Mushambokazi witabiriye Miss Rwanda yasezeranye muri Islam n’umukunzi we

Yanditswe na Uwiduhaye Theos
Kuya 2 Gashyantare 2021 saa 10:50
Yasuwe :
0 0

Mushambokazi Jordan wari mu bakobwa 20 bahataniye ikamba rya Miss Rwanda mu 2018, yasezeranye muri Islam na Mbonyumuvunyi Karim watumye ahindura idini.

Aba bombi basezeranye ku wa Gatandatu tariki 30 Mutarama 2021, nk’uko byashimangiwe na Sheikh Ndayisenga Ashraf wanditse kuri konti ye ya Instagram agashyiraho ifoto yicaye mu ntebe, akavuga ko yari mu muhango wo gusezeranya Karim na Mushambokazi muri Islam uzwi nka Nikkah.

Ati “Uko niko twari twahabaye ku wa Gatandatu tariki 30 Mutarama 2021, ubwo umuvandimwe Karim na Mushambokazi basezeraga ku buseribateri.”

Yakurikijeho amagambo yo mu rurimi rw’Icyarabu, abasabira umugisha w’Imana n’urugo rwuzuye ibyiza byose bifuza.

Nyuma yo kwandika ubu butumwa, Mushambokazi yagiye kuri konti ye ya Instagram ashima Shiekh Ndayisenga wifatanyije nabo muri uyu muhango, ati “Sheikh mwarakoze cyane kubana natwe mu gikorwa cyacu cya Nikkah.”

Mushambokazi yabwiye IGIHE ko uyu muhango ari wonyine wabayeho ndetse ko kugeza ubu atarabana n’umukunzi we kuko hari indi mihango bagitegereje.

Ati “Turi mu bihe bikomeye bya COVID-19, twabaye dusezeranye mu idini kuko aribyo byashobokaga. Ntabwo twahise tubana n’ubwo hari abajya babikora indi mihango igakorwa nyuma. Twe nibafungura tuzakora indi mihango irimo gusezerana mu murenge, gusaba no gukwa n’ibindi birori. Ntabwo nari kugenda iwacu batarantanga nta kitwirukansa.”

Tariki 04 Ukwakira 2020, nibwo Karim yafashe irembo ndetse Mushambokazi yakirwa mu idini ya Islam bashyigikiwe n’inshuti zabo n’abandi.

Icyo gihe, Mushambokazi yavuze ko uyu musore bamenyanye bagahita bafata umwanzuro wo gukundana.

Ati “Twamenyanye mu 2018, nyuma gato ya Miss Rwanda. Namukundiye ko ari umusore unkunda, w’umukozi kandi ufite gahunda.”

Mushambokazi abajijwe impamvu yahisemo guhindura idini, yavuze ko byatewe n’uko yabonaga umugabo we ashikamye kumurusha.

Ati “Nari nsanzwe nsengera muri Christian Life Assembly mpitamo guhindura nkajya murye kuko nabonaga ashikamye mu idini. Hari igihe ubona umuntu akurusha gushikama mu idini rye. Ni cyo cyatumye mpitamo kumusanga muri islam.”

Mushambokazi ari mu bakobwa bakurikirwa cyane kuri Instagram cyane ko abarenga ibihumbi 88, bahoza ijisho ku mafoto y’ikimero akunda gushyiraho.

Mu 2018 yitabiriye Miss Rwanda ahagarariye Intara y’Amajyepfo, abasha kugera muri 20 bitabiriye umwiherero ariko ntiyagira amahirwe yo kugira igihembo na kimwe yegukana.

Mushambokazi n'umukunzi we bajya banyuzamo bakajya i Dubai mu kiruhuko
Jordan Mushambokazi yarushinze na Mbonyumuvunyi Karim
Mbere, Mushambokazi yajyaga aca amarenga akambara ibintu birebire nk'ibyo abo mu idini ya Islam bakunda kwambara ariko abantu ntibarabukwe ko yamaze kuryinjiramo
Mushambokazi yashimiye Sheikh Ndayisenga Ashraf wabasabiye imigisha myinshi
Sheikh Ndayisenga Ashraf wasezeranyije Mushambokazi n'umukunzi we
Mushambokazi Jordan yitabiriye Miss Rwanda ahagarariye Intara y’Amajyepfo, abasha kugera muri 20 bitabiriye umwiherero
Mushambokazi ni umwe mu bakobwa bafite ikimero gikurura benshi
Mushambokazi yamaze kurushinga
Ni umwe mu bakobwa bavuye muri Miss Rwanda nta kamba yegukanye ariko wakomeje guhangwa ijisho n'itangazamakuru kuko ari umwe mu bataragiye kure uruganda rw'imyidagaduro
Ubwo Mushambokazi yakirwaga mu idini ya Islam, avuye muri CLA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .