Ni Nyampinga Sakwe, ikinamico nshya ifite umwihariko wo kwibanda ku bibazo by’urubyiruko

Yanditswe na Dusabimana Aimable
Kuya 8 Nzeri 2017 saa 01:02
Yasuwe :
1 1

Umushinga Ni Nyampinga ugiye gutangira kujya utambutsa ikinamico nshya ifite intego yo kuvuga ku bibazo by’abakiri bato mu Rwanda no kubivugutira umuti binyuze mu masomo azajya ayitangirwamo mu buryo bwihariye.

Igikorwa cyo kumurika iyi kinamico ku mugaragaro n’ibindi bikorwa bya Ni Nyampinga bishya, cyabereye ahitwa The Hut, ku Kimihurura, ku mugoroba wo ku wa Kane, tariki 7 Nzeri 2017, cyitabiriwe n’abiganjemo urubyiruko ndetse n’abantu batandukanye batumiwemo.

Uyu umuhango wagaragarijwemo gahunda nshya y’ikinamico yitwa ‘Ni Nyampinga Sakwe’, wanerekaniwemo abakinnyi b’intoranywa mu buhanga, bakuwe mu bice bitandukanye mu gihugu, aho amajwi yabo agiye kujya yumvikana mu buryo butanga inyigisho kandi buryoheye amatwi ku bakurikirana radiyo zitandukanye zikorera mu Rwanda.

Ibi byatekerejweho bigizwemo uruhare n’umushinga wa Girl Effect mu Rwanda, ari na wo usanzwe utegura ibikorwa bitandukanye Ni Nyampinga inyuzamo ubutumwa bwo kwigisha urubyiruko ndetse no kwegera abakiri bato mu kumva ibibazo byabo mu buryo bwihariye.

Umuyobozi wa Girl Effect mu Rwanda, Emma Roscoe, yatangaje ko iyi kinamico ibaye iya mbere ya Ni Nyampinga, ifite mu mboni abahungu n’abakobwa, hagamijwe kumenya no kumva neza ibibazo cyangwa imbogamizi bose bahura na byo mu buzima bwo kubyiruka.

Yagize ati "Nyuma y’umwaka, twishimiye cyane kumurika Ni Nyampinga Sakwe. Ikinamico zo kuri radiyo zirakunzwe cyane mu Rwanda, akaba ari iyo mpamvu twizeye ko uyu muvuno mushya uzafasha Ni Nyampinga guhangana n’ibibazo byihariye mu rubyiruko ubusanzwe biba bitoroshye kuba wahangana na byo utifashishije uburyo nyobora-bitekerezo, nk’ubw’ibitabo byacu cyangwa ibiganiro."

Mu gihe kingana n’umwaka gishize, Ni Nyampinga yakoranye bya hafi n’abafatanyabikorwa b’imbere mu gihugu, bahurije hamwe abantu barenga 200 bafite impano zitandukanye zihariye mu byiciro bitanu bijyanye n’aho abatoranyijwe babaga batuye. Ijonjora ryagaragaje barindwi bafite ubuhanga mu gukina inkuru zahimbwe no kuririmba ari na bo bifashishijwe mu Ikinamico nshya igiye gutangizwa.

Iyi kinamico izumvikanamo amajwi atandukanye arimo irya Ingabire Betty, uzakina yitwa Gigi; Mugwaneza Betty, wahawe gukina Valentine; Kanoheri Ruth Christmas, wiswe Anik; Ngarukiyintwali Jean D’Amour, ukina yitwa Pazo; Kubwimana Israel, ukina ari Kagabo; Mugwiza Pleasant ukina yitwa Mutoni na Gaga Ange Amahoro wakinnyemo yitwa Ngabire.

‘Ni Nyampinga Sakwe’ iratangira kumvikana kuri uyu wa 9 Nzeri 2017, kuri Radio Rwanda, Contact FM, Radio Huguka, Radio ishingiro, Radio Isangano, Radio Izuba, RC Rusizi, RC Nyagatare na RC Musanze. Ibi byakozwe kugira ngo ibashe kugezwa mu bice bitandukanye byo hirya no hino mu gihugu.

Iyi kinamico izajya yumvikana buri wa Gatandatu, guhera saa munani z’amanywa, nk’igice gishyashya cyongerewe mu kiganiro Ni Nyampinga gisanzwe gikurikirwa cyane n’urubyiruko mu Rwanda.

Ni Nyampinga Sakwe yakinwe n'urubyiruko rufite impano ruturuka mu bice bitandukanye by'igihugu

Igikorwa cyo kumurika Ni Nyampinga Sakwe cyerekaniwemo inkuru zitandukanye z’abakobwa bafite ibikomeye bigejejeho mu buzima barimo abasanzwe bazwi cyane mu Rwanda ndetse n’abafite abo bafatiyeho urugero bakabasha kubaka ubuzima bwabo bahereye kuri bike bafite.

Hanerekanywe ibihangano by’abanyabugeni bikubiyemo inkuru ngirakamaro zitandukanye zakusanyijwe mu bice byo hirya no hino mu Rwanda, byibanda ku kugarurira icyizere abakumva ko ntacyo bashoboye, bakagendera kuri bagenzi babo bagize ubutwari bwo kurenga imbogamizi.

Imibare igaragaza ko ibikorwa by’umushinga wa Ni Nyampinga bigera ku bantu byibuze umunani mu icumi, bafite imyaka iri hejuru y’icumi. Gusa ngo nubwo bimeze gutyo abagera kuri miliyoni 4.3 bakaba bagerwaho n’ibyo ikora ngo icyifuzwa ni ugukomeza imihigo no kwagura umubare w’urubyiruko ufite.

Ibihangano bihugura urubyiruko by'abanyabugeni barimo Binamungu byerekanywe muri iki gikorwa
Ni Nyampinga Sakwe igiye kujya itambuka kuri radiyo zitandukanye mu Rwanda
Ni Nyampinga yibanda ku rubyiruko cyane cyane abakobwa mu bikorwa byayo
Umuyobozi wa Girl Effect mu Rwanda, Emma Roscoe, yavuze ko iyi kinamico izabafasha kwegera urubyiruko birushijeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza