ikubitiro yavuje abagera kuri 40 bo mu Karere ka Rubavu.

Miss Iradukunda yagiye mu Karere ka Rubavu mu mpera z’icyumweru gishize , azahamara iminsi igera kuri irindwi yita ku bafite ibibazo by’uburwayi bwo kutabona neza. Kuri uyu wa Mbere tariki ya 15 Gicurasi 2017 yafashije abantu 40 bavurwa ku buntu ndetse ngo azavayo havuwe abagera kuri 200 barwaye ishaza.

Uyu mukobwa w’imyaka 19 yateguye iki gikorwa cyo kuvura aba bantu ku buntu yifashishije inzobere z’abaganga bo mu bitaro bya Kabgayi.

Urwaye ishaza ntabona neza ndetse iyo areba ikintu aba abona kirimo ibihu n’urumuri rwinshi, ibi bikamubuza kureba neza. Iyi ndwara ikunze kwibasira 20% by’abarengeje imyaka 65, ikaba ifata 60% by’abarenze imyaka 85.

Umuyobozi w’ibyo bitaro, Maj Dr Kanyankore William, yavuze ko ubuyobozi bw’ibitaro bwishimiye iki gikorwa cyateguwe na Nyampinga w’u Rwanda dore ko mu minsi ishize bari basigaye bohereza abarwayi kwivuriza mu bitaro bya Kabgayi nyuma y’uko mugenga w’inzobere wakoreraga i Rubavu ubu yimuriwe i Kibuye.

Ibitaro bya Gisenyi ngo byoherezaga abarwayi b’ishaza nibura bagera ku ijana buri kwezi, ariko ubu Nyampinga ngo aruhuye benshi kuko ubukangurambaga bwe buzasiga abagera kuri magana abiri bavuwe kandi ku buntu.

Yagize ati “Kuba Nyampinga yahisemo kuza ku Bitaro bya Gisenyi aruhuye benshi mu barwayi bari baroherejwe ku bitaro byisumbuye ariko bakaba bari barabuze ubushobozi bwo kujyayo. Ubu bagiye kuvurirwa hafi kandi ku buntu, ubu umurwayi ari gusabwa amafaranga yo gusuzumwa yaba agomba kubagwa akabikorerwa ku buntu.”

Iradukunda Elsa yavuze ko yahisemo gukorera iki gikorwa mu Ntara y’Uburengerazuba mu rwego rwo gushimira no kwitura abo muri aka gace yiyamamarijemo. Yashimiye byimazeyo abaganga bo mu Bitaro bya Kabgayi bemeye kuza kwifatanya na we kugira ngo batange ubu buvuzi.

Miss Iradukunda Elsa yafashije abantu 40 barwaye ishaza bavurwa ku buntu, azava i Rubavu avuje abasaga 200

Yagize ati “Nyuma yo kuganira n’ibitaro bya Kabgayi bakambwira ko 53% by’abarwaye amaso bashobora kuvurwa bagakira nifuje gutangiza gahunda yo kuvura abarwayi bafite ikibazo cy’ishaza bityo mpitamo guhera i Rubavu kuko ariho natorewe bikaba bizagera mu gihugu hose nifashishije izina rya Miss nkagirira baturage akamaro.”

Iki gikorwa kizamara iminsi itanu gikorwa ndetse Nyampinga azagikurikirana kuva kigitangira kugeza gisojwe nyuma azasura abanyeshuri yemeye kwishyurira ishuri biga ku ishuri ribanza rya Rusamaza mu Murenge wa Rugerero, azavayo anasuye urubyiruko ruri kugororerwa ku kirwa cya Iwawa.

Miss Iradukunda yakurikiranaga iki gikorwa
Elsa yafashije aba barwayi kugira ngo bavurwe neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza