Miss Rwanda yaharuriye inzira abatabarika: Imbamutima z’abakobwa bayikesha byose

Yanditswe na Uwiduhaye Theos
Kuya 9 Gashyantare 2021 saa 03:00
Yasuwe :
0 0

Imyaka 11 irihiritse irushanwa rya Miss Rwanda ryongeye kubaho mu buryo buhoraho ndetse rimaze gufasha benshi mu bakobwa kugera nzozi zabo, hari benshi twamenye kubera ryo n’abarikesha umugati kugeza ubu.

Uretse Bahati Grace watowe mu 2009 kugera kuri Nishimwe Naomie ufite iriheruka bamenyekanye kubera kwegukana ikamba, hari n’abandi bakobwa benshi banyuze muri iri rushanwa ribafungurira amarembo, bakuza impano zabo n’ibindi.

Hari abo itangazamakuru ryatunze camera bitabiriye iri rushanwa bagakora udushya, abo ubavuze ukibagirwa mu 2017 ubwo Uwase Hirwa Honorine yavugaga ko ‘ateye nk’igisabo’ waba utarakurikiranye iri rushanwa neza.

Iyo uganiriye n’aba bakobwa bose ubu bakubwira ko ubuzima bwabo bwahindutse cyane ugereranyije n’uko bari babayeho mbere yo kwitabira, ndetse bakaba basigaye basarura agatubutse biturutse ku bwamamare bakuye muri iri rushanwa.

Si aba gusa! N’abandi batandukanye bagiye bagera muri iri rushanwa yaba mu majonjora y’intara cyangwa muri 20 bitabira umwiherero bose bakubwira ko hari byinshi bungutse biturutse kuri iri rushanwa.

Nka Uwase Fiona witabiriye Miss Rwanda mu 2018 ariko ntabashe kwegukana ikamba nyuma akaza gushinga ikinyamakuru cye Ireme Magazine azajya anyuzamo inkuru zigamije gufasha urubyiruko kwiteza imbere, yavuze ko yungukiye byinshi muri iri rushanwa.

Ati “Icya mbere nungutse ni ukumenya kuvugira mu ruhame, umushinga ufite bigufasha kuwubonera ubufasha byoroshye. Ni umuyoboro ugufasha iyo uwukoresheje. Nkanjye umushinga wanjye wafashijwe na Miss Rwanda kuko ntabwo byansabaga kwivuga cyane aho nagendaga ngiye kwaka ubufasha. Byanafashije mu tundi tuntu umuntu aba agenda akora ikindi bigufasha kumenyana n’abantu batandukanye.”

Abwira abakobwa bashaka kwitabira iri rushanwa uyu mwaka kutazagenda batekereza ikamba cyangwa imodoka ngo abe aribyo bagenda bashyize imbere kurusha ibindi bintu.

Ati “Ikintu cya mbere cy’ibanze ntibazaterekereze ikamba cyangwa imodoka, bazagende biteguye ko bashobora kuba Miss Rwanda cyagwa ntibikunde. Iyo wagiye ushaka ikamba ntabwo ibindi ubonye ubyishimira. Ni umuyoboro mwiza wo kugaragaza ibitekerezo. Umuntu ugiye muri iri rushanwa azamenye ko bigira ingaruka nziza n’imbi. Ugomba kugenda witeguye kuko ni nk’aho ubu ugiye mu rugamba rwo kumenyekana.”

Nzakorerimana Gloria nawe witabiriye iri rushanwa mu 2018 ntabashe kugira ikamba yegukana yavuze ko n’ubwo atagize amahirwe yo kwegukana ikamba hari byinshi nyuma yo kwitabira iri rushanwa.

Ati “Icyo byamfashije cya mbere ni uko nitinyutse nkumva ko ikintu cyose gishoboka. Nakuyemo inshuti nyinshi bituma menyana n’abantu benshi. Ikindi byampaye akazi, nyuma y’akazi niyishyurira ishuri ngiye mu mwaka wa nyuma muri ULK.”

Iribagiza Patience wari uri mu bakobwa batanu batorewe guhagararira Uburasirazuba muri Miss Rwanda mu 2017, akaza no kuba muri 15 bitabiriye umwiherero ariko ntabashe kwegukana ikamba, nawe yavuze ko iri rushanwa rifasha cyane.

Uyu mukobwa mu 2018 yashinze umuryango yise Afro Ark, agamije gukomeza guhangana na Virusi itera SIDA, aganiriza abakora uburaya ababyemeye bagapimwa ndetse n’abandi biganjemo urubyiruko.

Yagize ati “Miss Rwanda ni umuyoboro mwiza wo kugaragaza ibitekerezo byawe. Bigufasha gufunguka kurushaho mu gihe wagiyemo ufite intego cyane ko bituma uhura n’abantu benshi batandukanye. Biguha ishusho ngari y’icyo ushaka gukora no kugeraho muri rusange. Njyewe ni irushanwa ryamfashije gutekereza byagutse ku mushinga wanjye.”

Ubutumwa bwe ku bakobwa bashaka kwitabira uyu mwaka, avuga ko bakwiriye kwitabira iri rushanwa bafite intego atari gupfa kugenda gusa kubera ko umuntu abona ari mwiza.

Ati “Bajyeyo bafite intego atari ukuvuga ngo ni uko abona ari mwiza. Uwo muyoboro ugiyeho ugiye kuwukoresha gute mu gihe waba uvuye aho. Kuba uhagurutse mu bakobwa ibihumbi bingahe mu gihugu, bigomba kuguha intego, kugira ngo n’udatwara n’ikamba icyo wahagurukanye ujya mu irushanwa ntuzagiteshwe n’uko utegukanye ikamba. Iyo irushanwa rirangiye uba ubaye icyamamare, ubu ugomba guhitamo inzira ebyiri zirimo guhitamo gukomeza inzira ijyanye n’umushinga wawe cyangwa kujyana n’ibije byose kuko uba warabonywe n’abantu benshi.”

Umuratwa Kate Anitha wari mu bakobwa 20 babashije kugera mu mwiherero wa Miss Rwanda mu 2020 uherutse gutangira umwuga w’ubuhinzi yavuze ko iri rushanwa agira ijwi ryagutse muri rubanda.

Ati “Miss Rwanda yatumye ngira ijwi rinini kurusha iryo nari mfite, hari ahandi hantu ngera ubu bikanyorohera kwivuga. Igice cy’izina ryanjye ryarahindutse. Hari ukuntu abantu batangira kugufata mu buryo bwiza bitandukanye n’uko wari umeze. Hari amasosiyete twakoranye kubera Miss Rwanda mbona amafaranga ndetse biza kumfasha gutangira umushinga mfite w’ubuhinzi. Nungutse inshuti nyinshi. Hari abantu ugeraho byihuse kubera Miss Rwanda.”

Icyo ahurizaho na bagenzi twaganiriye avuga ko icya mbere muri iri rushanwa ari ukwigirira icyizere, akababwira ko badakwiriye kuzagenda biteze ibintu byinshi kuko byatuma mu gihe baba batsinzwe bacika intege.

Magingo aya, Umuratwa yatangiye umwuga w’ubuhinzi nyuma y’uko asanze wunguka kandi wamufasha mu ntego ze zo kwigira.

Irushanwa rya Miss Rwanda ritegurwa ubu na Rwanda Inspiration Back Up, ryongeye kubyutsa umutwe mu 2009.

Nzakorerimana Gloria yavuze ko nyuma yo kwitabira Miss Rwanda, iri rushanwa ryamufunguriye amarembo mu byo akora byose
Nzakorerimana Gloria yitabiriye Miss Rwanda mu 2018
Umuratwa Kate Anitha ni umwe mu bakobwa bahataniraga ikamba rya Miss Rwanda rya 2020
Uwase Fiona avuga ko kwitabira iri rushanwa byamufashije mu buryo bukomeye]
Iribagiza Patience ufite imyaka 22, agira inama abashaka kwitabira iri rushanwa kujyana intego muri iri rushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .