Miss Jojo yarushinze (Amafoto)

Yanditswe na Munyengabe Murungi Sabin
Kuya 30 Nyakanga 2017 saa 12:00
Yasuwe :
0 0

Umuririmbyi wakunzwe mu Rwanda, Miss Jojo yarushinganye n’umusore witwa Salim Minani nyuma y’amezi ane basezeranye imbere y’amategeko.

Miss Jojo washyize ku ruhande iby’umuziki yarushinze kuri uyu wa Gatandatu tariki ya 29 Nyakanga 2017 mu birori byabereye ahitwa Rugende Park mu Karere ka Kicukiro.

Uyu munsi wari ibirori by’impurirane kuri Miss Jojo, nibwo habaye umuhango wo gusaba no gukwa [ku gicamunsi] hanyuma saa kumi n’imwe hatangira ibirori byo kwishimana n’abatumiwe.

Mani Martin na Nyamitali bari basanzwe ari inshuti magara za Miss Jojo agikora cyane ibya muzika ni bo bamuririmbiye mu kumusohora mu birori byo gusaba no gukwa. Mu bandi bazwi mu muziki w’u Rwanda batashye ubu bukwe harimo Muyoboke Alex ndetse na Aimable Twahirwa [umukemurampaka uzwi muri PGGSS].

Ubu bukwe bwa Miss Jojo na Salim Minani bwatangiye guhwihwiswa mu mpera za Mutarama 2017 gusa bagiye babihakana kenshi. Muri Werurwe 2017 basezeranye imbere y’amategeko, ariko muri icyo gihe cyose Jojo yanze kugira icyo atangaza cyerekeye umusore barushinganye.

Salim Minani na Miss Jojo barushinze

Incamake kuri Miss Jojo warushinze

Miss Jojo [wahoze yitwa Uwineza Josiane] nyuma yo kwinjira muri Islam yahise ahindura izina afata irya Uwineza Iman Josiane, yinjiye muri iri dini abisabwe n’umusore witwa Munyampundu Saleh bahoze bakundana.

Miss Jojo uri mu bakobwa bazwi cyane mu muziki ugezweho, yamamaye cyane ku ndirimbo zirimo nka Mbwira, Tukabyine, Ndinde n’izindi.

Yamamaye cyane ku bw’urukundo yakundanye n’umusore witwa Munyampundu Saleh, byanavugwaga ko bari bagiye kubana bitewe n’uko yari amaze guhindura idini akaba umuyisilamu asanzemo umukunzi we ariko bakaza gutandukana.

Yakundanye igihe kirekire na Saleh ari na we watumye ahindura idini akaba umuyisilamu. Urukundo rwabo rwajemo kidobya mu mwaka wa 2011 ari nabwo byatangajwe ko batandukanye bya burundu, kuva icyo gihe nta wundi musore yakundanye na we wamenyekanye.

Miss Jojo yakunze kugaragara mu bitaramo bikangurira urubyiruko n’Abanyarwanda muri rusange kwirinda ibiyobyabwenge n’icyorezo cya SIDA ndetse no guharanira iterambere ry’ejo hazaza.

Muri Nyakanga 2012, Miss Jojo yavuze ko abaye ahagaritse umuziki agiye kwita ku bikorwa byo gufasha abatishoboye abinyujije mu ishyirahamwe ry’Urubyiruko rw’abayoboke b’idini ya Islam abarizwamo ryitwa ‘AJMD Njye Nawe’. Kuri ubu kandi anakora muri Ambasade ya Leta Zunze Ubumwe za Amerika mu Rwanda.

Miss Jojo yavutse mu mwaka wa 1983 mu Karere ka Bugesera. Yatangiye kumenyekana mu muziki, mu mwaka wa 2006 ubwo yigaga muri Kaminuza Nkuru y’ u Rwanda ari naho yatangiriye kuririmba ku giti cye akora indirimbo nka ‘Mbwira’ akurikizaho za ‘Ndi nde’ yaje gukurikirwa na za Bereterida n’izindi. Album ye iheruka yasohotse muri Werurwe 2012 yitwa ‘Woman’.

Mu muhango wo gusaba Miss Jojo akanyamuneza kari kose ku maso ye
Miss Jojo ahobera umukunzi we nyuma yo gusabwa
Ni umunsi utazibagirana mu mateka ya Uwineza Josiane
Abasaza bavuze imisango biratinda
Abakorana na Miss Jojo ndetse n'inshuti z'imiryango bari bitabiriye ibi birori
Abo mu muryango wa Miss Jojo bamushyikiriza ab'uw'umusore ashatse
Abasaza bahana ibisabisho...
Uwineza Josiane ntakiri ingaragu ukundi
Ni ibyishimo bidasanzwe kuri Salim Minani n'umugore we Miss Jojo
Miss Jojo arushinze nyuma y'igihe kinini asa n'uwavuye mu by'umuziki
Abo ku ruhande rw'umuryango wa Miss Jojo
Abo ku ruhande rwa Salim Minani umugabo wa Miss Jojo
Ubu bukwe bwabereye kuri Rugende Park

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza