Minisitiri Uwacu yakirijwe rukacarara n’amadegede kwa Rutangarwamaboko (Amafoto)

Yanditswe na Munyengabe Murungi Sabin
Kuya 6 Nzeri 2018 saa 12:58
Yasuwe :
0 0

Minisitiri w’Umuco na Siporo, Uwacu Julienne yagendereye Ikigo Nyarwanda cy’Ubuzima Bushingiye ku Muco[RCHC] amurikirwa ibikorwa byihariye gikora ndetse abisogongeraho mu gukomeza gusigasira umuco.

Mu 2011 nibwo iki kigo cyashinzwe na muganga Rutangarwamaboko uri mu biziritse ku muco kandi uwutangaho inyigisho zikangurira abantu kubaho ubuzima bushingiye ku muco.

Minisitiri Uwacu yasuye iki kigo mu mpera z’icyumweru gishize bamwakira mu mpumeko y’uburyo Abanyarwanda babagaho mu myaka yo hambere. Yakirijwe umutsima w’amasaka, ibihaza by’amadegede bitetse Kinyarwanda n’ibishyimbo n’andi mafunguro azwi mu Rwanda rwa kera.

Byari biryoheye ijisho kubona Minisitiri Uwacu akoresha urutamyi mu gukata umutsima w’amasaka bawukurungiye ku nkoko hanyuma buri wese akumva uburyohe bw’ifunguro gakondo.

Mu bindi bamumurikiye harimo gahunda y’ubuzima bushingiye ku muco yigisha abantu kubaho uburyo bushingiye ku muco wabo bakazahuka bakongera kwimenya no kwiyumva birasukira ku kumvana hagati y’abantu ubwabo ndetse no kumvana n’isanzure bituma umuntu yongera kubaho nyakubaho atari ukubaho utariho.

Rutangarwamaboko yabwiye IGIHE ko mu bindi beretse Minisitiri Uwacu harimo gahunda y’ubushakashatsi bushingiye ku bikorwa ari nayo yakoreshejwe mu bushakashatsi bwatangije iki kigo uyu muganga yakoze.

Kuba Minisitiri yarasuye iki kigo giherereye i Nyarutarama ngo byongereye imbaraga abagishinze. Rutangarwamaboko ati “ Ni umunezero ukomeye kuko na Minisiteri isanzwe ari umufatanyabikorwa wacu. Minisitiri we amaze imyaka ibiri ashaka kuza hano ariko inshingano nyinshi zikamugota, ejobundi yaraje. Ikindi, nubwo twigisha ubuzima bushingiye ku muco sit we bakuru, muri twe Minisiteri ni yo iri ku ruhembe, ntabwo twabikora tudashyigikiwe n’ubuyobozi.”

Yongeyeho ati “Kuba minisitiri yavuga ko dukwiye kubaho ubuzima bushingiye ku muco bishimangira uburyo politike y’igihugu cyacu nayo ishyigikiye umuco.”

Mu kwereka Minisitiri Uwacu Julienne ibijyanye n’imibereho y’Abanyarwanda mu Rwanda rwa kera bibanze cyane ku migenzo n’imihango yakorwaga icyo gihe. Bamuritse imigenzo mikuru n’uko yakorwaga uhereye ku kuraguza, kubandwa no guterekera ndetse n’umuhigo.

Ibi byamuritswe n’Itorero Ababeramuco ryashinzwe n’iki kigo. Abarigize nibo bigisha umuziki gakondo n’ibicurangisho byose bya Kinyarwanda bigizwemo uruhare na Mushabizi umwe muri bake bakiriho baririmbye kuva mu gihe cya cyami.

Minisitiri Uwacu babanje kumuha amazi yo gukaraba mbere yo kwegera ifunguro

Rutangarwamaboko ati “Nubwo abantu batari barimo kubandwa ako kanya ariko babikoze berekana uko kubandwa babikoraga icyo gihe. Babikora mu buryo bwo kwigisha…”

Mu byo basabye Minisitiri akanabibemerera harimo “ko ku muganura hajya hibandwa ku mafunguro nyarwanda y’umwimerere. Umutsima ni wo wazaga mbere n’amata, umutsima turya ni uruziga na wo kandi uba washigishwe ariko ugashya ukomera. Ibi bifite igisobanuro gikomeye, uko u Rwanda rushigishwa niko narwo rukarushaho gukomera.”

Minisitiri Uwacu yasuye Ikigo Nyarwanda cy’Ubuzima Bushingiye ku Muco[RCHC]
Rutangarwamaboko na Minisitiri Uwacu Julienne ubwo yari yabasuye
Hano Rutangarwamaboko na Minisitiri Uwacu bakataga umutsima w'amasaka
Umuyobozi ushinzwe Umuco muri Minisiteri y'umuco na siporo Mutangana Steven na we yariye ku ifunguro riteguye kinyarwanda
Iyo umushyitsi yagusuraga wamwakirizaga amazi y'amasaka
Mu byo bamurikiye Minisitiri harimo ubuvuzi bushingiye ku muco
Umuhigo na wo wamurikiwe Minisitiri Uwacu
Umuco wo kuraguza na wo berekanye uko wakorwaga
Iki gikoresho cyari gifite agaciro gakomeye cyane mu Rwanda rwo hambere
Abasaza barimo Mushabizi bazobereye mu muziki gakondo w'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza