Mukangwije wambuwe ikamba rya Miss Elegancy Rwanda 2018 yanze kuritanga

Yanditswe na Muvunyi Arsène
Kuya 22 Kamena 2019 saa 10:03
Yasuwe :
0 0

Mukangwije Rosine wambuwe ikamba rya Miss Elegancy Rwanda 2018, yarahiriye ko ataritanga kuko ibyashyingiweho aryamburwa atari byo.

Tariki 08 Nzeri 2018 nibwo hasojwe irushanwa rya Miss & Mr Elegancy Rwanda 2018, aho ryarangiye hatowe Mukangwije Rosine nk’umukobwa uhiga abandi mu bushongore na Niyirora Divic atorwa ku ruhande rw’abahungu.

Ni irushanwa ryari ribaye ku nshuro ya kabiri, nyuma y’iryaherukaga mu mwaka wa 2016.

Nyuma y’amezi icyenda Mukangwije atowe nka Miss Elegancy Rwanda 2018, kuri uyu wa 21 Kamena 2019 ubuyobozi bw’irushanwa bwamwandikiye ibaruwa bumumenyesha ko yambuwe ikamba kubera imyitwarire mibi.

Iyi baruwa yasinywe n’Umuyobozi mukuru wa Miss & Mr Elegancy Rwanda, Uwamahoro Claudette harimo ko Mukangwije azize kubahuka no gusuzugura abayobozi, gusebya kampani itegura iri rushanwa, guta ishuri [yambitswe ikamba yiga mu mashuri yisumbuye] n’ibindi.

Yasabwe gusubiza ikamba bitarenze tariki 23 Kamena 2019, kuko atubahirije ibikubiye mu masezerano bagiranye tariki 8 Ukwakira 2018.

Mbere y’uko Mukangwije yamburwa ikamba yari yabwiye IGIHE ko abateguye Miss & Mr Elegancy Rwanda, banze kubafasha gushyira mu bikorwa imishinga yabo kandi bari babibemereye.

Uwamahoro Claudette utegura aya marushanwa yari yabwiye IGIHE ko ntacyo yabitangazaho, ahubwo ko ari gukusanya ibimenyetso bigaragaraza amafuti y’uyu mukobwa, akayashyira hanze.

Ikamba ntaryo ntanga…

Mu kiganiro yagiranye na IGIHE Mukangwije Rosine yavuze ko amakosa agera ku 10 ashinjwa n’abategura irushanwa rya Miss & Mr Elegancy Rwanda, ari amahimbano, ahubwo ko byatewe n’igitutu yabashyizeho abishyuza ibihembo babemereye.

Ati “Twabishyuje amafaranga y’ibihembo n’imishinga twemerewe ntitubibone, kuko ahanini ari njye uri kubabwira ko umutima bafite utari mwiza…”

Mukangwije yavuze ko abayobozi batigeze bemera kubatega amatwi ngo bumvikane uburyo bagombaga kubafasha gushyira mu bikorwa imishinga yabo.

Ati “Uriya mukobwa yambwiye ko nagombaga gukoresha izina ryanjye, ngo niyo nta kintu bari kumpa nari kurikoresha nk’uko abandi barikoresha.”

Ku bijyanye no kuba yarataye ishuri biri mu byatumye yamburwa ikamba, yavuze ko yiga ahubwo ko asigaye yiga nijoro, ndetse ko afite icyangombwa cyerekana ko afite kaminuza yo muri Canada yamwemereye kuyigamo.

Uyu mukobwa yavuze ko adashobora gutanga ikamba nk’uko yabitegetswe kuko nta kosa yigeze akora ryatuma atanga ikamba umwaka utarangiye

Ati “Ntaryo nzabaha, nta mpamvu bampaye yo kuritanga, nibampa impamvu nzaritanga kuko n’ubundi nta kintu kinini rimariye. Icyo ntashaka nibareke kunsebya. Nta kosa na rimwe nakoze nk’uko babivuga. Kandi niba nta n’impamvu nibashyire mu bikorwa ibyo bemeye umuntu akore imishinga ye bareke kudusiga urubwa.”

Twagerageje kuvugisha abategura iri rushanwa ngo twumve ikizakurikira mu gihe Mukangwije yaba yanze gutanga ikamba ariko ntibyadukundira.

Mukangwije ngo ntabwo atanga ikamba batamusobanuriye impamvu aryambuwe
Miss Elegancy Rwanda 2018 yavuze ko yazize kwishyuza ibihembo bemerewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza