Miss Sonia Rolland yahishuye icyatumye yifotoza yambaye ubusa

Yanditswe na Munyengabe Murungi Sabin
Kuya 5 Nzeri 2016 saa 12:28
Yasuwe :
0 0

Icyumweru kirashize umugabo wa Sonia Rolland, Jalil Lespert asohoye ifoto y’umugore we yambaye ubusa igice cyo hejuru agaragaza ko bishimiye bikomeye ibihe bagiranye mu biruhuko.

Iyi foto ya Miss Sonia Rolland yakurikiwe n’ibitutsi ndetse n’amagambo mabi benshi bamwandikiye ku mbuga nkoranyambaga bamubwira ko yatandukiriye. Yagiranye ikiganiro na Journal Du Dimanche avuga ko ‘abamwoherereza ibitutsi bamuziza ubusa kuko yabikoze yabitekerejeho.’

Sonia Rolland wabaye Nyampinga w’u Bufaransa mu mwaka wa 2000 yavuze ko yifotoje yambaye ubusa hejuru nk’inzira yashakaga kunyuzamo ubutumwa yageneye abagore ababwira ko ‘bakwiye kwigirira icyizere’.

Yagize ati “Ku myaka 35 mfite amahirwe yo kuba mbasha kwerekana umubiri wanjye. Muri iriya foto, nashakaga gutambutsa ubutumwa ku bagore mbabwira ko bakwiye kwigirira icyizere. Mu buryo busanzwe, nsanga ntacyo bitwaye kwerekana umubiri wanjye.”

Yongeyeho ati “Nubwo atari ko abantu bose babyumva, ishema ry’umugore ni hariya rigaragarira. Dushobora kwigaragaza ariko tutiyandagaje.”

Sonia Rolland Uwitonze yaherukaga gushyira hanze amafoto ye yambaye ubusa muri Nyakanga 2015 bwo yari mu kiruhuko n’umugabo we ku kirwa cya Martinique kimwe mu bigize Antilles.

Miss Uwitonze Sonia Rolland w’imyaka 35 ni Umunyarwandakazi w’uburanga buhebuje wabaye Nyampinga w’u Bufaransa mu mwaka wa 2000. Yashakanye na Jalil Lespert muri 2009, bibarutse imfura yabo Kahina mu mwaka wa 2010.

Mu biruhuko bajyanye n’abakobwa babo babiri Tess [uwo Sonia Rolland yabyaranye na Chris¬tophe Rocan¬court bahoze bakundana muri 2007] na Kahina [yabyaranye n’umugabo we Jalil Lespert].

Jalil Lespert yashyize hanze iyi foto abinyujije kuri Instagram aho abantu benshi bagaragaje ko bishimiye imiterere y’umubiri wa Sonia Rolland umaze imyaka 16 abaye Nyampinga w’u Bufaransa. Ku ifoto, Sonia Rolland yari yambaye ingofero mu gituza nta kintu yakinzeho ndetse ibere rye ry’ibumoso riragaragara.

Sonia n'abakobwa be babiri Tess na Kahina
Sonia Rolland n'umugabo we Jalil Lespert

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza