Urwibutso ku bisubizo by’abakobwa bazahagararira Amajyepfo muri Miss Rwanda 2020 (Video)

Yanditswe na Nsengiyumva Emmy
Kuya 9 Mutarama 2020 saa 10:30
Yasuwe :
0 0

Amajonjora y’ibanze ya Miss Rwanda 2020 ageze ahakomeye kuri ubu hagiye gushakishwa abakobwa bazahagararira Intara y’Iburasirazuba mu gikorwa giteganyijwe ku wa Gatandatu tariki 11 Mutarama 2020.

Mbere y’aha habanje Intara y’Amajyepfo yagaragayemo imishinga irindwi y’abakobwa b’ubwiza bazahatana ku rwego rw’igihugu.

Mu misubirize iyisobanura buri mukobwa yavuye imuzi icyo yakora aramutse abaye Miss Rwanda 2020, hagendewe ku kimero cye, uko asubiza n’igitekerezo cye ndetse n’ibindi bitandukanye, abagize akanama nkemurampaka bakamuha amanota.

Abakobwa 17 nibo bari bitabiriye ijonjora rya Miss Rwanda 2020 mu Ntara y’Amajyepfo bujuje ibisabwa bakemererwa guhatana. Abangana na 79 nibo bari biyandikishije. Uyu niwo mubare munini wari ubonetse kuva irushanwa ry’uyu mwaka ryatangira.

Abakobwa babashije gukomeza muri Miss Rwanda 2020 mu ijonjora ryo mu Ntara y’Amajyepfo ni Umwariwase Claudette, Ingabire Jolie Ange, Musana Teta Hense, Mumporeze Josiane, Umutoniwase Nadia, Imanishimwe Hope Joy na Igihozo Diane.

Nyuma y’iri jonjora hatahiwe iryo mu Ntara y’Iburasirazuba rizabera kuri Silent Hill Hotel riteganyijwe mu mpera z’icyumweru.

Imisubirize y’abakobwa bazahagararira Intara y’Amajyepfo muri Miss Rwanda 2020

-  Umwariwase Claudette, afite uburebure bwa 1.72m. Yize mu Ishami ry’Imibare, Ubukungu n’Ubumenyi bw’Isi (MEG) mu mashuri yisumbuye.

Yavuze ko aramutse abaye Nyampinga w’u Rwanda yafatanya na Leta kumvisha abatuye mu manegeka kuhava kuko kuba bahakurwa atari uko babanze ahubwo ari ukurengera ubuzima bwabo.

-  Ingabire Jolie Ange, afite uburebure bwa 1.75m. Yize mu Ishami ry’Amateka, Ubukungu n’Ubuvanganzo (History, Economics & Literature) muri Groupe Scolaire St. Bernadette.

Yavuze ko naramuka atowe azateza imbere umuco wo kwizigamira cyane cyane mu rubyiruko.

-  Musana Teta Hense, afite uburebure bwa 1.71m. Yize mu Ishami ry’Imibare, Ubutabire n’Ibinyabuzima (MCB).

Yavuze ko aramutse atowe yashyira imbaraga mu kurwanya inda ziterwa abangavu.

-  Mumporeze Josiane, afite uburebure bwa 1.75m. Yiga mu Ishami ry’ibijyanye no gutwara ba Mukerarugendo (Tour & Travel Operations) muri Kaminuza ya UTB.

Yavuze ko atorewe kuba Nyampinga w’u Rwanda yashyira imbaraga mu guteza imbere ubukerarugendo.

-  Umutoniwase Nadia, afite uburebure bwa 1.73m. Yiga mu Ishami ry’Itangazamakuru muri Kaminuza y’u Rwanda, Ishami rya Huye.

Afite umushinga w’ubukangurambaga mu rubyiruko rukagira umuco wo kutanena imirimo mu rwego rwo guhangana n’ubushomeri.

-  Imanishimwe Hope Joy, afite uburebure bwa 1.70m. Yiga mu Ishami ry’Ibijyanye n’Iyobokamana (Social & Religion Studies Education) mu Karere ka Muhanga.

Yavuze ko yakuranye inzozi zo kuba Nyampinga, yabikundishijwe n’uburyo mu muryango wabo bateguraga irushanwa nk’iryo, akaba arifite inshuro eshatu.

Afite umushinga wo gufasha abangavu batwara inda, akabahuriza mu matsinda yo kwiteza imbere n’igihugu bikakigirira akamaro muri Made In Rwanda.

-  Igihozo Diane, afite uburebure bwa 1.71m. Yize mu Ishami rya Computer Networking. Afite umushinga wo kurwanya inda ziterwa abangavu abinyujije mu kubahuriza mu midugudu afatanyije n’inzego bireba.

Yavuze ko yanasaba urubyiruko kwirinda irari, ikigare kitari cyiza bigatuma hagabanuka umubare w’abangavu batwara inda uri hejuru mu Rwanda.

Abatarakomeje mu Ntara y'Amajyepfo bashimira abatsindiye guhagararira aka gace muri Miss Rwanda 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza