Miss World 2019 izitabirwa na Nimwiza Meghan yakuwe muri Thailand bitunguranye

Yanditswe na Muvunyi Arsène
Kuya 4 Nyakanga 2019 saa 08:06
Yasuwe :
0 0

Irushanwa rya Miss World ryagombaga kubera muri Thailand ryimuriwe i Londres mu Bwongereza, mu buryo butunguranye.

Ku wa 2 Nyakanga 2019, umuyobozi w’irushanwa rya Miss World, Julia Morley, yatangaje ko baryimuriye mu mujyi wa Londres ahazahurira abakobwa 130, bahagarariye ibihugu bitandukanye barimo na Nimwiza Meghan wabaye Nyampinga w’u Rwanda 2019.

Yatangaje ko ikamba rizatangwa tariki 14 Ukuboza 2019 nyuma y’ibyumweru bitatu aba bakobwa bazaba bamaze barushanwa mu byiciro bitandukanye banatemberezwa ahantu nyaburanga ho muri uyu mujyi.

Nta mpamvu yasobanuwe yatumye iri rushanwa rikurwa mu mujyi wa Bangkok rikajyanwa i Londres ariko Julia Morley yavuze ko ari umujyi mwiza by’umwihariko iri rushanwa ryatangiriyemo.

Ati “Londres ni umujyi mwiza cyane ku Isi ukwiye gusurwa. Niho irushanwa rya Miss World ryatangiriye 1951 nka kimwe mu birori bikomeye byaberaga mu Bwongereza. Tugiye kuhakorera ibirori by’akataraboneka.”

Yongeyeho ko irushanwa rya Miss World 2020 ari ryo rizabera muri Thailand aho hazaba hizihizwa isabukuru y’imyaka 70 rimaze ritangiye.

Mu myaka ibiri ishize irushanwa rya Miss World ryabereye mu mujyi wa Sanya mu Bushinwa.

Muri uyu mwaka hazasimburwa Vanessa Ponce de León ukomoka muri Mexique, wari watsinze abarimo umunyarwandakazi Iradukunda Liliane.

Ni ku nshuro ya kane u Rwanda ruzaba ruserukiwe muri iri rushanwa nyuma ya Mutesi Jolly wabimburiye abandi mu 2016, Iradukunda Elsa mu 2017, Iradukunda Liliane mu 2018 na Nimwiza Meghan mu 2019.

Nimwiza Meghan niwe uzahagararira u Rwanda muri Miss World 2019
Vanessa Ponce niwe ufite ikamba rya Miss World 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza