Nizzo yaba yarahejwe mu bukwe bwa Safi baririmbana

Yanditswe na Munyengabe Murungi Sabin
Kuya 2 Ukwakira 2017 saa 01:00
Yasuwe :
0 0

Niyibikora Safi uririmba muri Urban Boyz yatanze inkwano mu muryango wa Niyonizera Judithe, umuhango wo gusaba no gukwa wagaragayemo inshuti nke cyane z’uyu muhanzi.

- Ubukwe bwa Niyibikora na Niyonizera bwatashye!
- Ubu bukwe bwavuzwe ukwinshi ariko ‘iyo abageni bizera yabikoze’
- Inshuti magara za Safi ntizatashye ubukwe
- Nizzo we yari yagiye gusangira n’inshuti i Remera

Ibirori byo gusaba no gukwa Niyonizera Judithe byabereye i Rebero mu Karere ka Kicukiro kuri iki Cyumweru tariki ya 1 Ukwakira 2017.

Niyibikora Safi na Niyonizera Judithe babanje gusezerana imbere y’amategeko bemeranya kuzabana akaramata nk’umugabo n’umugore mu muhango wabereye mu Murenge wa Remera mu masaha yabanjirije ibirori byo gusaba umugeni.

Ubukwe bwa Safi na Judithe bwateguwe mu buryo busa n’ubwatunguranye kuri benshi kuko n’ibyo gukundana kwabo byari bimaze iminsi icumi bitangajwe. Safi yakoze ubukwe acungiwe umutekano mu buryo bukomeye, ibi ni nako Knowless [wahoze ari umukunzi we] yabigenje ubwo yarongorwaga mu mpera za 2016.

Ku biro by’umurenge wa Remera aho basezeraniye hari harinzwe n’abasore b’ibigango ku buryo uwinjiraga yagombaga kuba afite ubutumire. I Rebero ahabereye ibirori byo gusaba no gukwa ho byari agahebuzo! Ku muryango hari hahagaze abasore b’imbaraga bafite lisiti iriho urutonde rw’abatumiwe, gusa ibi byakozwe mu mutuzo ntawe uhutajwe.

Mu birori hagati, abantu bakoreshaga amatelefone bafata amafoto bahawe itegeko ribibabuza ku buryo ubwo umugeni yari agiye gutangwa abasore banini bambaye amataratara yijimye bagenzuraga neza ko ‘nta warenze ku itegeko’.

Safi yagize ibirori byiza ndetse no mu magambo yahavugiwe byagarutsweho. Mu misango y’ubukwe, umwe mu basaza yavuze ko ‘urukundo rw’aba bombi rukwiye kuba ikinege batitaye ku kintu icyo ari cyo cyose kuko Imana bizera Niyibikora’ nk’uko amazina yabo abishimangira.

Ubukwe bwa Safi bwatashywe na bake mu nshuti ze za hafi ndetse mu bahanzi bakoranye na we mu myaka amaze aririmba ntibahageze. Mu bazwi mu muziki batashye ubu bukwe harimo Riderman, Platini, Queen Cha[mubyara we], Uncle Austin, Humble Jizzo[baririmbana], Hope Irakoze, Kid Gaju, David Bayingana, Muyoboke Alex.

Inkoramutima za Safi mu muziki ntizatashye ubu bukwe! Abenshi bibajije kuri Nizzo inshuti ye basanzwe baririmbana muri Urban Boyz akaba atakandagiye aho ibi birori byabereye.

Nizzo ubusanzwe azwi nk’umwe mu nkoramutima za Safi mu buzima buri hanze y’umuziki ariko ntiyagaragaye ahabereye ubu bukwe ndetse no mu Murenge wa Remera aho basezeraniye imbere y’amategeko ntiyahageze.

IGIHE yahawe amakuru ahamya ko Nizzo atatumiwe muri ubu bukwe ndetse iby’uko bwagombaga kuba ngo na we yabyumvaga mu itangazamakuru nk’abandi.

Umwe mu nshuti magara zasangiye[utifuje ko dutangaza izina rye] na Nizzo mu ijoro ryo kuri uyu wa 1 Ukwakira ari nabwo ubukwe bwa Safi bwabaye, yahamirije IGIHE ko uyu muhanzi atatumiwe ndetse ngo nta kintu Safi yigeze amubwira cyerekeye uyu mushinga yakoze.

Yagize ati “Kuba Nizzo atagiyeyo ni nk’uko nanjye mutambonyeyo, nimugoroba twari kumwe, yambwiye ko batamutumiye. Ibyo ntabwo ari ibanga, ni ukuri, niko bimeze, Nizzo ntabwo yatumiwe.”

Yongeyeho ati “Nawe ari wowe ubanza wafata uwo mwanzuro, ubwo iyo ajyayo yari gufatwa nk’abandi bavumbyi, Safi yajyanye na Nizzo i Gisenyi ejobundi baganiraga iby’ubukwe, yumvaga babivuga gutyo ariko ntibigeze bamuha ubutumire nk’abandi nta n’icyo babimubwiyeho. Ubwo yari kujyayo koko?”

Nizzo ntiyabonetse ku mirongo ibiri ya telefone akoresha kugira ngo asobanure niba koko mugenzi we yaramuheje muri ubu bukwe gusa IGIHE irakomeza kumushakisha.

Ubwo Safi yari yagiye gutanga inkwano mu muryango, Nizzo yari yajyanye n’inshuti ze gusangirira muri kamwe mu tubari tuzwi i Remera.

Safi Madiba yahaye impano isumba izindi Niyonizera Judithe

Nizzo ntiyatashye ubu bukwe mu gihe hari umwuka ututumba mu itsinda rya Urban Boyz aho bivugwa ko Safi namara kurushinga azahita yerekeza muri Canada kubana n’umugore we usanzwe ufite ubwenegihugu, Humble Jizzo na we ashobora kuzajya kuba muri Amerika n’umukunzi we [ubu utwite].

Amy Blauman, umukunzi wa Humble Jizzo na we ntiyatashye ubu bukwe, bivugwa ko atishimiye gutandukana kwa Safi na Parfine[wari umaze kuba inshuti ye] kuko bari bahuje abakunzi baririmba mu itsinda rimwe.

Nizzo ntiyatashye ubukwe bw'inshuti ye Safi
Uwinjiraga wese babanzaga kureba niba ari ku ilisiti y'abatumirwa
Humble Jizzo wo muri Urban Boyz yabutashye ariko Nizzo ntiyahakandagiye
Niyonizera Judith n'abakobwa bamugaragiye
Niyonizera Judithe ubu ni umugore wa Safi
Riderman yabaye parrain wa Safi
Safi yahise yambika impeta Judithe umuryango umaze kumumwemerera
Judithe ubwo yashyikirizaga impano sebukwe
Nyina wa Safi yishimiye ubukwe bw'umwana we
Safi yahaye impano sebukwe
Safi yahaye impano nyirabukwe
Safi na Judithe biyemeje kujya basangira akabisi n'agahiye

Kanda hano urebe amafoto menshi y’ubukwe bwa Safi

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza