Miss Iradukunda Liliane yasuye abatuye ku Nkombo (Amafoto)

Yanditswe na Munyengabe Murungi Sabin
Kuya 5 Gicurasi 2018 saa 04:54
Yasuwe :
0 0

Nyampinga w’u Rwanda, Iradukunda Liliane yatangiriye imishinga ye mu Karere ka Rusizi ahereye ku gikorwa cyo gufasha abana bagize ikibazo cy’imirire mibi bo mu Murenge wa Nkombo.

Miss Iradukunda Liliane yagiriye uruzinduko rw’iminsi ibiri mu Karere ka Rusizi guhera kuwa Gatanu tariki ya 4 kugeza kuwa Gatandatu tariki ya 5 Gicurasi 2018. Niho yatangiriye urugendo rw’ibikorwa ateganya kuzakorera mu bice bitandukanye by’igihugu.

Mu kiganiro na IGIHE, Miss Iradukunda Liliane yavuze ko yahisemo gutangirira ibikorwa bye i Rusizi kuko yatsinze irushanwa aciye mu ijonjora yanyuzemo mu Ntara y’Uburengarazuba.

Mu rugendo yakoreye i Rusizi, Miss Iradukunda Liliane yasuye abatuye ku Kirwa cya Nkombo anifatanya n’urubyiruko rw’aho mu gikorwa cyo kubakira umukecuru utishoboye wagorwaga no kubona aho akinga umusaya.

Yagize ati “Impamvu nahisemo kujya ku Nkombo, ni n’uburyo bwo kuhasura, bamwe ntibahafata nko mu Rwanda, nifuje kujya gusura abaturage b’aho nkamenya ubuzima babayemo. By’umwihariko nahakoreye igikorwa cyo kurwanya imirire mibi, nasanze cyaratangiye kubanuka ugereranyije n’imibare banyeretse yo mu gihe gishize.”

Miss Iradukunda Liliane ubwo yari mu bwato yambuka yerekeza ku Nkombo

Miss Iradukunda yasuye abana barenga mirongo itatu bari bafite ikibazo cy’imirire mibi,muri bo yasanze umwe gusa ari we ukiri mu muhondo mu gihe abandi batangiye kugira umubiri mwiza.

Yabasigiye ubufasha burimo amata bazajya banywa mu buryo bwo kubongerera intungamubiri ndetse yemera kuzishyura ubwisungane mu kwivuza ku batishoboye makumyabiri.

Mu cyumweru gitaha, Miss Iradukunda Liliane azakomereza urugendo rwe mu Karere ka Musanze ahave yerekeza mu Ntara y’Uburengerazuba ku kirwa cya Iwawa ahagororerwa urubyiruko rwahoze ari inzererezi n’abafatiwe mu biyobyabwenge.

Ingabo z'u Rwanda zambukije Miss Iradukunda Liliane ajya ku Nkombo
Ubwato bwambukije Miss Iradukunda Liliane ajya ku Nkombo
Iradukunda Liliane yasanze bamwiteguye n'imbyino zo ku Nkombo
Nyampinga w'u Rwanda yahaye abana amata
Abana bari baragize ikibazo cy'imirire mibi bahawe amata
Nyampinga w'u Rwanda hamwe n'umukecuru bubakiye inzu
Miss Iradukunda n'ingabo z'u Rwanda mu gikorwa cyo kubakira umukecuru utishoboye
Iradukunda yashishikarije ababyeyi kwita ku ndyo bagaburira abana babo
Iradukunda yishimanye n'abatuye ku Nkombo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza