Mkombozi wahunze u Burundi agiye gukora igitaramo cya mbere i Kigali

Yanditswe na Munyengabe Murungi Sabin
Kuya 15 Nzeri 2016 saa 10:15
Yasuwe : XX
0

Umuraperi Nzeyimana Thomas wamamaye muri Afurika y’Uburasirazuba nka Mkombozi agiye gukora igitaramo cya mbere mu Rwanda nyuma y’imyaka igera ku icumi akora umuziki.

Mkombozi yamamaye cyane mu ndirimbo zirimo iyitwa “East Africa”, “Mchezo wa Ndani”, “Hasta la victoria siempre” na “Nzeyimana” yasohoye muri Nzeri umwaka wa 2014 bigatuma agirana amakimbirane na Leta y’u Burundi.

Mu kiganiro na IGIHE, Mkombozi yavuze ko amaze imyaka ibiri mu buhungiro ndetse ko mu bihugu byose yagezemo yagiye ahakorera ibitaramo. Yavuze ko amaze ukwezi kumwe yimukiye i Kigali gusa ahafite iminsi mike agahita ajya i Burayi, yanze kugenda atiyeretse abafana be bityo ategura igitaramo ari nacyo cya mbere agiye gukorera mu Rwanda.

Ati “Mu Rwanda mpamaze ukwezi kumwe, ndi mu buhungiro ngakomeza kubifatanya no gukora umuziki wanjye, nari mvuye i Kampala na Abidjan naho hari abafana benshi […] Nifuje kuza gutura mu Rwanda mu gihe ibibazo bitarakemuka iwacu ariko mpafite igihe gito ngahita njya i Burayi.”

Yongeraho ati “Nanze kujya i Burayi ntararirimbira abafana, nzahagaruka nyuma y’amezi abiri, kugenda ntakoze igitaramo bakazumva na none ngo nagarutse ntabwo byaba bisa neza.”

Igitaramo cya Mkombozi kizabera kuri Car Wash ku gicamunsi cyo kuwa Gatandatu tariki ya 17 Nzeri 2016. Uyu muhanzi azaba afatanyije n’abandi bahanzi barimo Uncle Austin, Bruce Melody, Sat B, RFlow, Elvis Shaggy n’abandi biganjemo abakizamuka bakomoka i Burundi.

Mkombozi amaze imyaka ibiri ari mu buhungiro

Ati “Nanze kuririmba njyenyine, hano mbafite inshuti, hari abahanzi bagenzi banjye bakunzwe tuzafatanya, nizeye ko abafana bazaza ari benshi kundeba, by’umwihariko Abarundi bamperuka tukira mu gihugu cyacu ndabizeza ko bazabona igitaramo cyiza.”

Kwinjira muri iki gitaramo ni amafaranga igihumbi ahasanzwe hose ndetse na bitatu mu myanya y’icyubahiro, igitaramo kizatangira saa cyenda z’amanywa gisozwe saa kumi n’ebyiri z’umugoroba.

Nzeyimana, indirimbo yatumye Mkombozi ahigwa n’u Burundi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE