Miss Earth 2018: Hongewemo icyiciro gishya cyo gutora kuri Internet

Yanditswe na Uwiduhaye Theos
Kuya 21 Ukwakira 2018 saa 08:05
Yasuwe :
0 0

Mu irushanwa ry’ubwiza riri kubera muri Phillipines, Umutoniwase Anastasie, ahagarariyemo u Rwanda, hongewemo icyiciro gishya kijyanye no kureba umukobwa wahize abandi mu gutorwa binyuze kuri Internet.

Iki cyiciro cyatangajwe kuri uyu wa Gatandatu kitwa ‘Eco-Media Beauty’. Cyihariye kuba abakobwa bose bazahabwa amahirwe binyuze mu itora ryo ku mbuga nkoranyambaga z’irushanwa.

Guha amahirwe Umutoniwase muri iki cyiciro, bizatangira kuwa 23 Ukwakira ari nayo tariki abategura irushanwa bagennye.

Gukunda ifoto y’uyu mukobwa ku rubuga rwa Facebook na Instagram rwa Miss Earth cyangwa ukayisangiza [Share] abagukurikira, bizamuhesha amahirwe yo kugera mu bakobwa bazatangazwa kuwa 3 Ugushyingo bazajya mu cyiciro kibanziriza icya nyuma.

Amanota yavuye ku mbuga nkoranyambaga azahuzwa n’ayo akanama nkemurampaka kazatanga kagendeye ku buryo umukobwa yakurikiwe cyane kurusha abandi ku mbuga nkoranyambaga, ndetse n’uko irushanwa ryamenyekanye birushijeho bimuturutseho yaba mbere y’irushanwa cyangwa ubwo ryari ryaratangiye.

Umutoniwase ari mu itsinda ryiswe ‘Fire’ riherutse guhatana abakobwa biyerekana mu mwambaro wo kwerekana ikimero wa bikini, abura amahirwe yo kwegukana umudari n’umwe.

Iri tsinda rye rizongera kwiyerekana kuri uyu wa mbere tariki 22 Ukwakira mu makanzu maremare yo gusohokana ku mugoroba ‘Long gown wear’.

Ibirori bizatangira saa moya z’umugoroba [saa sita zo mu Rwanda] ahitwa Catanauan mu ntara ya Quezon, binyuzwe ku rubuga rwa Facebook rwa Miss Earth imbonankubone.

Irushanwa ry’uyu mwaka ryatangiye kuwa 6 Ukwakira, rizasozwa kuwa 3 Ugushyingo ahitwa Mall of Asia Arena mu Mujyi wa Pasay.

Miss Earth ni irushanwa rihuza ba Nyampinga bo ku migabane itandukanye ku Isi bagahatanira ikamba ry’ubwiza ariko binyujijwe mu ishusho yo kurengera ibidukikije no kurushaho kumenyekanisha gahunda bijyanye.

Umutoniwase Anastasie, ahagarariye u Rwanda muri Miss Earth 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza