Kwizera Peace yageze i Cotonou guserukira u Rwanda muri Miss Naïade (Amafoto)

Yanditswe na Munyengabe Murungi Sabin
Kuya 12 Ugushyingo 2016 saa 03:49
Yasuwe : XX
0

Nyampinga Kwizera Peace Ndaruhutse yamaze kugera mu Mujyi wa Cotonou muri Benin, yitabiriye irushanwa rikomeye ry’ubwiza rigomba guhuza abakobwa bo mu bihugu 23 bya Afurika.

Miss Kwizera Peace yahagurutse ku Kibuga cy’indege cya Kigali ahagana saa munani z’igicamunsi cyo kuri uyu wa 11 Ugushyingo 2016, yasesekaye i Cotonou ahagana saa mbili n’igice z’ijoro yakirwa na bake mu bagize komite yateguye iri rushanwa ry’ubwiza uyu mwaka.

Yagombaga kuba yahagurukanye na Nyampinga w’u Rwanda Mutesi Jolly ariko ntiyabashije kujya muri Benin ‘ngo kubera akazi kenshi na gahunda zahuriranye’ bituma asubika urugendo. Mutesi Jolly we yatumiwe nk’umwe mu bakobwa bafite ikamba bazatanga ibiganiro ku rubyiruko mu kurugira inama no kurwereka umurongo rwagenderaho mu kwiteza imbere.

Kwizera Peace yabwiye IGIHE ko yiteguye gukoresha imbaraga zose zishoboka akazatatwara iri kamba ndetse no guhesha ishema u Rwanda imbere y’ibihugu bigera kuri 23 byo ku Mugabane wa Afurika.

Irushanwa rya Miss Naïade riteganyijwe kuba ku nshuro ya 13 mu ijoro ryo kuri uyu wa Gatandatu tariki ya 12 Ugushyingo 2016. Ubusanzwe rihuza abakobwa bo mu bihugu bya Afurika babaye ibisonga bya Nyampinga muri buri gihugu.

Abakobwa bagomba guhatana hafi ya bose baraye bageze mu Mujyi wa Cotonou uretse bake batinze kubera ibibazo by’ingendo z’indege barimo nka Nyampinga w’u Burundi waraye muri Kenya akaba na we agomba kuhagera ku gicamunsi cyo kuri uyu wa Gatandatu.

Umunyamakuru wa IGIHE uri mu Mujyi wa Cotonou yabonye bamwe muri ba Nyampinga bahageze mu gicuku cyo kuri uyu wa Gatanu barimo uwa Togo, Nigeria, Cameroun, Gabon.

Ni ku nshuro ya gatatu u Rwanda rwitabiriye iri rushanwa mu myaka 13 rimaze riba. Mu mwaka wa 2011 Rusaro Carine yararyitabiriye aba uwa mbere ahembwa miliyoni eshatu, muri 2013 Umulisa Viviane yarijemo atahana umwanya wa kabiri na miliyoni ebyiri.

Kwizera Peace yajyanye na nyina muri Benin
Kwizera Peace ku kibuga cy'indege cya Kigali
Yageze muri Benin mu ijoro ryo kuri uyu wa Gatanu
Ngo yiteguye gukoresha imbaraga zose akazatsinda irushanwa

Munyengabe Murungi Sabin/Cotonou-Benin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza