Morgan Freeman yafashe amashusho ya filime kuri Jenoside yakorewe Abatutsi

Yanditswe na Munyengabe Murungi Sabin
Kuya 15 Gicurasi 2017 saa 07:14
Yasuwe :
1 0

Umusaza w’ikirangirire mu mwuga wa sinema, Morgan Freeman yatangiye gukora umushinga wa filime mbarankuru ku mateka ya Jenoside yakorewe Abatutsi muri Mata 1994.

Morgan Freeman usanzwe akina filime akanaziyobora, agiye kumara iminsi itandatu mu Rwanda kuko yahageze kuwa 11 Gicurasi 2017. Yaje aherekejwe n’itsinda ry’abantu bagera kuri bane gusa akigera mu gihugu impamvu nyamukuru y’uruzinduko rwe ntiyahise imenyekana.

Kuri uyu wa Mbere tariki ya 15 Gicurasi 2017, Morgan Freeman yasuye urwibutso rwa Jenoside rwa Kigali ruri ku Gisozi, yahavuye yize birambuye amateka y’ubu bwicanyi bwahitanye Abatutsi basaga miliyoni anasobanurirwa uburyo igihugu cyiyubatse mu myaka 23 ishize.

Yamaze igice cy’umunsi kuri uru rwibutso aho yafatiye amashusho ya filime mbarankuru[itaratangazwa izina] ku mateka ya Jenoside yakorewe Abatutsi. Morgan Freeman yanabonanye na bamwe mu barokotse Jenoside bamuha ubuhamya n’ubuzima babayemo muri iki gihe nyuma yo kurokoka.

Mu butumwa yasize ku rwibutso rwa Kigali, Morgan Freeman yagize ati “Turi hano, twaje hano nk’itsinda rya filime kugira ngo tuvuge kuri Jenoside yakorewe Abatutsi ariko twaje no kwigira ku bwiyunge bwanyu. Ibyo twize byatumye twishimira ko twabamenye.”

Yongeyeho ati “Icya kabiri, dufite icyizere cy’ahazaza ha muntu kuko ibyo mwagezeho nyuma ya Jenoside n’ubwiyunge bitwereka ko amahoro ashoboka.”

Mu minsi itanu Morgan Freeman amaze mu Rwanda yahakoreye ibikorwa bitandukanye ndetse kuwa Gatandatu tariki 13 Gicurasi 2017 yasuye ingagi muri Pariki y’Ibirunga ahava abonanye n’abo mu miryango y’abahoze ari ba rushimusi bafite ubuhamya bwihariye bwo kuba muri iki gihe ari bo bafite uruhare mu kubungabunga umutekano w’inyamaswa.

Morgan Freeman yavuye mu Rwanda afashe amashusho y'iyi filime, azavugamo n'amateka ya Jenoside yakorewe Abatutsi

Morgan Freeman yavutse ku wa 1 Kamena 1937, ni umukinnyi wa filime ubimazemo imyaka irenga 52 ndetse akagira ubuhanga bukomeye mu kuzitunganya. Uyu mukambwe yatwaye igihembo cya Academy Award mu 2005 nka Best Supporting Actor muri filime Million Dollar Baby (2004). Anafite ibindi bihembo bikomeye birimo Golden Globe Award na Screen Actors Guild Award.

Ikuzo rye rikomezwa cyane n’ubuhanga agaragaza mu gukina mu myanya yose ahabwa muri filime yagaragayemo, azwi mu zakoze amateka zirimo iyitwa Street Smart (1987), Driving Miss Daisy (1989), The Shawshank Redemption (1994) and Invictus (2009) Glory (1989), Robin Hood: Prince of Thieves (1991), Seven (1995), Deep Impact (1998), The Sum of All Fears (2002), Bruce Almighty (2003), The Dark Knight Trilogy (2005–2012), The Lego Movie (2014), Lucy (2014).

Morgan Freeman n'Umuyobozi w'Urwibutso rwa Kigali, Honore Gatera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza