Murumuna wa Uwizeye witabiriye Miss East Africa Belgium, ari guhatana muri Miss Rwanda

Yanditswe na Nsengiyumva Emmy
Kuya 17 Gashyantare 2021 saa 12:28
Yasuwe :
0 0

Uwizeye Gentille ni umwe mu bakobwa bigeze kwitabira irushanwa ry’ubwiza mu bakobwa baturuka mu karere ka Afurika y’Iburasirazuba batuye mu Bubiligi mu 2011. Nyuma y’imyaka icumi yitabiriye iri rushanwa, iwabo habonetse undi mwari wifuza kwegukana ikamba ry’ubwiza binyuze muri Miss Rwanda.

Nubwo Uwizeye nta kamba yabashije kwegukana muri Miss East Africa Belgium yitabiriye mu 2011, murumuna we witwa Lea Mutesi ari guhatanira ikamba mu irushanwa rya Miss Rwanda mu 2021.

Lea Mutesi yitabiriye irushanwa rya Miss Rwanda 2021 ahagarariye Intara y’Amajyaruguru aho asanzwe atuye ndetse anakorera imirimo ye ya buri munsi.

Uyu mukobwa w’imyaka 22, asanzwe ari umunyeshuri mu mwaka wa gatatu muri Kaminuza ya UTB aho akurikirana amasomo ya ‘Tourism, Travel and Management’.

Mutesi mu kiganiro kigufi yagiranye na IGIHE, yavuze ko kwitabira irushanwa rya Miss Rwanda, byatewe n’uko ari ibintu yakuze akunda ariko by’umwihariko ubwo yabonaga mukuru we yitabira Miss East Africa Belgium.

Ati “Nakuze mbikunda, ariko by’umwihariko byaturutse cyane ku gukura mbona mukuru wanjye yitabira irushanwa ry’ubwiza. Kwitabira Miss Rwanda ni ishema kuri njye kuko mbona ari urubuga rushobora gutuma inzozi zanjye zirushaho kuba impamo.”

Uyu mukobwa usanzwe ari umunyamideri n’umunyabugeni ukorera muri ‘Inshuti Art Center’ ikigo giherereye mu mujyi wa Musanze.

Mutesi ni umwe mu bakobwa bari guhatanira guhagararira Intara y’Amajyaruguru mu irushanwa rya Miss Rwanda 2021.

Abaye umwe mu bakobwa bavuka bakanatura mu ntara y’Amajyaruguru bitabiriye iri rushanwa, aba bakunze gushyigikirwa bikomeye, guhera ku baturage b’iyi ntara kugeza ku buyobozi bwayo.

Nubwo nta kamba yegukanye muri Miss East Africa Belgium 2011, yabereye icyitegererezo murumuna we witabiriye Miss Rwanda 2021
Uwizeye Gentille ari mu bakobwa bahataniraga ikamba rya Miss East Africa Belgium 2011. Murumuna we yageze ikirenge mu cye yitabira Miss Rwanda 2021
Lea Mutesi avuga ko kwitabira Miss Rwanda bizamubera urubuga rwiza rwo gukabya inzozi ze
Lea Mutesi ni murumuna wa Uwizeye Gentille witabiriye Miss East Africa Belgium 2011
Mutesi Lea ni umwe mu bakobwa bahatanira guhagararira Intara y'Amajyaruguru muri Miss Rwanda 2021
Mutesi Lea asanzwe ari umunyamideri n’umunyabugeni ukorera muri ‘Inshuti Art Center’ ikigo giherereye mu mujyi wa Musanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .